ئافرەت وەک یەکەم قوتابخانەی مرۆڤایەتی

بێریڤان سەباح محەمەد
مێژووی مرۆڤایەتی سەلماندوویەتی کە هیچ نەتەوەیەک، بەبێ ئامادەبوون و بەشداریی چالاکانەی ئافرەت، نەگەیشتووەتە پلەی پێشکەوتن و گەشەسەندن. کاتێک باس لە ئافرەت دەکەین، مەبەست تەنها نیوەی دانیشتووانی کۆمەڵگە نییە، بەڵکوو باس لە بنەمایەکی گرنگ دەکەین کە کاریگەرییەکی ڕاستەوخۆی لەسەر پەروەردەی تاک و گەشەی کۆمەڵگە هەیە.
پەروەردەی مرۆڤ لە قوتابخانەوە دەست پێ ناکات، بەڵکوو لەناو خێزان و لە باوەشی دایکەوە دەست پێ دەکات. دایک یەکەم کەسە کە منداڵ لێیەوە زمان، ڕەوشتی باش، ڕێزگرتن لە خەڵک و خۆشەویستی فێر دەبێت. قوتابخانە دەتوانێت زانست فێر بکات، بەڵام دایک ئەو کەسەیە کە بنەمای کەسایەتی و مرۆڤایەتی لە منداڵدا دادەمەزرێنێت.
ئاستی هۆشیاری و پێشکەوتنی هەر کۆمەڵگەیەک بە ئاستی تێگەیشتن و هۆشیاریی ئافرەتەکانییەوە پەیوەستە. ئەگەر دایکێک تێگەیشتوو و هۆشیار بێت، دەتوانێت نەوەیەکی باش پەروەردە بکات؛ بەڵام ئەگەر ئافرەت لە ماف و خوێندن بێبەش بکرێت، ئەوە کاریگەرییەکی خراپی لەسەر داهاتووی کۆمەڵگە دەبێت.
لە سەردەمی ئێستادا، ڕۆڵی ئافرەت تەنها لەناو ماڵدا نەماوەتەوە. ئافرەتان لە بوارە جیاوازەکاندا توانیویانە سەرکەوتنی بەرچاو بەدەست بهێنن و بیسەلمێنن کە دەتوانن، لەگەڵ پاراستنی خێزان، خزمەتێکی گەورەش بە کۆمەڵگە بکەن.
لە کۆتاییدا، ڕێزگرتن لە ئافرەت و دابینکردنی مافەکانی، تەنها ئەرکێکی کۆمەڵایەتی نییە، بەڵکوو هەنگاوێکی گرنگە بۆ بنیاتنانی داهاتوویەکی باشتر. کاتێک پیاوێک پێ دەگەیەنیت، تەنها تاکێکت پێگەیاندووە؛ بەڵام کاتێک ئافرەتێک پێ دەگەیەنیت، لە ڕاستیدا بناغەی داهاتووی نەتەوەیەکت بەهێز کردووە.