ئافرەت و پەروەردەکرنا زارۆکان

حوسنا سدیق
د هەر جڤاکەکی دا، ئافرەتێ ڕۆلەکێ مەزن د ئاڤاکرنا خێزانێ و پەروەردەکرنا نڤشێ نوو دا هەیە. هەرچەندە ئافرەتێ د ژیانێ دا کار و بەرپرسیارییێن جۆراوجۆر هەنە و د ژیانا دەرڤە دا سەرکەفتنێن مەزن دەستخوەڤە ئیناینە، لێ ڕۆلێ وێ یێ هەرە مەزن پەروەردەکرنا زارۆکانە. ئافرەت شیایە ڤی ڕۆلێ پیرۆز ب ڕاستی بگێڕیت؛ ئەڤ هێزا ئافرەتێ هێزەکا بێوێنەیە کو مرۆڤ پێ مەندەهۆش دبیت، چونکی زانستی سەلماندیە کو پەروەردا دایکێ هێڤێنێ جێگیربوونا کەسایەتییا هەر زارۆکەکی یە. زارۆک ئێکەم پێنگاڤێن ژیانێ مینا فێربوونا زمانی، ڕەوشت، ڤیان و بەهایێن مرۆڤایەتیێ، دەستپێکێ ژ دایکێ و پاشی ژ خێزانێ فێر دبیت. ژبەر هندێ، ئافرەت نە ب تنێ نیڤا جڤاکی یە، بەلکوو ئاڤاکەرا بناغێ کۆمەڵگەهی یە.
دەما ئەم هزر د پەروەردەکرن یان خودانکرنا زارۆکان دا دکەین، مەبەست ب تنێ دابینکرنا خوارن، جلوبەرگ و پێدڤیاتیێن ماددی نینە؛ پەروەردە ئانکو ئاڕاستەکرنا هزروبیران، فێرکرنا ڕاستگۆییێ، هەلگرتنا بەرپرسیارەتیێ، هەڤکاری و ڕێزگرتنا کەسانێن دی، کو ئەڤە بۆ ئاڤاکرنا جڤاکەکێ ب ڕوومەت گرنگییا خۆ یا تایبەت هەیە. ئەگەر زارۆک ل بەر دەستێ دایکەکا ب ڤی ڕەنگی مەزن ببیت، دێ بیتە تاکەکێ خودان تێڕوانین و کەسایەتیەکا ب هێز.
زارۆک ژ دایکێ فێری ژیانەکا ب سەربلندی و بنەمایێن زانستخوازیێ دبیت، هەروەسا ڕەوشتێن وەک دلسۆزی، لێبۆردەیی، پاقژیا ناخی و هەڤکاریێ فێر دبیت. ئەڤ بەهایە د هوشێ زارۆکی دا جێگیر دبن و تمامیا ژیانێ دگەل دا دمینن، و د پاشەڕۆژێ دا ئەڤ زارۆکە دبیتە خودان بیرۆکە، چ بۆ چارەسەرکرنا ئاریشەیان بیت یان ژی بۆ بەرەڤپێشبرنا وەڵاتی.
دەما ئەم دبینین کاریگەری و ڕۆلێ ئافرەتێ د پەروەردەکرنا نڤشەکێ دا ب ڤی ڕەنگی یێ مەزنە، ل ڤێرە بۆ مە دیار دبیت کو هاندان و پشتیوانییا ئافرەتان د تێگەهشتنا ژیانا سەردەم دا، ڕاستەوخۆ کاریگەری ل سەر پەروەردەکرنا زارۆکەکێ ساخلەم هەیە. لەوما زۆرا پێدڤیە پشتیوانییا تمام یا ئافرەتان بهێتە کرن، مافێن وان بهێنە پاراستن و ژینگەهەکا ئارام بۆ بهێتە ڕەخساندن. هەروەسا پێدڤیە ناڤەندێن ڕۆشنبیرکرنا ئافرەتان بهێنە ڤەکرن؛ ئەڤە چ پەیوەندی ب فێربوونا زانستەکێ ل کۆلیژەکێ یان زانکۆیەکێ ڤە نینە، بەلکوو ئەڤ ناڤەندە بۆ هندێ نە کو ئافرەت بشێن ژ گۆشەنیگایێن جودا سەیری ژیانێ بکەن، دا کو نەبنە خودان هزرێن بەرتەنگ و ڕەشبین کو ببیتە ئەگەرێ پەیدابوونا نڤشەکێ گۆشەگیر، بێ ئومێد و بێ هەلوەست.
ل کۆتاییێ، بۆ مە دیار دبیت کو ئافرەت نە ب تنێ ژێدەرێ ئاڤاکرنا خێزانێ یە، بەلکوو ژێدەرێ هەرە مەزن یێ ئاڤاکرنا جڤاکەکێ ساخلەم، هشیار و پێشکەفتی یە. ئافرەت دلێ جڤاکی یە و ل سەر جڤاکی پێدڤیە ب هەموو شیانێن خۆ پشتیڤانێ ئافرەتان بیت و ڕێز ل هەبوونا وێ وەک ڕەگەزەکێ سەرەکی بهێتە گرتن.