برایەتی بۆ دوای سەربەخۆیی كوردستان

مەشخەڵ كەوڵۆسی
ئێستا ناوچەكەمان بە وردترین و هەستیارترین قۆناغ و ئاڵوگۆڕی ڕاستەقینەدا تێدەپەڕێت و، دەبوو كورد وەكو نەتەوە، وەكو حیزبە سیاسییەكان و توێژی ڕۆشنبیران، لەمێژە بۆ ئەم ڕووداوانە ئامادەبوونایە و، پلان و نەخشەی خۆمان هەبووایە بۆ مامەڵەكردن لەگەڵ باوردۆخ و گۆڕانكارییەكەدا.
كەچی بەداخەوە ئەم سەدەیەش، وەك سەدەكانی تر، هیچ ئامادەسازییەكمان نیە و، سەرجەم پێشهاتەكان بۆ ئێمە دەبنە خورپە و، دەرفەتەكان لەدەست دەچن و، وادیارە كورد ناتوانێت سود لە دۆخەكە وەرگرێت. ئەگەرچی ئاستەنگەكانی بەردەم سیاسییەكانی كورد زۆر و زەوەندن و، ڕەنگە ئاسان نەبێت گلەیی ئەوە بكەین كە بۆچی ناتوانن دۆخەكە بۆ سەربەخۆیی كوردستان بقۆزنەوە، بەڵام ئەوەی مایەی نیگەرانی قووڵە، ئەوەیە بەشێكی زۆر لە نوسەران و ڕۆشنبیران، لەم ساتەوەختەدا بەخەیاڵاتی پێكەوە ژیان و دروشمی ناواقیعی جۆراوجۆر، هەوڵدەدەن تاكی كورد گۆش بكەن بە خەیاڵاتی ناواقیعی و، بە بیانووی دروشمەكانی پێكەوە ژیان و برایەتی و بابەتی لەو جۆرە، تاكی كورد هەموو ڕەگەزەكانی بەرەنگاری تێدا نەمێنێت و، ببێتە زەوییەكی لەبار بۆ وەرگرتنی هەرچی تۆوی نامۆیە بە شوناسی سیاسی كورد.
قسەی ئێمە لەسەر بنەمای ئەو بابەتانە نیە، وەكو بنەما، بەڵكو وەك ئەوەی: ئایا كورد لەكاتێكدا خاكی داگیركراوە، نەتەوەكانی دەوروبەر ڕێگە نادەن مومارەسەی بچوكترین مافی خۆی بكات، تەنانەت وەكو مەكرەمە باسی دەكەن ئەگەر ڕۆژێك لەڕۆژان ڕێگە بدەن كوردێك هۆنراوەیەك بەكوردی چاپ بكات. ئەوان سەرجەم پانتایی مافەكانی كوردیان تەنیوە، بەئاگروئاسن حوكمی كورد دەكەن، نەك ڕێگە نادەن كوردیش وەكو ئەوان دەوڵەتی هەبێت، بەڵكو لەسەرخاكی خۆی، كیمیاییباران و ئەنفال و كەزی بڕین، درۆن و موشەكی بۆ دەنێرن و، مووچەكەیشی دەبڕن! كەچی لەولاوە ڕۆشنبیری كورد هێشتا داوا لەكورد دەكات لەگەڵ برا عەرەب و تورك و فارسەكانیدا بژی!.
لەبری بازهەڵدان بەسەر ئەو بالۆرە كۆنە بێسود و، ئەو خەڕەكەی كە سودەكەی بۆ نەتەوەكانی تر و، تەقەتەقی بێزاركەریشی بۆ كوردە، دەبێ ئەو نوسەر و ڕۆشنبیرانە لەبورجە عاجییەكانیان بێنە خوارەوەو، بەچاوی سەر كورد و كێشەكانی ببینن، سەیری ئەو ستەمە مێژووییە گەورە و كاریگەرە بكەن كە نەتەوەكانی تر لەكوردیان كردووە، باشترە لە بری قەوانی پێكەوە ژیان لەگەڵ داگیركەر، بەكورد بڵێن: نەتەوەكانی تر بەخوێن و بەماف قەرزاری ئێمەن، پێویستە ئەو قەرزە بدەنەوە.
بانگەشەكارانی خەیاڵی پێكەوە ژیانی كوردی ژێردەستە و نەتەوە سەردەستەكان، دەبێ زۆرباش بزانن كە لەدنیای ئەمڕۆدا شتێك نیە بەناوی پێكەوە ژیان و برایەتی گەلان، بەڵكو ئەوەی هەیە پەیوەندی هێزە، پەیوەندییەكە جەبری بەرژەوەندییەكی نێودەوڵەتی دیسپلینی كردووە، ئەگینا كورد لەزۆرینەی وێستگە مێژووییەكاندا، وەك ڕیفراندۆمی مەزنی 2017، بەهەموو جیهانی گوتوە: من ملكەچی ئەو پەیوەندییە بەزۆر سەپێنراوە نیم و، دەوڵەتم دەوێت.
لەڕاستیدا جیهان جێگەی فەنتازیا و خەیاڵاتی نوسەرانی كوردی تێدا نابێتەوە، جیهان جێگەی برایەتی نیە، بەڵكو پانتاییەكە بۆ نمایشی هێز و، ئەو نەتەوانەی دەوڵەتییان هەیە، هەموو مافێكیان هەیە، كوردیش كە دەوڵەتی نیە، پێویستە لەبری خۆ خەڵەتاندن بەناوی برایەتی و پێكەوە ژیان، بیر لەوە بكاتەوە دەوڵەت دروست بكات، ئەوجا دەبێتە نەتەوەیەك كەمافی مرۆڤ و مافی ژیان بیگرێتەوە.
دواجار دەڵێم: تەنانەت لەدوای دروستكردنی دەوڵەتی كوردستان و گەڕاندنەوەی قەرەبووی 100ساڵ داگیركردنی كوردستان، هێشتا نابینە برای نەتەوە داگیركەرەكانی كوردستان، بەڵكو دەبینە دۆستیان. دۆستایەتی سیاسی لەسەر بنەمای بەرژەوەندی دەوڵەتی كوردستان، نەك برایەتی بەو مانای خوێن و بەو مانا ئەخلاقییە سواوەی كە تەنها لای كورد باوی ماوە.