پەیمان خەواجە
ژ ڕەهەندێن دیروکی بۆ هەڤپشکییا پاشەڕۆژێ و ب ئامادەبوونا بەرێز (د. ئالان حەمەسەعید) وەزیرێ پەروەردەیێ، ل هەولێرا پایتەخت ب فەرمی مەراسیمێن ب نیڤدەولەتیکرنا کۆمەڵگەها پەروەردەیی یا فەرەنسی (دانیال میتران) ژ لایێ وەزارەتا پەروەردەیێ هاتە ئەنجامدان. ئەڤ پێنگاڤە بتنێ گهوڕینەکا کارگێری یان پەروەردەیی نینە، بەلکو نویکرن و درێژەپێدانا وێ پرا دیروکی یە، ئەوا گەلێ کورد ب کۆمارا فەرەنسا ڤە گرێددەت. ناڤێ “دانیال میتران” ل سەر ڤێ کۆمەڵگەهێ، ڕەنگڤەدانا وەفادارییا کوردانە بۆ دۆستەکا دێرین، و د هەمان دەم دا دەرازینکەکە بۆ خواندنا لاپەرێن دۆستایەتییا سیاسی و مرۆڤایەتی دناڤبەرا هەردو گەلان دا.
پەیوەندیێن فرەنسا و کوردان، بەرهەمێ قوناغەکا نوی نینە، بەلکو دوستایەتییەکە رەھ و ریشالێن وێ بۆ دەمەکێ درێژ ڤەدگەرت،فەرەنسا وەکی ماکا رۆشنگەری ومافێن مروڤی ل ئەوروپا،د چەندین قوناغێن جودا یێن دیروکی دا پێشوازی ل رەوشەنبیر وخەباتکەر و سیاسەتمەدارێن کورد کرییە، پاریس باوەشەک بوو بۆ دەربرینا دەنگێ مەزلومیا گەلێ کورد وناساندنا دۆزا وی یا ڕەوا بۆ جیهانێ، فرەنسا رولەکێ گرنگ هەبوو د پشتەڤانیکرنا پێشمەرگەی دا ل شەرێ دژی داعش وسەڕوکێ وی دەمی یێ فرەنسا (فرانسوا ئولاند) د وێ ڕەوشێ دا سەرەدانا هەرێما کوردستانێ کر و دگەل سەرۆک مەسعود بارزانی سەرەدانا بەروکێن شەڕی کر ئو هەروەسا ل سەر دەمێ سەروکێ نها یێ فرەنسا (ئیمانوێل ماکرون) بۆ دوپاتکرنا پشتەڤانیا فرەنسا بۆ هەرێما کوردستانێ د کاودانێن دژوارێن هەرێم تێدا دەرباز بووی، سەرەدانا هەرێما کوردستانێ کر. پێشوازیکرنا فەرمی یا فرەنسا ل سەرۆک بارزانی و ڤەکرنا رێرەوەکێ ب ناڤێ پێشمەرگەی رێزگرتن و پەیوەندیێن موکم یێن فرەنسا بۆمللەتێ کورد و بۆ پێشمەرگەی وەک بەرەڤانیکەر ژ جیهانا ئازاد نیشان ددەت.
خالا وەرچەرخانێ یا دیروکا نویی یا ڤێ دۆستایەتییێ، ل چەرخێ بوری ل سەردەمێ سەرۆکاتییا سەرۆکێ وەغەرکری (فرانسوا میتران) بوو، میتران خودانێ دیتنەکا مرۆڤی و ستراتیژی، ئەوی دۆزا گەلێ کورد، دانا ناڤ جەرگێ سیاسەتا دەرڤە یا فەرەنسا دا. پشتی کارەساتا ئەنفال و کیمیابارانا هەڵەبجە، د دژوارترین قۆناغێن گەلێ کورد تێدا دەربازبووی ب کۆچا ملیونییا سالا 1991ێ، فرانسوا میتران ڕۆلەکێ پێشەنگ گێڕا و ئەو ئەندازیارێ سەرەکی بوو ل پشت دەرچوونا بڕیارا 688 یا جڤاتا ئاسایشا نیڤدەولەتی، بۆ دروستکرنا دەڤەرا (دژەفڕین) بۆ هەرێما کوردستانێ، ئەڤ بریارە بوو هێڤێنێ سەرەکی یێ پاراستنا قەوارێ هەرێما کوردستانێ. فرانسوا میتران دۆزا گەلێ کورد ژ پرسەکا ناڤخۆیی بۆ پرسەکا مرۆڤایەتی و سیاسی یا نیڤدەولەتی گوهڕی .
دایکا کوردان (دانیال میتران)
هەڤدەم د گەل دبلۆماسییا فەرمی یا پاریس دا، خودانا بلندترین پێگەھ د دلێ کوردان دا و رویێ مروڤی یێ فرەنسا (دانیال میتران)، هەڤژینا فرانسوا میتران بوو . (دانیال) ێ، بتنێ ل پشت پەنجەرێن کوچکا ئیلیزێ وەک خانما ئێکێ یا فەرەنسا تەماشەی رویدانان نەدکر، بەلکو وەک شورەشگێرەکا مافێن مرۆڤی هاتە د ناڤ ئێش و ئازارێن مللەتێ کورد دا، ئەوێ د ناڤ ئاوارەیان ل سەر سنووران، روندکێن زارۆکێن کورد پاقژکرن و دەنگێ کچ و دایکێن ئەنفالکری گەهاندە بلندترین سەکۆیێن نێڤدەولەتی. ژبەر ڤێ هەلویستێ وێ، کوردان ناسناڤێ (دایکا کوردان) پێشکێشی وێ کر .
دەما ئەڤرۆ، وەزارەتا پەروەردێ ل هەولێرێ کۆمەڵگەها پەروەردەیی یا فەرەنسی ب ناڤێ (دانیال میتران) ب نیڤدەولەتی دکەت، نامەیەکا فرەڕەهەند و کویر ئاراستەی جیهانێ دکەت. ئەڤ پێنگاڤە بەرهەمێ وەفادارییا نەگهور یا گەلێ کوردە بۆ دۆستێن رۆژێن تەنگاڤیا وەک (دانیال و فرانسوا میتران)ـی، ئو د هەمان دەم دا، بەڵگەیەکە ل سەر بەردەوامییا دۆستایەتییا ستراتیژی یا دناڤبەرا هەرێمێ و پاریس دا کو ژ بوارێ سەربازی و سیاسی بۆ لهەڤگهورینا چاند و پەروەردەیی، ئەڤ ب نیڤدەولەتیکرنە دەرازینکەکا نوی یێ زانستی ب ستانداردێن بلند یێن ئەوروپی بۆ نفشێ نوی یێ کورد ڤەدکەت، دا کو ببیتە پرەک بۆ پاشەڕۆژا پەیوەندییێن هەردو ئالیان .
مەراسیمێن وەزارەتا پەروەردێ ل هەولێرێ، بتنێ دەستپێکەکا نوی نینە بۆ ناڤەندەکا خواندنێ، بەلکو سەلماندنا وێ ڕاستیێ یە کو تۆڤێ دۆستایەتییێ یێ (فرانسوا میتران) و (دانیال میتران) ل چەرخێ بوری ل کوردستانێ چاندی، ئەڤرۆ بوویە دارەکا بەرهەمدار و دێ فەرەنسا دۆستێ دێرین و هەردەمییێ کوردان مینیت، و (دانیال میتران) ژی،دێ ل ناڤ پۆلێن خواندنێ ل هەولێرێ ب نەمر مینیت، دەما نفشەکێ نوی یێ کوردان ب ئاستەکێ نیڤدەولەتی بەرەف پاشەڕۆژەکا گەشتر پێنگاڤان د هاڤێژیت.