حەوت ساڵ خزمەتی بێوچان

عارف ڕوشدی
لە ساڵیادی دەستبەکاربوونی کابینەی نۆیەمی حکومەتی هەرێمی کوردستاندا؛ (٧) ساڵ بەر لە ئێستا، کابینەی نۆیەمی حکومەتی هەرێمی کوردستان بە سەرۆکایەتیی ڕێزدار (مەسرور بارزانی)، دوای ئەوەی پێکهاتەی حکومەت و کارنامەکەی لە پەرلەمانی کوردستان پەسەند کرا، دەستبەکار بوو. لەو کاتەدا سەرۆکی حکومەت ڕایگەیاند، خۆی و حکومەتەکەی پابەند و بەرپرسیار دەبن بەرامبەر گەلی کوردستان، بەوەی بە هەموو توانایەکەوە بەرپرسانە کار دەکەن لە پێناوی جێبەجێکردنی سەرجەم بابەتەکانی کارنامەی ڕاگەیەنراوی کابینەکەی. لە ڕاستیدا، سەرەڕای ئاڵنگاری و ڕێگرییەکان، سەرۆکی حکومەت دوای
دابەشکردنی ئەرکەکانی هەر وەزارەتێک وەک لە کارنامەکەدا هاتووە، ڕاستگۆیانە و ماندوونەناسانە، سەرکردایەتی و سەرپەرشتیی پرۆسەی حکومڕانییەکی پاک و بێگەردانەی کرد. پێش هەموو شتێک، وەک لە چوارچێوەی کارنامەکەدا جەختی لێ کرابووەوە، بە پلان ڕێگری دەکات لە تەشەنەکردنی دیاردەی قێزەونی گەندەڵی بە هەموو شێوازەکانییەوە، لە کاتێکدا باش دەیزانی و چەندین جاریش ئاماژەی پێ کردووە، لە ئەنجامی ئەو ئەرکەیدا دڵنیایە ڕووبەڕووی تەنگژە دەبێتەوە لەلایەن ئەو کەس و لایەنانەوە کە بەرژەوەندییەکانیان تێکدەچێت.
هەر بۆیە لایەنە زیانپێکەوتووەکان، دەستەوەستان نەوەستان و بە هەموو شێوەیەک دەستیان کرد بە داڕشتنی پلان و پیلان بە مەبەستی گرفت دروستکردن و ڕاگرتنی تەوژمی کارکردنی وڵاتپارێزانەی سەرۆکی حکومەت و کابینەکەی.
پلان و پیلانەکان لەسەر ئاستی هەرێمی کوردستان و حکومەتی فیدراڵیی عێراق داڕێژران؛ لەسەر ئاستی هەرێمی کوردستان، ڕێگرییان کرد لە جێبەجێکردنی یاسا، فەرمان و پڕۆژە خزمەتگوزارییەکانی حکومەت لە هەندێک ناوچەدا وەک پێویست. لەسەر ئاستی حکومەتی فیدراڵیشدا، دەستبار نەبوون لە چارەسەرکردنی کێشە و گرفتە دروستکراوەکانی دژی بەرژەوەندییەکانی گەلەکەمان، بەڵکوو سەرەڕای نادادپەروەری و ستەمکاریی دامودەزگاکانی بەغدا، هەمیشە لایەنگیریی ئەوانیان دەکرد یان بێدەنگییان هەڵدەبژارد.
بەڵام حکومەتی هەرێمی کوردستان بە سەرۆکایەتیی ڕێزدار مەسرور بارزانی، بە پشتیوانیی زۆرینەی هەرە زۆری کۆمەڵانی خەڵکی کوردستان، پشتیوانی و ئامۆژگاریی جەنابی سەرۆک بارزانی، هەماهەنگیی هێژا نێچیرڤان بارزانی سەرۆکی هەرێمی کوردستان و پارتی دیموکراتی کوردستان، توانی بەسەر زۆربەی ئاڵنگارییەکاندا زاڵ بێت و بە خۆڕاگرییەوە پەرە بە کاروانی ئاوەدانی و پاراستنی خواست و مافە ڕەواکانی گەلەکەمان بدات.