حەسەن ئاندێکی – هەولێر
فیلمی هەست و هۆش بەرهەمێکی درامی و ڕۆمانسییە لەسەر بنەمای ڕۆمانی بەناوبانگی نووسەری بەریتانی، جەین ئۆستن، دروست کراوە. چیرۆکەکە ژیانی دوو خوشک، ئەلینۆر و ماریان داشوود، دەگێڕێتەوە دوای لەدەستدانی باوکیان، لەگەڵ کۆمەڵێک گۆڕانکاریی دارایی و کۆمەڵایەتی ڕووبەڕوو دەبنەوە و ناچار دەبن شێوازی ژیانی خۆیان بگۆڕن.هەرچەندە دوو خوشکەکە پەیوەندییەکی خێزانیی بەهێزیان هەیە، بەڵام لە بیرکردنەوە و مامەڵەکردن لەگەڵ هەست و خۆشەویستیدا جیاوازن. ئەلینۆر کەسایەتییەکی ئارام و ژیرە و هەوڵ دەدات هەستەکانی کۆنترۆڵ بکات و لە بڕیارداندا زیاتر پشت بە عەقڵ ببەستێت؛ لە بەرامبەردا، ماریان کەسایەتییەکی سۆزداری هەیە و بە ئاشکرا دەنگی دڵ و هەستەکانی خۆی دەردەبڕێت.ئەم جیاوازییە لە ڕەفتار و بیرکردنەوەدا دەبێتە هۆی دروستبوونی کۆمەڵێک ڕووداوی سۆزداری و تاقیکردنەوەی قورس کە کاریگەرییان لەسەر بڕیارەکانیان و داهاتووی ژیانیان هەیە. فیلمەکە بە شێوەیەکی ورد و جوان، ململانێی نێوان هەست و عەقڵ، سروشتی خۆشەویستی، ئازاری لەدەستدان و گرنگیی ئازادیی هەڵبژاردن دەخاتە ڕوو.فیلمەکە بینەر بانگهێشت دەکات بیر لەوە بکاتەوە کە ئایا بۆ گەیشتن بە خۆشبەختی، دەبێت گوێ لە دەنگی دڵ بگرین یان حوکمی عەقڵ؟
سەرچاوە:
https://www.focusfeatures.com/sense-and-sensibility
