فیلمی سینەمایی “جیران”، کە لە دەرهێنانی مانۆ خەلیلە، دەستی بە خولی نمایشە گشتییەکانی خۆی لە شارە کوردییەکانی رۆژاوای کوردستان دەکات و ئەم فیلمە دوای بەشداری و سەرکەوتن لە ژمارەیەک فێستیڤاڵ و چالاکیی سینەمایی نێودەوڵەتی، ئێستا بەرەو بینەری کورد دێت و لە ژمارەیەک شار و ناوچەی رۆژئاوای کوردستان، لە ڕۆژی دووشەممە، 3ی ئابی 2026 نمایش دەکرێت.
مانۆ خەلیل، دەرهێنەری ئەو فیلمە سینەماییە بۆ (هەولێر) گوتی: فیلمی سینەمایی “جیران”، لە شارەکانی قامیشلو، عاموودە، دێریک، رومێلان، تەربەسپی، دەربەسیە و هەروەها لە چەندین شار و شارۆچکەی تردا نمایش دەکرێت. هەروەها ئەم نمایشانە دەرفەتێک دەڕەخسێنن بۆ ئەوەی جەماوەری رۆژئاوای کوردستان لە نزیکەوە ئاشنا ببن بە یەکێک لە گرنگترین بەرهەمە سینەمایییە کوردییەکان.
گوتیشی: فیلمەکە باس لە چیڕۆکی منداڵێکی کوردی 6 ساڵان دەکات، کە لە گوندێکی نزیک سنووری باکوور و رۆژاوای کوردستان لە شاری قامشلۆ دەژی و بنەماڵەکەی لەنێوان دوو دەوڵەتی تورکیا و سووریا دابەش کراون، هەروەها فیلمەکە باس لە 50 ساڵ ستەمی رژێمی بەعس دەکات، فیلمەکە بۆ هەر کوردێک پڕە لە ئێش و بیرەوەریی ناخۆش، وەکو ئەو منداڵەی کە لەسەر قسەکردن بە زمانی کوردی لێدانی دەخوارد، لە قوتابخانە بە عەرەبی و لە ماڵەوە بە زمانی کوردی قسەی دەکرد، ئەو سنوورەی کە زەوی، ماڵ، فەرهەنگ، هەست و مرۆڤایەتی دابەش دەکرد.
مانۆ خەلیل باس سوپاس و پێزانین ئاراستەی ئەو کەسانە دەکات کە هاوکاربوونە لە نمایشکردنی ئەو فیلمە لە رۆژئاوای کوردستان و دەڵێت: سوپاس و پێزانین ئاراستەی هەموو ئەو کەسانە دەکەم کە بە جۆراوجۆر لە رێکخستن و ئامادەکردنی ئەم نمایشانەدا بەشدارییان کردووە. ئەم سەرکەوتنە بەبێ هاوکاری و ماندووبوونی تیمی کار، دامەزراوە کولتوورییەکان و دڵسۆزیی ئەو کەسانەی باوەڕیان بە گرنگی سینەما و هونەری کوردی هەیە، بەدەست نەدەهات. هەروەها سوپاسی تایبەت بۆ بینەرانی خۆشەویست کە بە هاتن و پشتیوانییان لەو نمایشانە، پشتگیری لە هونەر و سینەمای کوردی دەکەن و دەبنە بەشێک لە گەیاندنی ئەم پەیامە مرۆیی و مێژووییە بە نەوەکانی داهاتوو.