شێرکۆ حەبیب
لە ١٦ی ئابی ١٩٤٦، لە بارودۆخێکی سیاسی و نەتەوەیی هەستیاردا، پارتی دیموکراتی کوردستان بە سەرکردایەتی ژەنەراڵ مستەفا بارزانیی نەمر دامەزرا. ئەو ڕووداوە بۆ گەلی کورد تەنها دامەزراندنی پارتێکی سیاسی نەبوو، بەڵکوو هەنگاوێکی گرنگ بوو بۆ ڕێکخستنی خەباتی نەتەوەیی و بەهێزکردنی متمانەی گەل بە توانای خۆی بۆ داواکاری مافە ڕەواکانی.
لەو ڕۆژەوە تا ئێستا، پارتی بەشێکی گرنگی مێژووی هاوچەرخی کوردستان بووە. ئەو ڕێگایە ئاسان نەبووە، بەڵکو پڕ بووە لە جەنگ و نەهامەتی و ئاوارەیی و گەمارۆ و زیندان و قوربانیدان. زۆر کەس لەم ڕێگایەدا گیانیان بەخت کردووە .
بارزانیی نەمر بۆ کورد و کوردستان بوو بە هێمای خەبات و خۆڕاگری. ناوی ئەو بە بەشێکی گرنگی مێژووی کوردستانەوە گرێدراوە. ئەوەی بە”ڕێبازی بارزانی” ناسراوە، لە تێگەیشتنی مندا، تەنها شێوازێکی خەبات نەبوو؛ هەڵگری بیرۆکەیەک بوو کە تێیدا نیشتمانپەروەری، خۆڕاگری، شانازی بە ناسنامە و هیوابوون بە داهاتوو پێکەوە کۆدەبنەوە.
لە ماوەی ئەم هەشتا ساڵەدا، پارتی تەنها لە مەیدانی خەباتی نەتەوەیی نەماوەتەوە. لە قۆناغە جیاوازەکانی مێژوودا، باسی دیموکراسی، مافە مرۆییەکان، دادپەروەری و پێکەوەژیانیشی کردووە. بۆ من ئەمە خاڵێکی گرنگە، چونکە خەباتی نەتەوەیی نابێت بە مانای دژایەتی لەگەڵ ئەوانی تر بێت.
کوردستانی ئەمڕۆ پێویستی بە دامەزراوەی بەهێز، حوکمی یاسا، دیموکراسی، ئابووری بەهێز و یەکگرتوویی ناوخۆ هەیە. بە ڕای من، ئەمەش بەشێکە لەو دید و تیڕوانینەی سەرۆک مەسعود بارزانی و پارتی دیموکراتی کوردستان بەردەوام جەختیان لەسەر کردووەتەوە، پاراستنی دەستکەوتەکان، بەهێزکردنی دامەزراوەکان و بەردەوامبوون لە ڕێگای دیموکراسی و یاسا.
لە هەمان چوارچێوەدا، ئەمڕۆ پێویستە هەنگاوە سیاسییەکان بەرەو کاراکردنەوەی پەرلەمانی کوردستان و پێکهێنانی کابینەی دەیەمی حکومەتی هەرێم بڕۆن. ئەمە ئەرکێکی سیاسیی گرنگە. لەگەڵ ئەوەشدا، پێویستە پەیوەندییەکی هاوسەنگ و بەهێز لەگەڵ بەغدا و دراوسێکان بپارێزرێت.
لەو پێناوەدا، ڕۆڵی سەرۆک مەسعود بارزانی بۆ من گرنگە. ئەو لە ماوەی دەیان ساڵدا لە قۆناغە هەستیار و سەختەکانی کوردستاندا بەشدار بووە و بەردەوام جەختی لەسەر مافە نەتەوەییەکانی گەلی کورد، ئاشتی، پێکەوەژیان و ڕێککەوتن کردووە.
هەشتا ساڵ لە خەبات، هەشتا ساڵ لە هیوایەک و هیوای کوردستان هێشتا بەردەوامە.