هاودەنگ فارووق
چەقبەستنی پرۆسەی سیاسی كوردستان، قۆناغێكی قورس و ئاڵۆزە و ئەگەرچی هۆكارەكەی ڕوونە و ئەو لایەنەی بووەتە بەربەست لەبەردەم پرۆسەكەدا بۆ چاودێرانی ناوخۆیی و بیانیش ئاشكرایە، هەمووان دەزانین لەئەنجامی قبوڵنەكردنی دۆڕانی سەر سندوقەكانی دەنگدان، جۆرێكی نالۆژیكی لە قوفڵدانی پرۆسەی سیاسی هێنراوەتە كایەوە.
ڕقهەڵگرتن لە پرۆسەی سیاسی و پێداگرتن لەسەر ئەوەی وەكو براوەی هەڵبژاردن ڕەفتار بكەیت، هۆكاری سەرەكی ئەو تەنگژە سیاسی و یاساییەیە كە هەرێمی كوردستانی پیایدا تێدەپەڕێت. ئەڵبەت ئەم بابەتە قسەی زۆر هەڵدەگرێت و ڕەگێكی قووڵی فەرهەنگیشی دێتە سەر .
بێباكی ئەو لایەنەی كە ئاستەنگەكەی دروستكردووە لەهەر لێكەوتەیەكی خراپی ئەم دۆخە، خاڵێكی دیكەیە و پێویستە زیاتر لە ڕەهەندە مێژوویەكەی وردبینەوە، چونكە ئەو لایەنە لە یەكەم هەڵبژاردنی ١٩٩٢-ە تا دواین هەڵبژاردنی پەرلەمانی كوردستان، هەر دوای پارتی بووەو یان ئەنجامی قەبووڵ نەكردوە، یان ئەگەر بەناچاریش پێی ڕازی بووبێت، ئاستەنگی بۆ دروست كردوە. ئاخر چۆن هێزێكی كوردستانی ڕێگە بەخۆی دەدات ڕیسك بەهەموو شتێكەوە بكات، هێندە بێباك بێت لەوەی لەئایندەدا چی ڕوودەدات باڕووبدات؟ ئەم بێدەربەستی و بێباكییە، گرێیەكی دەرونی گشتییە و، واپێناچێت بەمزوانەش چارەسەرێكی بنەبڕكاری بۆ بدۆزرێتەوە، چونكە لەبنەڕەتدا هەست ناكەن بەوەی نەخۆشییەكە درێژخایەنە.
لەوەش بترازێت، پارتی كە ئەركی گەورەی قەزیەی نەتەوەی كوردی لەسەر شانە، ئەگەرچی براوەی یەكەمیشە، لێ خۆی بە بەرپرسیار دەزانێت بەرانبەر ئێستا و ئایندی كورد و قەوارەی هەرێمی كوردستان، لەو سۆنگەیەوە لەبەر ڕۆشنایی دەستپێشخەری و ئامۆژگارییەكانی سەرۆك مەسعود بارزانیدا، شانی داوەتە ژێر هەڵساندنەوەی بەختی نەتەوەی كورد و، چاو لەمافەكانی خۆی و بەركەوتەكانی هەڵبژاردن وەك هێزی براوەی یەكەم ناكات، دیسانەوە لەچاوی باوكێكی میهرەبانەوە، مەزنتر بیردەكاتەوە.
وەك لە بەیاننامەكەی مەكتەبی سیاسیدا ئاشكرای كرد، دەڵێت: فەرموون با پەرلەمان كارا بكەینەوە. ئەو فەرمووە تەنها وشەیەكی سادە نیە، بەڵكو بازدانە بەسەر كۆمەڵێك كێشەی دەروونی گەورەدا، شكاندنی بەربەستە سیاسییەكان و، هەوڵێكی جدییە بۆ گۆڕینی هاوكێشەكان و، سەرلەنوێ دەستپێكردنەوەی پەیوەندییەكی سروشتی و وەك ئەوەی هەر پرۆسەیەكی سیاسی دەیخوازێت.
پارتی گوتی: هەموو كێشەكان لەناو هۆڵی پەرلەمان یەكلایی بكرێنەوە. ئەمەش ئەوپەڕی هۆشیاریی و بەرپرسیارێتی سیاسییە و، لەڕاستیشدا تاكە جێگایەك كە پێویستە ئەو پرسانەی تێدا یەكلایی بكرێتەوە، ناو هۆڵی پەرلەمانە نەك ئەو ناكۆكییە سیاسییانە داببەزنە نێو شەقام و، لە چایخانە و كۆڕ و كۆبوونەوەكانی هاووڵاتییانی سادەدا باس بكرێن، یان لە سۆشیالمیدیادا ناكۆكییەكە زیاتر قووڵ بكرێتەوە، بەبێ ئەوەی بڕیاری كۆتاییهأن بەو دۆسییەیە لە چایخانە و سۆشیالمیدیادا بێت.
جگە لەوەش ئەوەی پارتی دەیكات، تاقیكردنەوەیەكی توانا و متمانەی سەرجەم هێزەكانە بەخۆیان، هەمیشە دەبیستین پارتی دەڵێت: ژمارەی كورسی و توانای ڕاستەقینەی هەر حیزبێك لەپەرلەمان دەردەكەوێت. ئەمەش وەك بڵێیت سازكردنی گۆڕەپانێكی فراونە بۆ تاقیبوونەوەی توانا و سەنگی هەر حیزبێك، ئینجا پرسیارە سەرەكییەكە ئەوەیە: تۆ ئەگەر لەتوانای خۆت و ژمارەی كورسییەكانت دڵنیایت، ئەگەر ترسی ڕاستەقینەت نیە لەوەی پەرلەمانتارەكانت لێت جیاببنەوە، ئیتر بۆچی دەترسیت و، لەپێناوی چیدا ژیانی سیاسی و دامەزراوە یاساییەكانی كوردستان بە بارمتە دەگریت؟ فەرموو وەرە پەرلەمان و پرۆژە سیاسییەكانت تێپەڕێنە.
فەرمووەكەی پارتی
