بەرەو كوێ دەچین؟
هاودەنگ فارووق
ئەمڕۆ سەدوبیست و شەش ساڵ بەسەر دەرچوونی یەكەم ڕۆژنامەی دایك “كوردستان” تێپەردەبێت و، سی و سێساڵیش بەسەر دامەزراندنی دەیان ئۆرگان و دامەزراوەی ڕاگەیاندن و ڕۆژنامەوانی لە كوردستانی ئازاددا دەرباز دەبێت، چیمان كرد؟
پاش زیاتر لە سێ دەیە، ئێمەی میدیاكاری كوردستان، توانیمان سنوورەكانی هێڵی سووری نیشتمانی ڕەچاو بکەین و پارێزگاری بكەین؟ لەگەڵ سێ دەستەڵاتەكەی دیكەدا، دەستەڵاتی چوارەمی خۆمان سەلماند و بووینە هاوبەشێكی نیشتمانی، لە پاراستن و بەرپرسیاریەتیی ئەزموونی کوردستان و ڕۆحی بنیاتنان و پێشکەوتنی هەرێمەکەمان.
سی ساڵ کارکردنی ئازادانەی میدیای كوردی، توانیمان مرۆڤدۆستی، نەتەوەسازی و نیشتمانسازی بكەینە میحوەری سەرەكی كاری ڕۆژنامەنووسی لەسەر بنەمای متمانەو پیشەییبوون و ڕاستگۆیی.
ئەوەی تێبینی دەكرێت، سەرباری هەموو پێشكەوتنە تەكنیكییەكانی میدیای كوردی، سەرباری ئەوەی ئامرازەكانی میدیا كەوتوونەتە دەستی هەموو كەسێك، هاوكات میدیای وەڵاتانی دی بوونەتە بەشێك لەپێشەكەوتنەكانی وەڵات و نەتەوەكان. كەچی میدیای كوردی، ڕۆژنامەگەری لە پاشەكشەیەكی زۆر مەترسیداردایە. ڕەنگە زیادەڕەوی نەبێت ئەگەر بڵێین: میدیا له سەرەوەی هۆكارەكانی نائارامیی دەروونی هاووڵاتییان و، نائارامیی سیاسی و تەنانەت نائارامیی بازاڕیشە.
میدیای كوردی، بووەتە سەرچاوەی تێكدانی ڕەوتی لێكۆڵینەوەی دادگەكان، میدیای كوردی بەرلەوەی دۆسیەكان یەكلایی ببنەوە، زانیاری بڵاودەكەنەوە. لەجێگەیەكدا میدیاكار خۆی لێ دەبێتە پۆلیس و دادگە و لێكۆڵینەوە لە كێشەكان و دۆسییەكانی تاوان دەكات. لەلایەكەوە خۆی لێ دەبێتە مەرجەعیەتی یاسایی و نازناوو سیفەت دەبەخشێتەوە، بەئارەزووی خۆی سیفەتەكانی شۆڕشگێر و خائین و چاك و خراپ و لایەنی خێر و شەڕ دەبەخشێتەوە.. لەلایەكی دیكەوە، بەهەواڵی سەیر و سەمەرە، ئارامیی دەروونی و ئۆقرەیی بازاڕ تێكدەدات.
لەهەموو ئەوانەش قەباحەتتر، دەزگەی میدیای گەورەمان هەیە، ئیشوكاری بووەتە داتاشینی وشەو وئەتككردنی زمانی كوردی، بەبێ هیچ سەنەدێكی زمانەوانی، بەبێ هیچ خۆماندووكردنێک، ڕۆڵی ئەكادیمیای زمان دەبینن و، وشە دادەتاشن. دەیان وشەی سەقەتیان هێنانەوەتە سەر ڕووپەڕی میدیاو، كەسیش نییە لەم دۆخە شپرەز و پاشەگەردانییە بكۆڵێتەوەو، بیوەستێنێت.
ئەمساڵ لە كاتێكی هەستیاردایە كە سەندیكای ڕۆژنامەنووسانی كوردستان كۆنفرانسێكی گرنگ ساز دەكات، كاتی ئەوەیە بەخۆداچوونەوەیەكی ڕاستەقینە بكرێت، هەمواری یاسای كاری ڕۆژنامەنووسان بكرێتەوە، میدیاكان كە خۆیان بەدەستەڵاتی چوارەم دەزانن، پێویستە شەفافترین دەستەڵات بن و، ڕەخنە و بەخۆداچوونەوە قبووڵ بكەن. چونكە لێرەوە زۆرترین ڕەخنە لە دەستەڵاتەكانی دیكە دەگیرێت. بەڵام بۆیەكجاریش قبووڵ ناكەین ڕەخنە لەخۆمان بگیرێت و، هەر ڕەخنە و ڕێنماییەك ڕووبەڕوومان بكرێتەوە، دەیكەینە هەڵا گوایە ئازادیی ڕادەربڕین و ڕۆژنامەگەری لەهەرێمدا لەمەترسیدایە!.
سەندیكای ڕۆژنامەنووسان و وەزارەتی ڕۆشنبیری و بۆردی بەڕێوەبردنی كەناڵ و میدیاكان، پێویستە بۆ ئەو مەبەستە لەگەڵ لایەنە پەیوەندیدارە یاسایی و ئەمنییەكان لەسەر هێڵ بن و، ستراتیژێكی یەكگرتوو بۆ میدیا و ڕۆژنامەگەریی كوردی دابنێن، كە ئەم سێكتەرە گرنگە لەم هەموو قەیران و ژینگە نالەبارە ڕزگار بكات.