وەرگێڕان: شۆڕش غەفووری – هەولێر
(بێرت باکاراک ـ Burt Bacharach)، ئاوازدانەرێکی ناوداری ئەمریکییە کە دەستی لە ٧٣ گۆرانیی نێو لیستی “Top 40″ی ئەمریکا هەیە، لەم گفتوگۆیەیدا باس لەوە دەکات چۆن گۆرانی دەنووسێت!
ـ باسی پڕۆسەی نووسینی گۆرانییەکم بۆ بکە.
بێرت باکاراک: باشە. بە چەند ڕێگەیەکی جیاواز ئەم کارە دەکەم. یان تێکستەکەت لەبەردەستە و ئاوازەکەی بۆ دادەنێیت. وەک ئەو میوزیکاڵەی تازە نمایشی بەراییمان بۆ کرد؛ هەموو تێکستەکان پێشتر ئامادە بوون و من ئاوازەکەم بۆ دانان. یان گۆرانییەکی وەک (Alfie)، یەکەمجار تێکستەکە بوو چونکە دەبوو دەربارەی ناوەڕۆکی فیلمەکە بێت. بۆ مۆسیقارەکان، دەبێت زۆر بە نەرمی و بێ پچڕان لە دیالۆگەوە بچنە ناو مۆسیقاوە، بۆیە تێدەگەیت بۆچی باش نییە لەو جۆرە بارودۆخانە سەرەتا مۆسیقا بنووسرێت، بەڵام دەکرێت بە پێچەوانەشەوە بێت. دەکرێت ئاوازێکی سەرەکی یان میلۆدییەکت هەبێت بێ تێکست. تەنانەت ئەگەر بەو شێوەیەش بێت، ئەوا بەر لە دەستبەکاربوونم لەگەڵ هاوکارێیەکی تێکستنووسم کۆدەبمەوە و بە تێکستێکی کاتی و سەرەتایی دەستپێدەکەم. هەندێک وشە لە مێشکمدا دادەنێم ئیتر هەرچییەک بن. بۆ من زۆر گرنگە وشەم لەگەڵ بێت کاتێک لەبەردەم پیانۆکە دادەنیشم. دەبێت وشەکان لەگەڵ ئەو نۆتانەی دروستیان دەکەم، گونجاو بن. ئەوە زیاتر یارمەتیم دەدات وەک لەوەی تەنها گوێم لە پیانۆکە بێت. پێویستم بە شتێکە ڕێگەم نیشان بدات…
ـ لە هەر دانیشتنێکتدا چەند دەنووسیت؟
بێرت باکاراک: من نووسەرێکی خێرا نیم. هەرگیز وا نەبووم. ڕەنگە تێکەڵەیەک یان شتێکم دەستکەوێت، شتێکی سەرەتایی، بەڵام هەرگیز هەموو ڕۆژێک شتێکی نوێت دەست ناکەوێت. گرنگ ئەوەیە هەموو ڕۆژێک سەردانی شوێنی کارەکەت بکەیت، تەنانەت ئەگەر تەنها بۆ ڕاهێنانیش بێت، دەست لە پیانۆکە بدەیت و هەندێک ئاواز بژەنیت. پێویستە بەردەوام لە پەیوەندیدا بیت لەگەڵ مۆسیقا. من ئەمە وەک یاریزانێکی تێنس دەیچوێنم؛ تۆ ناتوانی سێ هەفتە پشوو وەربگریت و چاوەڕێ بیت لە خولی یەکەمی (ویمبڵدۆن – Wimbledon)یش سەرکەوتوو بیت، تێدەگەیت؟
ـ ئەگەر لە کاتی تۆمارکردن، هەستت کرد چەقیویت و بۆتنایێت، چ دەکەیت؟
بێرت باکاراک: تەنها هەوڵ دەدەم دووبارە پێیدا بچمەوە. پێشتر وام لێهاتووە. زۆربەی ئەو بەرهەمانەی خوڵقاندوومن، ئەوانەی کە بە تەواوی خۆم کردوومن – گۆرانییەکانم نووسیوە و دابەشکردنی ئۆرکێسترام بۆ کردوون – تیایاندا هەبووە کە ژوورێکی پڕ مۆسیقارم لە ستۆدیۆ کۆکردووەتەوە، کەچی چەقیوم و نەمزانیوە چۆن تەواوی بکەم. ئەوە خاڵی سەرەکییە، چونکە بەپێی ئەوەی لە ستۆدیۆ چی ڕوودەدات، گۆرانییەکە دەژی یان دەمرێت. ئەوە ساتەوەختی ڕاستی مردن و ژیانە. یان سەرکەوتوو دەبێت، کە ئەمەش واتە نزیککەوتنەوە لە دەنگ و ئۆرکێستراکە بە کامڵی.. هەرچەندە هەرگیز ناگەیتە ١٠٠٪، بەڵام تا دەکرێت لێی نزیک دەبیتەوە. کاتێک دەچەقم، بەو پێیەی من بەرپرسیارم لەوەی چۆن ئەو تۆمارە دەردەچێت، ئۆرکێستراکە ڕادەگرم و دەچم بۆ دەستشۆرەکە. لە ناو یەکێک لە کابینەکان، لەسەر تەوالێتەکە دادەنیشم و هەوڵ دەدەم هەموو نۆتەکان بە مێشکم ببیستم تا بزانم کێشەکە لە کوێیە. ئایا ئامێرە ژێدارەکان زۆر زوو لەرینەوە یان نا؟ لە مێشکی خۆم باشتر دەیبیستم، پاشان دەگەڕێمەوە ژووری کۆنتڕۆڵ و گوێ لە تۆمارەکە دەگرمەوە. ئەوە خێراترین ڕێگەیە. بۆ من کاریگەرە.
ـ ئایا هیچ خوویەکی تایبەت یان شێوازێکی جیاوازت هەیە لە کاتی نمایشکردن؟
بێرت باکاراک: سەرەتا کە دەستم بە نمایش کرد، زۆر شڵەژا بووم. من لە بواری میوزیک، لە پشت پەردەی نمایشکارانەوە گەورە بوومە. تا ئەو کاتەی خۆم دەستم بە نمایشی ڕاستەوخۆ نەکرد، هەرگیز نەچووبوومە پێشەوە. سەرەتا زۆر هەستم بە ناڕەحەتی دەکرد، بەتایبەت قسەکردن لەگەڵ جەماوەر. کەمێک شەرمن بووم. قسەکردن لەگەڵ خەڵک قورسە! ئێستا ئیتر قورس نییە، ماوەیەکی زۆرە دەیکەم. ڕەنگە هەندێک شەو قورستر بێت لە شەوانی تر. لە ساڵانی سەرەتا کاتێک لە (ڤێگاس – Vegas) وەک ئەستێرەی سەرەکی دەردەکەوتم، پێش ئەوەی بچمە سەر ستەیج کەمێک ویسکی (جاک دانیێڵز – Jack Daniel’s)م دەخواردەوە. ئێستا بیر لە شتی وا ناکەمەوە. ئەوە تەنها پاڵپشتێکی کاتی و لە قۆناغێکی دیاریکراوی ژیانم بوو.
ـ هیچ گۆرانییەک هەیە کە زۆر خۆشت بوێت و ئاوات بخوازیت تۆ نووسیبات؟
بێرت باکاراک: زۆر گۆرانی هەن کە ئاوات دەخوازم من نووسیبامن، وەک (ڤالانتاینە خۆشەکەی من – My Funny Valentine). دوو لە خۆشترین گۆرانییەکانی پۆپ لای من لە هەموو سەردەمەکان، (ئاین، شاخ نا، بەس بەرز – Ain’t No Mountain High Enough)ی (دایانا ڕۆس – Diana Ross) و (دوای ئەوەی خۆشەویستی ڕۆیشت – After the Love Has Gone)ی گرووپی (Earth، Wind & Fire)ن. بەڕاستی بێوێنەن.
ـ لە نێوان گۆرانییەکانی خۆت، هیچیەکیان لە هەموویان خۆشەویستترە؟
بێرت باکاراک: دەبێت بڵێم بۆ (Alfie)ی گرنگە؟ ئەویش لەبەر واتاکەی. دەتوانیت هەندێک دێڕی ئەو گۆرانییە دەربهێنیت و بیر بکەیتەوە و بڵەیت: وای ئەمە چەند بەمانایە! لەم سات و شوێنەی کە ئێستا تێیداین، ئایا ئێمە بۆ ئەوە دروست بووین زیاتر وەربگرین وەک لەوەی ببەخشین، یان لێرەین تا میهرەبان بین؟ ئاخۆ ئەوە ڕاست نییە؟
ـ تەواو ڕاستە. خوازیارم بۆچوونت بزانم لەسەر ئاوازدانانی دیجیتاڵی، کە ئێستا زۆر باوە، بۆ نموونە میوزیکی سەما. ئێستا خەڵکی هەر بە کۆمپیوتەرەکەیان دەتوانن میوزیک دابنێن.
بێرت باکاراک: ئەوە تەنها.. کار دەکات. ئەمە زۆر ورد نییە. ئەوانە گۆرانی پۆپی گەورە نین، میلۆدی گەورە نین. تەنها هەستێکی بچووکی تێدایە بۆ جۆش و خرۆش. ئەوانە شتی کلتوورین.
ـ باسی بەرنامەی بەیانیانت بکە.
بێرت باکاراک: ڕۆژانە لە ماڵەکەم لە لۆس ئەنجلس، سەعات ٩:٣٠ یان ١٠ لە خەو هەڵدەستم. هەموو ڕۆژێک وەرزش دەکەم؛ سێ ڕۆژی هەفتە لە هۆڵی وەرزش لەگەڵ ڕاهێنەرێک یاری ئاسن دەکەم، دوو ڕۆژیش لە مەلەوانگە لەگەڵ ڕاهێنەر مەلە دەکەم. کە لە گەشت و گەڕاندام وەک ئێستا، لەو هۆتێلانە دەمێنمەوە کە هۆڵی وەرزشییان هەیە و هەوڵ دەدەم جەستەم ڕێک بپارێزم. ئێستا نانی بەیانییەکەم گەیشت! واو! چەندین سەعاتە هەستاوم و هێشتا هیچم نەخواردووە. با بەم شێوەیە بڵێم.. من ئێستا لە ناو بەرنامەیەکی ئاساییدا نیم.
ـ ئایا هیچ سووکەژەمێکی دڵخوازت هەیە؟
بێرت باکاراک: سووکەژەمی دڵخواز، سووکەژەمی دڵخواز.. بەڵێ، زۆر حەزم لە توودڕکی بلووبێری و بلاکبێرییە. وەیتەرەکە تازە هەندێک بلاکبێری بۆ هێنام لەگەڵ هێلکە کوڵاو! خەریکە لە برسا دەمرم، شەش سەعاتە لەخەو هەستاوم.
ـ بێرت، نامەوێت لە نانی بەیانییەکەت داتببڕم.
بێرت باکاراک: خەمت نەبێت، بەردەوام بە.
ـ چی دەتخاتە پێکەنین؟
بێرت باکاراک: هەوڵ دەدەم لە هەموو شتێکدا کۆمیدیا ببینم. هەوڵ دەدەم لە هەموو شتێک بزە و ڕۆشنایی ببینم. هەوڵ دەدەم ئەوە لە ژیانی خێزانیمدا بچێنم، لەگەڵ منداڵەکانم. ئێرە جیهانێکی جددییە، بۆیە با ئاهەنگ بگێڕین بە خۆشی و گاڵتەوگەپ.
ـ ئایا هیچ باوەڕێکی خورافیت هەیە؟
بێرت باکاراک: بەڵێ، بەڵێ، بەڵێ. لە کاتی لەدایکبوونی کچەکەمدا هەمبوو، هەموو ڕۆژێک دەچوومە نەخۆشخانە، لە کاتێکی دیاریکراو، بە تەنیا. ئیتر فۆبیام نەما. کاتێک منداڵ بووم، دەبوو دڵنیا ببمەوە کە غازەکان سێ جار کوژێنراونەتەوە. شتی شێتانە. شوکر بۆ خودا لەو شتانە ڕزگارمان بوو. غاز و .. چیتر لەم جیهانەدا کات بەوەوە بەفیڕۆ ناچێت!
ـ ئایا ساتێکی دیاریکراو هەبووە کە هەستت کردبێت ئاوازدانەرێکی سەرکەوتوویت؟
بێرت باکاراک: ڕەنگە ئەو کاتەی (مایڵز دەیڤیس – Miles Davis) پێی گوتم: هەی پیاو، Alfie گۆرانییەکی زۆر باشە. بۆیە ئەگەر مایڵز دەیڤیس پێی گوتم گۆرانییەکی گەورەم نووسیوە، کەواتە هەموو شت لە جیهان باشە.
ـ حەز دەکەیت چی لەسەر کێلی قەبرەکەت بنووسرێت؟
بێرت باکاراک: “هەوڵی دا بێتە کەسێکی زۆر باش.”
ـ بڕۆ بە لای نانی بەیانییەکەتەوە، بێرت. زۆر سوپاس بۆ قسەکردن و وەڵامدانەوەت.
بێرت باکاراک: ڕۆژێکی خۆشت هەبێت!
تێبینی:
ئەم چاوپێکەوتنە کورت و دەستکاری کراوە.