وه‌رگێڕانی: خالید فاتیحی
چیرۆكی: عەزیز نەسین
بەشداری كردنی ژنان لەكایه‌ی كۆمەڵایەتیداو، هۆكاری لە خۆشبەختی خێزاندا یەكێكە لە بابه‌ته گرنگەكانی كۆمەڵگا. كە لایەنگر و بەرهەڵستكارێكی زۆریان هەیە. بەرهەڵستاران پێیانوایە (بەشداریكردنی ژن لەكاریه‌ی كۆمەڵایەتیدا، دەبێتە مایەی كێشەو ناخۆشی لەناو خێزاندا.)
قسە لەوە بێماناتر نابێ!
من دەتوانم پێچەوانەی ئەوە بسەلمێنم، باشترین بەڵگەشم ژیانی بەختەوەرانەی خۆمە.
لەوكاتەی دیموكراسییان هێناوەتە وه‌ڵاتی ئێمە، لە هەمان سۆنگەوە ڕۆژبەڕۆژ هەڵبژاردنی پارێزەر ئاسانتربووە، ژیان ئاڵۆزترو سەختتر بووە.
ئه‌وه بوو كاتێك بڕیارمدا ژن بێنم، خانمێكم هەڵبژارد كە كارمەندێكی بانك بوو. ئەو شەش سەد لیرە مووچەكەی بوو، منیش تەقریبەن شتێكی لەو شێوەیەم وەردەگرت، كە لە ڕۆژنامەیەكدا شەوانە كارمدەكرد. بەوشێوەیە گوشارێكی وای لەكۆڵ نەنام، ئەگەر هەردووكمان مووچەكەمان لەسەریەك دانابا، دەمانتوانی ژیانێكی تا ڕادەیەك باش بگوزەرێنین.
ئه‌و رۆژه‌ی كە دەمانویست زەماوەند بكەین، خێزانم مۆڵەتی لە بانك وەرگرت و منیش لەگەڵ ئەوەیدا شەوی پێشتر تا بەیانی كارمكردبوو، ئەو ڕۆژە نە خەوتم. بۆ پێكهێنانی ڕێوڕەسمی زەماوەند چوینە تۆمارگه‌ی هاوسەرگیری. بەدبەختانە كات و خۆشی من زۆر درێژەی نەكێشا، چونكە من شەوانە كارم دەكردو ناچاربووم چومەوە بارەگای ڕۆژنامە، ماندوومجرۆ تا بەیانی كارم كرد.
كاتێك گەڕامەوە ماڵێ، خێزانم چووبووە سەركارو نووسینێكی لەوبارەیەوە لەسەر دەرگای ژووری نووستن هەڵواسیبوو:
(هاوسەری خۆشەویستم، نەمتوانی ڕاوەستم تا دێیتەوە، دەوامم درەنگ دەبوو چاوەكانت ماچ دەكەم.)
لە خوێندنەوەی ئەو ڕستەیە، فرمێسكی شادی چاوەكانی پڕكردم، بەڵام بەڕادەیەك ماندوو و، بێتاقەت بووم لە چەند خوله‌كێك زیاتر نەمتوانی بیری لێ بكەمەوە و خه‌وم لێكه‌وت.
لەبەرئەوەی ماوەیەك لە دەوامی كارم تێپەڕیبوو، لە وه‌ڵامی هاوسه‌ره‌كه‌مدا، ئەوەم بۆ نووسی و لە هەمان شوێندا بۆم هەڵواسی:
(ئازیزەكەم بەو هەموو ئارەزوەی كە بۆ دیدارت هەمە، لەبەرئەوەی زۆر لەكاتم تێپەڕیوە، ناچارم بڕۆم، لێوەكانت ماچ دەكەم.)
بۆ بەیانیش یەكتریمان نەبینیی، هاوسەری خەیاڵم، دووبارە یادداشتێكی پڕماناو شیرنی بە سەر دەرگاكەوە هەڵواسیبوو:
(خۆشەویستەكەم! هەزار هەزار هەزار جار ماچت دەكەم.)
منیش وه‌ڵامەكەیم بە هەمان جێگاوە هەڵواسی:
(بەڵا بەدوور، نامەكەت گەیشت زۆر سوپاست دەكەم. بۆ ماچێكت سوێم بۆتەوە.)
لەوەبەدوا تەواوی ئەو هەفتەیە، بەهۆی نامەوە یەكتریمان ماچ دەكردو بە دنیایەك حەز و ئارەزوەوە، چاوەڕوانی ڕۆژی پشوومان دەكرد. دووبارە لە ڕۆژی یەكەمی هەفتەوە، ئەوینداری نووسینمان دەستی پێدەكردەوە. بەڵام هەر هەفتەیەو ڕستە كورترو كورتكراوەتر دەبوون. هەندێجاریش ئەو ئەركەمان لەبیر دەچووەوە؟
دوای سێ مانگ بەیانییەك كە گەڕامە ماڵێ، سەرنجمدا نامەیەكی درێژ لەسەر دەرگای ژووری نووستن هەڵواسرابوو. بەسەرسوڕمانەوە لێم كردەوە، دەستم كرد بە خوێندنەوەی:
(هاوسەری لە گیان خۆشەویستترم، حاڵم زۆرباشە دەمەوێ هەواڵێكی خۆشت پێبدەم، بە زوویی دەبینە خاوەن منداڵ. دەزانی لەمڕۆوە، ئەركی ئێمە زۆر سەختتر دەبێ. دەبێ لە ئێستاوە، زیاتر كاربكەین و سەعاتی بێكاری و هەتا ڕۆژانی پشووش بەفیڕۆ نەدەین. بیرت نەچێ من چاوەڕوانی نامەكانی تۆم، تەنیا بۆ تۆ.)
بە بیستنی ئەو هەواڵە، وەك هەر باوكێك خۆشحاڵ بووم، سەرەڕای ئەوەی زۆر ماندوو بووم چوومە بازاڕ، بازنەیەكی زێڕم بۆ كڕی. ئێوارە كاتێك دەچوومە سەركار یادداشتێكم نووسیو بە دەرگاوە هەڵم واسی: (فریشتەكەم لەڕادەبەدەر خۆشحاڵم، دیاریەكی بچكۆلەم بۆ داناوی لەژێر سەرینەكە دامناوە، هەزار هەزار جار ماچت دەكەم.)
بێگومان بە تێپەڕبوونی ڕۆژگار ژن و مێرد پێكەوە ڕادێن و سۆزدارییان بەرەبەرە كەم دەبێتەوە، ئێمەش كەمتر یەكتریمان بیردەكەوتەوە.. وردەوردە نامە نووسینی ئێمەش كۆتاییان هات. بەڵام گۆرەوی و ژێركراسە كانم هەموو هەفتەیەك، لەسەر مێز لە پەنا قەرەوێڵەكە ئامادەبوون. ئەوەش نیشانەی ئەوە بوو، خێزانم هەموو ڕۆژێك كە دێتە ماڵەوە كارەكانی رایی ده‌كات.
بەوشێوەیە ساڵانێكی زۆر لە ژیانی بەختەوەرانەی ئێمە تێپەڕی، بەبێ ئەوەی دەرفەتێكمان دەست كەوتبێ شەڕوهەرایەكمان بووبێ و بەهانە بە یەكتری بگرین.
ڕۆژێك كە زۆر ماندوو بووم، چووم بۆ سینەما لە هۆڵی سینەما ڕوداوێكی سەیرهاتە پێش. ئافرەتێكی جوان كە جلوبەرگێكی گرانبەهای پۆشیبوو و سێ منداڵی بچكۆلەی بەدواوە بوون، بەرەوڕووم دەهات و بەڕووخۆشییەوە سڵاوی كرد. دەستبەجێ تێكڕابووم. قیافەی زۆر ئاشنا دەهاتە بەرچاو، بەڵام نەمناسیه‌وه. لەسەروسەكوت و لە ئەبڵەق بوونی چاوەكانم مەسەلەكە تێگەیشت و گوتی:
-منم. خێزانت ئەوانەش منداڵە كانتن.
لە شەرمان سوورهەڵگەڕام. ئەگەرچی ناهەقیشم نەبوو، ژن و منداڵەكانم هیچ كاتێك ئاوا خاوێن و بە جلوبەرگەوە نەدیتبوون. ئێستا چەند ساڵ لەو ڕۆژە تێپەڕیون، ئێمە چەند منداڵێكی تریشمان هه‌ن، سوپاس بۆ خودا تا ئێستا بچوكترین ناكۆكیمان نەبووەو ژیانمان تێكنەچووە. چونكە بەهیچ جۆرێك كاتمان نەبووە، لەسەر بابەتێك گفتوگۆ بكەین.
لەكاتێكدا ئەگەر ژیانی هاوسەریم لەگەڵ ژنێك پێكهێنابا، بێكاربا، بێگومان هەر لەسەرەتاوە پرتەوبۆڵەو شەڕوهەرا دەستیپێدەكردو ژیانی ئێمە زۆر درێژەی نەدەكێشا.
ئەو تاقی كردنەوەیە باشترین بەڵگەیە، كە بەشداری كردنی ئافرەت لەكاریه‌ی كۆمەڵایەتیدا، هیچ كاتێك دژی بەختەوەری خێزانەكان نییە. بەڵكو تەنیا هۆكار پێكەوە بوون و مانەوەی خێزانەكانە، من ئەمڕۆ یەكێكم لە لایەنگرانی بەشداری كردنی ژنان، لەبەڕێوەبردنی كاریه‌ی كۆمەڵایەتیدا.
سەرچاوە: كۆمەڵە چیرۆكی (مردشرقی)