ئاسیا لقمان شاکر
مرۆڤ، ب تایبەت ئافرەت، وەسا هاتییە ئافراندن کو دلەکێ نازک هەبێت و بەردەوام یا هەستیار بیت. ل دۆر بابەتی باوەریێ، ئەگەر هەر مرۆڤەک باوەری ب خۆ نەبێت، دێ شکستێ ب دەست خۆ ڤە ئینیت و دێ کاریگەریێ ل دەوروبەرێن خۆ ژی کەت. ل سەر ڤی بابەتی، مە پڕسیار ژ مامۆستا و ڕێڤەبەرا قوتابخانەیا کچان کر، مامۆستا (هودا خورشید شکری).
مامۆستا هودا، دەرچووییا بەشێ (ماتماتیک-بیرکاری)یە، هەروەسا چالاکڤانەکا دیارە ل سەنتەرێ باژێرێ ئاکرێ و ڕێڤەبەرا قوتابخانەیا کچانە. ل سەر ڤی بابەتی دبێژیت: “باوەری ئێکە ژ وان سیفەتێن زیرەکی و بویریێ. ئەگەر مرۆڤ، ب تایبەت ئافرەت، باوەری ب خۆ و شیانێن خۆ نەبێت، چ جاران بلا چاڤەڕێی سەرکەفتنێ ل دەوروبەران نەبێت.” هەروەسا وەک مامۆستا و هەڤالەکا قوتابیان، ئامۆژگارییا وان دکەت، ب تایبەت ل دەمێ ئەزموونان، کو باوەری ب شیانێن خۆ هەبێت و چ جاران بێهیڤی نەبن.
دبێژیتە قوتابیان: “بلا بزانن ئافرەت ل هەر بەشەکێ کار بکەت دێ سەرکەفتنێ ب دەست خۆ ڤە ئینیت ئەگەر باوەری ب خۆ هەبێت. ئەز ڕۆژانە نموونەیا هندێ بۆ وان دئینم کو دەرگەهێن سەرکەفتنێ ژ باوەریێ دەست پێ دکەن. چ جاران تەمەن و باوەرنامە نابنە ڕێگر هندی باوەری نەبیتە ڕێگر؛ چونکی ئەگەر مرۆڤێ زیرەک و خودان باوەرنامە باوەری ب خۆ نەبێت، سەرناکەڤیت. پێش هەر کارەکێ، دڤێت باوەری ب خۆ هەبێت و چ جاران ب ئاخفتنێن دەوروبەران نەشکن.”
هەر ل سەر وی بابەتی، مە پڕسیار ژ کەسایەتییەکا دی کر کو ئەزموونا ژیانێ د باوەری ب خۆ بوونێدا هەیە، ئەو ژی (ئەیڤان لقمان شاکر)ە. ئەیڤان تەمەن ٢٩ ساڵە و ڕاهێنەرە ل بواری گەشەپێدانا مرۆیی، ب تایبەت ل بەشێ ڕاهێنەرێن سەرکردە.
ئەیڤان دبێژیت: “وەک دەستپێک، من خواندنا خۆ تمام نەکر بوو ژ بەر چەند ئەگەرەکان، چونکی من ب زمانێ عەرەبی دخواند. دەمێ من خواندن هێلای، من چ جاران هزر نەدکر کو دێ ڕۆژەکێ ب ئەگەرێ باوەری ب خۆ بوونێ دەرگەهێن کاری ل بەر من ڤەبن. ئەز نۆکە ل ڤی تەمەنی دووبارە دەست ب خواندنێ ب زمانێ دایکێ کرییە. بەرێ باوەرییا من ب هندێ نەبوو کو بشێم کار بکەم، چونکی دەوروبەران کاریگەری ل من دکر کو بێ باوەرنامە چێنابیت ببمە خودان کار. لێ ڕۆژەکێ من ڤیدیۆیەک ل سۆشیال میدیایێ دیت کو بەحسێ باوەری ب خۆ بوونێ دکر، من سۆز دا کار ل سەر خۆ بکەم. نۆکە سمینارێن هوشیاریێ پێشکێش دکەم، ب تایبەت ل سەر هندێ کو ئافرەت باوەری ب خۆ هەبێت. جەختێ ل سەر هندێ دکەم کو تە چەند باوەرنامە هەبن، ئەگەر باوەری ب خۆ نەبێت، پێش ناکەڤی. ئەڤڕۆ ئەز وەک ئافرەتەک دشێم ل ناڤ کۆمەڵگەهێدا باخڤم و کار بکەم، چونکی باوەری ب شیانێن خۆ هەیە.”
هەردوو مێڤانێن مە ل ژیانا خۆدا ئەزموونا باوەریێ هەبوو، لەوما ئەڤڕۆ خودان دەستکەفتن و سەرکەفتن دشێن دیار بکەن. ل دوماهیێ دخوازم ئاماژێ ب هندێ بدەم کو مرۆڤ چەند یێ مەزن بیت، بێ باوەری سەرناکەڤیت؛ ب تایبەت ئافرەت. هەر چێرۆکەکا سەرکەفتنێ چ ب باوەرنامە یان بێ باوەرنامە ب باوەری ب خۆ بوونێ دەست پێ دکەت تا دگەهیتە گۆپیتکا ئارمانجان.