ژیان جەمال یەعقووب
د دیرۆکا خەباتا گەلێ مە دا، ئافرەت هەمی دەمان ستوینەکا سەرەکی بوویە ل پشت سەرکەفتنان. لێ پرسیار ئەوە: بۆچی ئەڤرۆ، د ڤی سەردەمێ تەکنەلۆژیا و گوهۆڕینێن بلەز دا، هێشتا پێدڤی یە ئافرەت ببنە ئەندامێن ئێکەتیا ئافرەتێن کوردستانێ؟
بەرسڤ د چەند خاڵێن سەرەکی دا کورت دبیت:
١. ئێکەتی هێز و ڕێکخستنە
هەر کچەک یان ژنەک ب تەنێ دشێت خەونان ببینیت، لێ دەمێ دبنە ئەندام د ناڤ ڕێکخراوەکا خودان ئەزموون وەک “ئێکەتیا ئافرەتان”، ئەو خەون دبنە پڕۆژە و کارنامە. ئەندامبوون واتە پشکداربوون د هێزەکا جڤاکی یا مەزن دا، کو چ کەس نەشێن ب سادەیی پشتگوێ بکەن.
٢. پاراستنا مافێن یاسایی و جڤاکی
ئێکەتیا ئافرەتان تنێ ناڤەک نینە، بەلکو “پەرژانەکێ” یاسایی و جڤاکی یە. ئەندامبوون تێدا هۆشیارییەکا مەزن ددەتە ئافرەتێ دا کو مافێن خۆ بناسیت و ل هەمبەر هەر توندوتیژییەکێ یان بێدادییەکێ ب پشتەڤانییەکا بهێز ڕاوەستیت.
٣. پێشخستنا شیانان و سەرکردایەتی
ئەڤ ڕێکخراوە قوتابخانەیەکە بۆ ئاڤاکرنا کەسایەتییا ئافرەتێ. ل ڤێرە ئافرەت فێری ئاخفتنا گشتی، سیاسەت، کارامەیی، داهێنان و بڕێڤەبرنێ دبیت. ئەندامبوون دەرگەهەکی ل بەر کچان ڤەدکەت دا کو ژ چارچۆڤێ ناڤمالێ دەرکەڤن و ببنە بڕیاردەر د ناڤ جڤاکی دا.
٤. بەردەوامییا ڕێبازا پیرۆزا بارزانی
ئێکەتیا ئافرەتێن کوردستانێ بەرهەمێ هزرا پیرۆزا جەنابێ بارزانیێ نەمرە، کو باوەرییا تەمام ب شیانێن ئافرەتێ هەبوو. هەژی یە بێژین ئەڤ ڕێکخراوە ل وی دەمی هاتیە دامەزراندن، دەمێ جەنابێ بارزانی زانی کو پێشمەرگە و تفەنگ ب تنێ بەس نینن بۆ پاراستنا ناسناما کوردی و ئاخا پیرۆزا کوردستانێ؛ لەوما ئافرەت ژی کرە پشکەک ژ شۆڕەشێ، هەر ژ نانپاتنێ و پشتەڤانیێ هەتا پاراستنا نهێنیێن شۆڕەشگێران.
ئەندامبوون د ڤێ ڕێکخراوێ دا، وەفاداری یە بۆ وێ مێژوویا پڕی شانازی و بۆ وێ ڕێبازا کو ئافرەت کریە خودان ماف و بڕیار، و ژ ئازادییا ڕادەربڕینێ بێبەش نەکریە.
پەیاما من وەک ئەندامەکا ئێکەتیا ئافرەتان بۆ کچ و ژنێن دەڤەرا مە ئەوە:
ئەندامبوونا وە د ئێکەتیا ئافرەتێن کوردستانێ دا، تنێ ئیمزایەک نینە ل سەر ناسنامەیەکێ، بەلکو بڕیارەکە بۆ چەسپاندنا “هەبوونا وە” و “خورتکرنا پێگەهێ وە”.
وەرن دا پێکڤە ببینە هێزەک کو داهاتیێ کوردستانێ ب ڕەنگێ ئافرەتێن هۆشیار و سەرکردە بخەملینین. ل ژێر سیبەرا ئالایێ کوردستانێ و ئەو ئازادییا ئەڤرۆ بۆ مە بەرقەرار بووی، ب هزر و بیرێن وێ ڕێبازا پیرۆز خەباتێ بکەین بۆ کوردستانەکا سەربەست، کو ژن تێدا خودان بڕیار، سەرکردە و کارێزما بیت.