عەبدولقەهار هەولێری/هۆڵەندا
لە هەنگاوێکدا کە هەم سەرسووڕهێنەر و هەم بە دڵنەوایی بۆ هەزاران هاووڵاتی لە هۆڵەندا وەسف دەکرێت، حکوومەتی هۆڵەندا ڕایگەیاند ئەو کەسانەی بەهۆی هەڵە لە حیساباتی دامەزراوەی بیمەی کۆمەڵایەتی (UWV)دا بڕێکی زۆر لە یارمەتی بێکارییان وەرگرتووە، پێویست ناکات ئەو پارانە بگەڕێننەوە.
ئیدی ڤان هیگۆم، وەزیری کاتی کاروباری کۆمەڵایەتی و دامەزراندن لە بەیاننامەیەکی فەرمیدا گوتی: نامەوێت دڵەڕاوکێی زیاتر بۆ ئەو کەسانە دروست بکەم کە لە ئێستاوە لە دۆخێکی تەندروستی سەختدان.
هەڵەیەکی کارگێڕی بەربڵاو
ڕەگ و ڕیشەی قەیرانەکە دەگەڕێتەوە بۆ نزیکەی ساڵێک پێش ئێستا، کاتێک دەرکەوت کە UWV هەڵەی بەرچاوی کردووە لە حیسابکردنی یارمەتییەکان بۆ ئەو کەسانەی کە توانای کارکردنی بەشەکی یان تەواویان هەیە.
لەلایەکی دیکەوە حکوومەت دووپاتی کردەوە کە ئەو کەسانەی زیانیان بەرکەوتووە کە کەمتر لە شایستەی خۆیان وەرگرتووە، جیاوازییەکە وەردەگرن.
بەڵام وەزیرەکە خاڵێکی گرنگی خستەڕوو، ڕوونیکردەوە کە نایەوێت ئەم بڕە پارە زیادانە وەک داهات هەژماربکرێن، نەک کاریگەری نەرێنی لەسەر مافەکانیان هەبێت بۆ هاوکارییەکانی دیکە، وەک یارمەتییەکانی کرێ یان یارمەتییەکانی باج.
بڕیارە لە پاییزی ئەمساڵدا وەزیر ڕابگەیەنێت کە چۆن ئەم بڕیارە بە شێوەیەکی تەکنیکی و دادپەروەرانە جێبەجێ دەکرێت.