لە بەردەوامی کۆبوونەوەکانی لەگەڵ بەرپرسانی ئەوروپا، د. دلاوەر ئاژگەیی نوێنەری حکومەتی هەرێمی کوردستان لەگەڵ شاندێکی نوێنەرایەتی سەردانی پەرلەمانی ئەوروپای کرد و لەگەڵ جۆرجیانا تیۆدۆریسکۆ ئەندامی پەرلەمانی ئەوروپا کۆبۆوە.
دوایین پەرەسەندەکانی سیاسی ناوچەکە و ئاسایش لە هەرێمی کوردستان و ناوچەکە تەوەری سەرەکی دیدارەکە بوون کە نوێنەری حکومەت سیاسەت و تێروانینی حکومەتی هەرێمی کوردستانی لە سەر کۆی گشتی رووداوەکان شی کردەوە.
نوێنەری حکومەت داوای کرد کە لەو بارودۆخە و لە ئەگەری گۆرانکاری چاوەرواننەکراو لە ناوچەکە یەکێتی ئەوروپا بەردەوام بێت لە پشتگیری کردنی هەرێمی کوردستان کە فاکتەری ئاسایش و سەقامگیریە لە ناوچەکە و بروای بە چارەسەری کێشەکانە لە رێگەی ئاشتی و لێکتێگەیشتن.
لە لای خۆیەوە خاتوو جۆرجیانا پشتگیری تەواوی خۆی بۆ ئارامی و سەقامگیری هەرێمی کوردستان دووپاتکردەوە.
لە بەشێکی تری دیدارەکە پلان و پرۆژەی هاوبەش بۆ ئایندەی پەیوەندیەکان خرانەروو.
خاتوو جۆرجیانا دۆستێکی نزیکی گەلی کوردستانە و پێشتر سەردانی هەرێمی کوردستانی کردووە و لە پەرلەمانی ئەوروپا داکۆکیکارێکی بەهێزە بۆ پرسی کورد.