ژیان جەمال یەعقووب
بەعسییان دایکێن گوندێ مە ب زکگرانی جینۆساید کرن، دا کو نەژادێ کوردان ببرینن؛ بەڵێ وان نەزانی کو ل شوونا وان، هزار لاندکێن دی دێ بۆ ڕۆژا ئازادیێ هێنە هەژاندن.
ل ١٨ێ تەباخا ساڵا ١٩٦٩ێ، حکومەتا بەعس یا عێراقێ ب سیاسەتەکا هۆڤانە ڕابوو ب تۆپبارانکرن و کاڤلکرنا گوندێ “دەکان”. ئەڤ تاوانە ب هێجەتا کوردبوون و هەبوونا پێشمەرگەی د خەباتا سیاسی و بەرهەنگاربوونێدا هاتە ئەنجامدان. د ئەنجامدا، ٧٦ ژن و زارۆکێن سڤیل و بێگونەهـ، ب دڕندانەترین شێواز ب ئاگر و گۆڕیێ هاتنە سۆتن و بوونە ڕەژی. کارەسات ب ئاوایەکێ بوو کو هەستییێن وان ژی ژ ئێک جودا نەدبوونهڤە.
د وێ کارەساتێدا، شێرەژنەک ڕزگار بوو کو ٥٧ ساڵە ئاخینکێن چرکەساتیێن وێ تراژیدیایێ ڕادکێشیت، ئەو ژی (دایکا ئامینا عیسا)یە. مەرەم ژ ڤێ کۆمەڵکوژیێ، ب تایبەت ژناڤبرنا ژن و زارۆکان، قڕکرنا کوردان بوو ل ڤی گوندی و هەر شوونپێیەکا نەوەیێ کورد تێدا با.
ل گوندێ دەکان، “ئەنفالا لاندکێن ساڤا” هاتە ئەنجامدان، ژبەر کو بابێن وان پێشمەرگە بوون. ئەڤڕۆ د هەر مالەکا خەلکێ ڤی گوندی دا، پتر ژ دوو یان سێ پێشمەرگە ب ناڤێ کوردایەتیێ بەرگریێ ژ ڤێ ئاخێ دکەن.
ڤێ تاوانا کێم وێنە د مێژوویا مرۆڤایەتیێدا، وەسا ل من کر وەک نهڤیا شەهیدێن شکەفتا دەکان، ببمە دەنگێ حەقیقەتەکێ کو ب چو ئاگران ناهێتە سۆتن. ئەڤێ یەکێ بارێ مە گرانتر لێ کر وەک میراتگرێن خەباتا وان یا پڕ ژ دەردەسەری، دا کو ل سەر ڕێبازا وان بمینین و ببینە نوینەرێن دەنگێ مەزڵوومییا وان بۆ هەمی جیهانێ.
هەستا نەتەوەیی، نشتیمانپەروەری، قوربانیدان و خۆگۆریکرنا وان ئەز فێر کرم کا چەند یا ب زەحمەتە مرۆڤ ل پێناڤ ئارمانجێن بلنددا بژیت، و ببمە هەڵگرا پاشناڤەکی کو یێ پڕە ژ خەباتێ؛ سەروەتەک کو ب هەمی مالێ جیهانێ ناهێتە کڕین.
هزار سلاو ل گیانێ پاکێ ٧٦ شەهیدێن گوندێ من، “دەکان” و هەمی شەهیدێن کوردستانێ بن.
ئەی خواندەڤانێ ژ من دڵبکۆڤانتر، ئەڤ پارچە هەڵبەستە ژی پێشکێشی تە بیت:
ل بن سێبەرا دارزەیتوونان
ل بەر ترسا فڕۆکەیان
ل دەورێن سەرۆکانیان..!
دەستلەرزی و غارەغار بوو بەرەڤ شکەفتێ، ل ناڤا چیان
نالین و هەوار بوونە گازی
ئەز یا ل هیڤیا جانترین لاوێ دەکانیان
دا بهێت و من ڕزگار بکەت
من بگەهینیتە هیڤیان…
لێ من نەزانی دووکێلا ڕەش دێ هەوارێ ل من ببڕیت
دێ من کەتە دایک و ل سەر دارێ لاندکەکا ساڤا شەهید کەت
دێ من گۆری کورد و کوردستانێ کەت…!
بەعسییان دایکێن گوندێ مە ب زکگرانی جینۆساید کرن
