ئافرەت هێزا گوهۆڕینا جڤاکی یە

ئیمان سدیق
ئافرەت د هەمی جڤاکان (کۆمەلگەهان)دا بنچینەیا سەرەکی یا ژیانێ یە؛ ئەو نە بتنێ دایک و پەروەردەکارە، بەلکو پرەکا گرنگە د ڕێیا ئاڤاکرنا داهاتیێ نیشتمانی و پەرەدان ب هزرا نەتەوەیی و هێلانا پاشکۆیەکی مێژووییێ زێڕین بۆ نەوەیێن داهاتی.
ژبەر دابونەریت و تێکەلبوونا جڤاکان، ئافرەت ب شێوەیەکی گشتی ل سەرانسەری جیهانێ تووشی گەلەک ئاریشەیێن جڤاکی بووینە و بەردەوام پێکوڵا سەلماندنا تاکبوونا خۆ د جڤاکیدا کریە. هەلبەت گەلەک ئاستەنگی و ئالۆزی د ڕێیا واندا هەبووینە، لێ ئەڤە نەبووینە ئەگەر کو دەستبەرداری خەون و خەیالێن خۆ ببن، بەلکو بەردەوام پێکوڵ کرینە بگەهنە ماف و ئارمانجێن خۆ.
جهێ خۆشحالیێ یە کو د نوکەدا ئافرەتا کورد د ڤی چاخێ سەردەمیبوونا ژیانێدا، شیایە د هەمی بواراندا خۆ پێش بێخیت و دگەل پێشکەفتنێن جیهانا سەردەم بگونجینیت. هەروەسا شیایە ل ناڤەندێن بڕیارێدا جهێ خۆ بکەت و بڕیاردەر بیت ل سەر داهاتیێ خۆ و یێ نیشتمانێ خۆ، د بیاڤێن گرنگێن وەک: خواندن و پەروەردە، سیاسەت، میدیا، هونەر و هەروەسا بوونا بەشەک ژ داینەمۆیا ئابوورا وەلاتی، کو ئەڤە هەمی بۆ پێشکەفتنا وەلاتی د گرنگن. ل ڤێرە ئافرەتا مە شیایە ڕۆلەکێ باش ببینیت؛ ڕۆلێ حکومەتا مە ژی د ڕەخساندنا ڤێ ژینگەهێ بۆ ئافرەتێ، جهێ ئاماژێ و گرنگیدانێ یە.
هەبوونا ڤان هەمی پێشکەفتنان ل نک ئافرەتان، وێ چەندێ دگەهینیت کو ئەگەر دەرفەت ب ئافرەتێ بهێتە دان، دشێت گەلەک گوهۆڕینێن مەزن و گرنگ د هەر بوارەکی دا ئەنجام بدەت. لێ بەلێ هێشتا ژی هندەک ئاریشە هەنە، ئەڤجا چ سەرچاوەیێ وان نەریتێن کەڤن بن یان ئاستێ ڕەوشنبیریا تاکی بیت، گەلەک جاران ئافرەت تووشی بەربەستان دبن. بابەتەکی دن یێ گرنگ د ڕێیا پاشکەفتنا جڤاکیدا توندوتیژی ل دژی ئافرەتێ یە، کو دبیتە ئەگەر ئاستێ بەشداریا ئافرەتان د هەمی ناڤەندێن ژیانێدا پەرەسەندنێ ب خۆڤە نەبینیت.
یا گرنگە جڤاک هەمی، ب حکومەت و تاکێن خۆڤە، کار ل سەر فەراهەمکرنا ژینگەهەکا ساخلەم ل پێشیا ئافرەتان بکەت و ئافرەت ژی مینا ڕەگەزێ دن بهێتە دیتن. ئەگەر ئەم بەراوردیێ دناڤبەرا وان وەلاتێن پێشکەفتی و پاشکەفتیدا بکەین، دێ بینین کو ئەو وەلاتێن شیایین تا ڕادەیەکی بلند یەکسانیا جێندەری ئاڤا بکەن، شیاینە پێشکەفتنێن باش بخۆڤە ببینن. ئافرەت ژبەر تیژیا ژیریا خۆ یا هەستیار، زوو ل ئاریشەیان دگەهیت و دشێت پتر ژ چارەسەریەکێ بئافرینیت. ل ڤێرە بۆ مە دیار دبیت کو ئافرەت نە بتنێ پشکەکە ژ جڤاکی، بەلکو ئەو بناغێ هەرە گرنگە بۆ ئاڤاکرنا نەوەیەکی هۆشیار، نیشتمانپەروەر و ب هێز. پشتەڤانی ل ئافرەتێ، ئانکو پشتەڤانی ل داهاتییەکی باشتر و سەرکەفتیتر، چونکی ئافرەت هێزا سەرەکی یا گوهۆڕینا جڤاکی یە.