ئەمڕۆ یەکشەممە 25/10/2026، بە ئامادەبوونی ژمارەیەک لە بەرپرسانی باڵای حکوومەتی هەرێمی کوردستان و باڵیۆزی عومان لە عێراق، یەکەم گەشتی ئاسمانیی ڕاستەوخۆ لە نێوان فڕۆکەخانەی مەسقەتی پایتەختی عومان و فڕۆکەخانەی نێودەوڵەتیی هەولێر ئەنجام درا.
ئەم گەشتە لەلایەن هێڵی ئاسمانیی “سەلام ئێر” (SalamAir)ـی عومانییەوە ئەنجام دەدرێت و بەپێی بەرنامەی دانراو، بڕیارە هەفتانە دوو گەشتی چوون و هاتن لە نێوان هەردوو وڵاتدا ئەنجام بدرێت.
ئانۆ جەوهەر، وەزیری گواستنەوە و گەیاندن و سەفین دزەیی، بەرپرسی فەرمانگەی پەیوەندییەکانی دەرەوە، لەگەڵ سەرۆکی جێبەجێکاری کۆمپانیای سەلام ئێر پێشوازییان لە گەشتە دەستپێکییەکە کرد.
لەو بارەیەوە ئەحمەد هۆشیار، بەڕێوەبەری فڕۆکەخانەی نێودەوڵەتیی هەولێر ڕای گەیاند: “ئەمە پردێکی دیکەی ئاسمانییە کە هەرێمی کوردستان بە دونیای دەرەوە دەبەستێتەوە.”
بەگوتەی بەرپرسانی هەرێم، کردنەوەی ئەم هێڵە ئاسمانییە دەستپێکێکی نوێیە بۆ بەهێزکردنی پەیوەندییە ئابووری، بازرگانی و گەشتیارییەکانی نێوان هەرێمی کوردستان و وڵاتانی کەنداو، هاوکات ئاسانکارییەکی گەورە بۆ هاووڵاتییان و گەشتیاران لە نێوان هەردوو وڵاتدا دابین دەکات.