پاش دۆزینەوەی تەرمی (لاوەند خورشید)، یەکێک لە قوربانیانی ڕووداوە دڵتەزێنەکەی گەلی عەلی بەگ، مەلامستەفا بارزانی پەیوەندییەکی تەلەفۆنی لەگەڵ باوکی کۆچکردوو ئەنجامدا و هاوسۆزی و سەرەخۆشیی جەنابی سەرۆک بارزانی پێ گەیاندن.
لەو پەیوەندییە تەلەفۆنییەدا، مەلامستەفا بارزانی وێڕای گەیاندنی پەیامی هاوخەمیی جەنابی سەرۆک بارزانی، ڕایگەیاند: خۆمان بە هاوبەشی ڕاستەقینەی ئەم خەمە گەورەیە دەزانین. هەروەها دووپاتی کردەوە کە بە پەرۆشێکی زۆرەوە و لە نزیکەوە چاودێری هەوڵەکان بۆ دۆزینەوەی بێسەروشوێنبووانی تری ڕووداوەکە دەکەن.
هەر لە چوارچێوەی ئەو پەیوەندییەدا، مەلا مستەفا بارزانی ستایشی ماندووبوون و دڵسۆزیی تیمەکانی بەرگری شارستانی، لایەنە پەیوەندیدارەکانی ئیدارەی سەربەخۆی سۆران و هەموو ئەو خەڵکە خۆبەخشە نیشتمانپەروەرەی کرد کە لە ئەرکی گەڕان و دۆزینەوەی تەرمی لاوەند خورشید دا بەشداربوون.
لە کۆتاییدا، مەلامستەفا بارزانی جەختی لە دابینکردنی هەموو پشتیوانی و پێداویستییەک کردەوە بۆ خێراترکردن و چڕکردنەوەی پرۆسەی گەڕان بەدوای بێسەروشوێنبووانی تری ڕووداوەکە، بەو ئومێدەی لە نزیکترین کاتدا تەرمەکانیان بدۆزرێنەوە و خێزانەکانیان ئارام ببنەوە.