ئاریان دەرگەڵەیی – هەولێر
بەربژێری ژمارەی ١١ی لیستی ٢٧٥ی پارتی دیموكراتی كوردستان لە بازنەی هەولێر وەڵامی ئەو پرسیارە دەداتەوە كە بۆچی پێویستە داربەڕووەكەی كوردستان لە بەغدا هەمیشە بەهێز بێت و رایدەگەیەنێت كە دۆست و دژمن بە باشی پارتی دەناسن، ئەو حزبەیە كە سازش لەسەر قەوارەی كوردستان ناكات.
د. دانەر عەبدولغەفار، بەربژێری ژمارە ١١ی لیستی ٢٧٥ی پارتی لە بازنەی هەولێر كە بڕوانامەی دكتۆرای لە فەلسەفەی یاسا و ماستەریشی لە گرێبەستەكانی نەوت و غاز هەیە، لە دیمانەكیدا لەگەڵ (هەولێر) دەڵێت: پارتی بە پێچەوانەی گشت پارتەكانی تر، هەموان (چ دۆست و چ دژمن) بە باشی دەیناسن و بە هەڵوێست و ڕەفتارەكانی ئاشنان. تەنیا پارتێكە كە مكوڕە لەسەر كوردایەتی و پاراستنی قەوارەی هەرێمی كوردستان، سازش ناكات و ملكەچی ویست و خۆسەپاندنی ناڕەوای لایەنەكانی تر نابێت.
ئەم بەربژێری ژمارە ١١ی لیستی ٢٧٥ی پێی وایە كە پارتی پێیەكانی لەم خاكەدا چەقیوە و قایمە، لە ڕۆژە خۆش و ناخۆشەكاندا لێرە بووە و لەگەڵ گەلەكەیدا بووە. “
لە بەشێكی دیكەی قسەكانییشدا ئەو دەڵێت: ”گۆڕەپانی سیاسیی عێراق، بەهۆی زۆریی لایەنە دەسەڵاتدار و چەكدار و پارەدارەكان و قۆرخكردنی جومگەكانی دەسەڵات و ژیانی ئابووری لەلایەن ئەم لایەنانە، گۆڕەپانێكی مەترسیدارە. كێڵگەیەكی مینڕێژكراوە كە لە هەر كاتێكدا دەكرێت بتەقێتەوە و كارەسات دروست بكات. هەروەها، گۆڕانكاریی خێرا و لەناكاو لە گۆڕەپانی سیاسیی عێراقدا چاوەڕوانكراوە، لەوانەش گۆڕینی دەستوور، تێپەڕاندنی یاسای نەوت و گاز و داڕشتنەوەی پەیكەربەندی دادگای فیدراڵی. كورد و كوردستانیان لە هەموو كاتێك زیاتر پێویستییان بە داربەڕووەكەی كوردستانە تاكوو لەبەردەم باهۆز و ڕەشەبای ڕووداو و گۆڕانكارییەكانی بەغدا بە بەهێزی بمێنێتەوە و خۆڕاگر بێت و نەچەمێتەوە. “
ئەو بەربژێرەی پارتی جەختی كردووەتەوە: ”پارتی هەمیشە گوزارشتی لە ویستی هێز و خواستی نەچەمانەوە و سەرشۆڕنەكردن كردووە، بە پێچەوانەی لایەنەكانی تر كە بۆ مانەوەیان ناچارن سازش بكەن و خۆیان بۆ لایەنەكانی تر بچەمێننەوە، بۆ ئەوەی دەستیان لەسەر پشت دابنێن و پشتیوانییان بكەن. بۆیە هەمیشە بە لاواز و بێتوانا دەمێننەوە. ئەوان گوزارشت لە ویستێكی سازشكار و چەماوە دەكەن، ڕەنگیان لەم خاكەدا نییە، دەكرێت لە هەر كاتێكدا ڕەگیان هەڵبقەنرێت.
ئەو بەربژێرە گوتیشی: ”لە پەرلەمان و لە بەغدا، ئێمە پێویستیمان بە نوێنەرایەتییەكی بەهێزە كە نەچەمێتەوە و سازش نەكات. من وەك بەربژێرێكی پارتی، شانازی دەكەم بەوەی كە نوێنەری ئەم پارتەم. با پێكەوە داربەڕووەكەمان بە بەهێزی بهێڵینەوە. “
لە كۆتایی قسەكانیشدا گوتی : نەتەوەیەك سەدان ساڵ چەوسێندرابێتەوە، سەركوت كرابێت، گەلەكۆمەكێی لێ كرابێت، زمان و فەرهەنگ و كەلەپووری لێ قەدەغە كرابێت، نیشتمانەكەی بە خوێنی خەڵكەكەی دابەش كرابێت بۆ چوار پارچە، كتێبە كوردییەكانی لە ژێر گڵ و بن دیوار و بن دار شاردرابێتنەوە، هەموو چەكێكی كۆن و نوێ لە دژی بەكارهێنرابێت، دزێوێنرابێت، بە دێوەر دەورە درابێت و، هتد. بەڵام سەرەڕای هەموو ئەمانەش، هێشتا نەتەوەیەكین پڕین لە ویستی ژیان، خواستی مانەوە و نەبەزین، خەمڵاندنی ژیان و ئازارەكانی، ئاوازداركردنی خۆشی و ناسۆرییەكانمان. لە هەر كووچەیەك گوێ لە گۆرانییەكی كوردی دەگریت، ژێیەكانی ناخمان دەلەرێتەوە، یان دەكەوینە سەر پێ و هەڵدەپەڕین. شادبوون و ڕازیبوون بە خۆشی و ناخۆشییەكانی لە تەواوی زمان و فەرهەنگ و كەلەپوورمان ڕەنگ دەداتەوە. ئەمەیە كوردبوون و كوردستانیبوون، بۆیەش هەمیشە شانازی بكەن بە كوردبوون و كوردستانیبوون. سەرفراز بن بە زمان و فەرهەنگ و كەلەپووری كوردایەتی و كوردستانیبوون.