شاخەوان عەبدوڵڵا جێگری سەرۆکی پەرلەمانی عێراق، سەرپەرشتیی کۆبوونەوەیەکی فراوانی لێژنەی پەرلەمانیی ماددەی 140ـی بە ئامادەبوونی ئەندامانی لێژنەکە کرد کە تێیدا میوانداریی سەرۆکی شارەوانی قەزای شێخان و بەڕێوەبەری گشتی ڕەگەزنامەی باری شارستانیی و پاسپۆرت و نشینگە و فەرماندەی ئۆپەراسیۆنەکانی کەرکوک و فەرماندەی فیرقەی 11ی سوپا و بەڕێوەبەری کشتوکاڵی کەرکووک و جوتیارانی تۆپ زاوا کرا، لەو کۆبوونەوەیەدا بابەتەکانی پەیوەست بەفراوانکردنی کاری لێژنەکە و پرسی دابەشکردنی کارتی نیشتمانی بۆ هاووڵاتیان بەپێی تۆماریی ناوچەکانی خۆیان و چۆنیەتی چارەکردنی کێشەی جووتیاران و پێشێلکارییەکان لەسەر زەوی و پرسی گرێبەسته کشتوکاڵییەکان تاوتوێ کران.
شاخەوان عەبدولڵا جێگری سەرۆکی پەرلەمانی عێراق لە درێژەی قسەکانیدا، داوای لە لایەنە پەیوەندیدارەکان و وەزارەتەکان کرد، پابەند بن بە دەستوور و جێبەجێکردنی ماددەی 140، لەگەڵ چارەکردنی زیانەکانی سیاسەتی گۆڕانی دیمۆگرافی لە سەردەمی ڕژێمی پێشوودا، هاوکات ئاساییکردنەوەی بارودۆخی ناوچەکان و قەرەبووکردنەوەی زیانلێکەوتووەکان، لەگەڵ ئەوەشدا داوای بەدواداچوونی کرد بۆ کارەکانی لێژنەی حکوومەت و ڕێگەدان بە گەڕانەوەی مافەکان بۆ خاوەنە شەرعییەکانیان.