ناوی وانەبێژان بە مەبەستی کردنە گرێبەست لە ماوەی 7 ڕۆژدا بەرز دەکرێتەوە
لە نووسراوێکی فەرمیدا، وەزارەتی پەروەردەی حکومەتی هەرێمی کوردستان، داوای لە بەڕێوەبەرایەتییە گشتییەکانی پەروەردە کردووە، ناوی مامۆستایانی وانەبێژ بۆ مەبەستی کردنە گرێبەست لە ماوەی ٧ ڕۆژدا بنێرن.
لە نووسراوەکەدا کە ئیمزای ئالان حەمەسەعید، وەزیری پەروەردەی بەسەرەوەیە و ئەمڕۆ دووشەممە (٢٦ ی ئاب ٢٠٢٤) ئاراستە کراوە، هاتووە: بە فەرمانی مەسرور بارزانی، سەرۆکی حکومەتی هەرێمی کوردستان، وانەبێژانی دانەمەزراو لەسەر داهاتی ناوخۆ دەکرێنە گرێبەستی هەمیشەیی.
ئەوەش هاتووە: لە ماوەی ٧ ڕۆژدا، بەبێ کەموکوڕی و گرفت، لیستی ناوەکان بۆ وەزارەتی پەروەردە بەرز بکەنەوە.
ڕۆژی یەکشەممە (٢٥ ی ئابی ٢٠٢٤)، مەسرور بارزانی، سەرۆکی حکومەتی هەرێم، پێشوازی لە نوێنەری مامۆستایانی وانەبێژ کرد و بڕیاری دامەزراندنی بە گرێبەستی ئەو توێژەی دا، کە ژمارەیان ٣٨ هەزار مامۆستایە.
فەرمانگەی میدیا و زانیاری