بە گوژمەی ملیارێک و شەش سەد ملیۆن دینار پێنج گوندی کەلەکچی قیرتاو کران
بە گوژمەی ملیارێک و شەش سەد ملیۆن دینار، بە درێژاییی چواردە کیلۆمەتر، ڕێگای گوندی دەروێشان، ئافدەلی، تلجومل، زیناڤا کەڤن و گەرمکی بچووک، لە ناحییەی کەلەکچی قیرتاو کران.
هەڤاڵ محەممەد شەریف، بەڕێوەبەری ناحییەی کەلەکچییە و لەم بارەیەوە دەڵێت: “لە ماوەی ٥ ساڵی ڕابردوودا حکوومەتی هەرێمی کوردستان، چەندین پرۆژە و خزمەتگوزاریی جۆراوجۆر لە ناحییەی کەلەکچی و گوندەکانی سەر بەو ناحیەیە ئەنجام دراون. لەم ناحیەیە بە درێژاییی چواردە کیلۆمەتر، ڕێگای پێنج گوند قیرتاو کراون؛ کە خزمەتی هاووڵاتییانی ئەو گوندانە دەکەن و بە ناحییەی کەلەکچییان دەگەیەنن”.
هاووڵاتییانی ئەم پێنج گوندە و ناحییەی کەلەکچی سوپاسی حکوومەتی هەرێمی کوردستان دەکەن و زۆر دڵخۆشن بە ئاسانکاریی هاتووچۆ کردنیان بۆ ئەم گوندانە، بەهۆی قیرتاوکردنیان لەلایەن حکوومەتی هەرێمی کوردستان.
هاووڵاتییەکی ناحییەی کەلەکچی لەم بارەیەوە دەڵێت: “پێش قیرتاوکردنی ئەم ڕێگایانە هاتووچۆکردنمان زۆر ناخۆش بوو؛ نەماندەتوانی بە ئاسانی بچین بۆ ئەم گوندانە. سوپاسی حکوومەتی هەرێمی کوردستان دەکەین کە ڕێگای ئەم گوندانەی بۆ قیرتاو کردین، کە زیاتر لە ٨ گوند سوود لەم ڕێگا قیرتاو کراوانە بۆ هاتووچۆ وەردەگرن”.
حکوومەتی هەرێمی کوردستان بۆ باشترکردنی ژێرخانی کوردستان بەردەوامە لە گەیاندنی خزمەتگوزاری بۆ هەموو گوند و شار و شارۆچکە جیاوازەكانی هەرێمی کوردستان.
فەرمانگەی میدیا و زانیاری