پێکهاتەکانی هەرێمی کوردستان داوادەکەن فشار بخرێتە سەر دەسەڵاتدارانی عێراق، تاوەکو دەستوور جێبەجێبکەن، چونکە لابردنی کورسی کۆتاکان بڕیارێکی ستەمکارانەیە.
ئانۆ جەوهەر، نوێنەری کریستیانەکان لە کۆنگرەیەکی رۆژنامەوانیدا، سەبارەت بە بڕیارەکانی دادگای فیدراڵی، گوتی: لەبارەی بڕیارەکەی دادگای فیدراڵی کە 21ـی شوبات دەرچووە، کە ئاماژەی بەوەداوە بوونی کورسی کۆتاکان نا دەستوورییە لە پەرلەمانی کوردستان، هەروەها سەرجەم کورسییەکانی تورکمان، کلدان، ئاشوور، سریان و ئەرمەنەکانی هەڵپەساردووە.
گوتیشی: ئەو سکاڵایە لەلایەن یەکێتی نیشتیمانی کوردستان تۆمارکراوە، بۆیە ئەو بڕیارە بڕیارێکی ستەمکارانەیە، هەروەها تەقلیدیکی سیاسی کۆنە، دەشڵێت: لە ساڵی 1992ەوە کە پەرلەمانی کوردستان دامەزراوە، مافی سیاسی پێکهاتەکان دابین کراوە.
راشتگەیاند، لە دوای راپەڕینەوە هەوڵدراوە هەرێمی کوردستان ببێتە شوێنێکی ئارام بۆ پێکهاتەکان لەبەرانبەر ستەمکارییەکانی سەدام حوسێن دا، پێشتریش هەولێر بووەتە ئامانجی هەڕەشەکانی داعش، بۆیە بەهەمووان هەوڵی لەناو بردنی داعش دراوە، هەروەها بڕیارەکانی دادگای فیدراڵی بڕیارێکی ستەمکارانەن.
باسی لەوەشکرد، ئەو بڕیارانە لەبەرژەوەندی لایەنێکی دیاریکراودایە، لەسەر حسابی هەموو پێکهاتەکان، ئەمەش هەنگاوێکی هەڕەشەیە بۆ عێراق، کە دەبێتە هۆی پێشێلکردنی مافی تورکمانەکان و کریستییانەکان، ئەمەش هەوڵێکە بۆ گۆڕینی پەرلەمانی کوردستان لە فرەچەشنییەوە بۆ پەرلەمانێکی کوردی موسڵمان.
جەختیکردەوە، ئەو بڕیارەی دراوە بۆ وەلانانی کورسی کۆتاکان، نەفەسێکی کۆنە کە لەساڵانی رابردووش لە عێراقدا هەبووە، بۆیە “ئێمە وەکو نوێنەری تورکمان و کریستیانەکان داوادەکەین فشار بخرێتە سەر دەسەڵاتدارانی عێراق تاوەکو دەستوور جێبەجێبکەن و کودەتای لەسەر نەکرێت.
بەگوێرەى ماددەى 36ـی یاساى هەڵبژاردنى پەرلەمانى کوردستان، پێنج کورسی کۆتا بۆ کلدان، سریان و ئاشوورییه‌كان تەرخان كراوه، لەگەڵ یەک کورسی بۆ پێکهاتەى ئەرمەن و پێنج کورسیش بۆ تورکمانەکان.
رۆژی چوارشەممە (22ـی شوباتی 2024) دادگای فیدراڵی لە 12ـەمین دانیشتنیدا بریاری لەبارەی سکاڵاکەی یەکێتییەوەدا، بەپێی بریارەکە ژمارەی کورسی کۆتاکانی پەرلەمانی کوردستان هەڵوەشێنداریەوە و ژمارەی کورسییەکانی پەرلەمانی کوردستان لە 111ـەوە کەمکرایەوە بۆ 100 کورسی