سەدەیەک دڵڕەقی
هاودەنگ فارووق
ئاخروئۆخری ڕۆژانی ساڵی ٢٠٢٣ و لە ساتی ڕاگەیاندنی ئەنجامی هەڵبژاردنی پارێزگاكان لە كەركووك، گەنجێكی كورد كەوتە بەر هێرشی گەلەشۆڤێنییەكی دڵڕەق، لە سەر شەقامێکی گشتیی شار، بە لێدان و جنێو سوكایەتیپێكردن بەربوونە گیانی ئەو گەنجە، ئەویش بەوپەڕی ئیرادەی بەرزەوە وەك چیا لەبەر نەفرەتی ڕەفتاری دڕندانەدا بەپێوە ڕاوەستابوو.
ئاخر ئێمە پتر لەسەدەیەكە بە تۆبزی لە دەوڵەتێكدا بەناوی عێراق دەژین و بەردەوامیش لە سێبەری فەرهەنگی ترس و نەفرەتی نەتەوەی سەردەستەداین.
دوای سەد ساڵ ئەمەیە پەروەردەی تاك و عەوامی خەڵکی عێراقە لە دژی نەتەوەی كورد..
ئێمە هەموومان بەرلەوەی هەڵگری هەر ناسنامەیەكی نەتەوە و ئایین و ڕەنگێك بین، مرۆڤین، بۆیە مرۆڤ سەرباری جیاوازەكانیان دەبێ بەئاشتی پێكەوە بژین. ئەوە ڕێباز و پەیامی كوردە.
بەڵام ئایە پێكەوەژیان لەگەڵ ئەم فەرهەنگە شەڕەنگێزە دەگونجێت؟
بیهێنە بەرچاوی خۆت، ئەگەر گەنجێکی عەرەب بەم شێوەیە لە کوردستان هێرشی بکرێتە سەر، چاوەڕوانی چیمان لە کاردانەوەی خەڵکی عەرەب دەكرد؟
با ڕێگە نەدەین دووبەرەکی و هزری شۆڤێنیزم پەیوەندیی نێوان گەلانی ئاشتیخواز و پێكهاتەكانی كەركووك و وڵاتەكە تێك بدات، ئێمە هەمیشە بەرگری لە دۆزی ڕەوای خۆمان دەكەین .
گەنج و نەوەكانمان كە ئەم دڵڕەقییە لە نەتەوەی بەرانبەردا دەبینێ، بەدڵنیاییەوە باوەڕ بە هیچ قسەیەکی نەتەوەی سەردەستە ناكات و بگرە هەموو پەیامەکانی خۆشەویستی و دۆستایەتی و یەک نیشتمانی بە دروشمێکی ساختە و درۆین دەزانێت.
ئێستا تۆپەكە لە گۆڕەپانی نەتەوەی سەردەستدایە، ئەوان ئەگەر بیانەوێت هەموو گەلانی ناو چوارچێوەی دەوڵەتی عێراق و بەتایبەتی نەتەوەی كورد خۆیان بەخاوەنی ئەو دەوڵەتە بزانن و یان لانی كەم ئینتیمایان بۆ دروست ببێت، پێویستە لەسەرەتاوە پەروەردەی تاكەكانیان و فەرهەنگی مامەڵەیان لەگەڵ نەتەوەی كورددا بگۆڕن. لەبری ئەوەی پەلاماری گەنجی لە سەر شەقامەکاند بدەن و بەدروشمی ئاژاوەگێڕانە برەو بە ڕۆحی پێكدادان و یەكتر سڕینەوە بدەن، دەبێت ئەركی سەرلەنوێ دروستكردنەوەی ئەو عێراقە لەسەر ئەستۆی خۆیان هەڵبگرن كە ئەوان بەدەوڵەتی خۆیانی دەزانن و هەموو دەنگێكی كورد تۆمەتبار دەكەن بەوەی هەوڵی جیابوونەوە دەدات.
لەماوەی سەد ساڵی ڕابردوودا عێراقییەكان ئەوكارەیان نەكردووە، بەڵكو ڕۆژبەڕۆژ بەكردەوە و ڕەفتارەكانیان چ لەسەر ئاستی تاك، یان لەسەر ئاستی دامەزراوەكانی دەوڵەت، ئەو دیدگایە تۆختر دەكەنەوە كە عێراق بەوڵاتی خۆیان دەزانن و ئەوانی دی تەنانەت بەمیوانیش نازانن، چونكە کەس لە ماڵی خۆیدا پەلاماری میوان نادات!