سەرۆکی حکومەتی هەرێمی کوردستان لەمیانی رێورەسمی کردنەوەی کارگەی زۆم بۆ بەرهەمە شیرەمەنییەکان دووپاتیکردەوە، بەردەوام دەبن لە پشتگیریکردنی سێکتەری کشتوکاڵ و جووتیاران و بۆ ئەو مەبەستەش کاردەکەن لەسەر دروستکردنی چوار بەنداوی گەورە لە جگەلە سێکتەری کشتوکاڵ، بۆ بەرهەمهێنانی وزە و کەرتی گەشتوگوزار سوودی لێوەردەگیرێت.
لە سەرەتای گوتارەکەیدا، سەرۆکوەزیران مەسرور بارزانی دەستخۆشی کرد لە کردنەوەی کارگە و بە پرۆژەیەکی گرنگ و ستراتیژی بۆ ناوچەکە و هەرێمی کوردستان وەسفکرد.
سەرۆکی حکومەتی هەرێمی کوردستان ئاماژەی بەوەکرد، کردنەوەی کارگەی زۆم لە دەڤەری مێرگەسۆر کە پێشەنگ بووە لە خەبات و قوربانیدا کە چەندین داستانی لێ ئەنجامدراوە، زیاتر گوتی، ئەم کارگەیە دەبێتە هۆی بەرزکردنەوەی ئابووری ناوچەکە و هەرێمی کوردستان و خزمەتکردنی خەڵکی ناوچەکە.
سەرۆکوەزیران مەسرور بارزانی گوتی، ساڵی رابردوو سەردانی وەزارەتی کشتوکاڵم کرد و باسمان لە کار و پرۆژەکانی ئەو وەزارەتە کرد و ئاماژەمان بەوەکرد پێویستە ئەو پرۆژانە لە ناوچە گوندنشینەکان دروستبکرێت بۆ ئەوەی خەڵکی گوندەکان ناچارنەبن کۆچ بکەن بۆ شارەکان، کە یەکێک لەو پرۆژانە کارگەی شیرەمەنییەکان بوو.
ئاماژەی بەوەشدا، ئەم کارگەیە دەبێتە سەرچاوەی بژێوی خەڵکی ناوچەکە کە زیاتر لە 2700 خێزان لەم ناوچەیە دەژین و دەتوانن بەرهەمی ئاژەڵەکانیان ساغ بکەنەوە و سەرچاوەی داهات بێت بۆ بژێوی رۆژانەیان.
سەرۆکی حکومەتی هەرێمی کوردستان ئاماژەی بە گرنگی پاراستنی سرووشت و ژینگە کرد و باسی لە هەوڵەکانی کابینەکەی کرد لە شارەزایان و پسپۆران بۆ رووبەڕووبوونەوەی قەیرانی وشکەساڵی و پاراستنی سەرچاوەکانی ئاو و کەمکردنەوەی بەکارهێنانی ئاو.
سەرۆکوەزیران مەسرور بارزانی هانی هاووڵاتییانیدا بەرهەمی خۆماڵی بەکاربهێنن و داواشی لە خاوەن پرۆژەکان کرد کە لەسەر بەرهەمان ئاماژە بە جۆری بەرهەماکانیان بکەن بۆ هاووڵاتییان روونبکەنەوە، ئەگەر بەرهەمەکانیان سرووشتین بنووسن شیری سرووشتییە یاخود ئەگەر شیری تۆز بەکارهێنداوە بەهەمان شێوە بنووسرێت ئاماژەی پێبدرێت بۆ ئەوەی هاووڵاتییان لە بەکارهێنانیان دڵنیابن.
لەبارەی گرنگیدان بە پرۆژەکانی ئاژەڵداری، سەرۆکی حکومەتی هەرێمی کوردستان چەند ئامارێکی ئاشکراکرد کە لە کابینەی نۆیەمدا کاری بۆ کراوە و رایگەیاند، 75%ـی پرۆژەکانی بەخێوکردنی ئاژەڵی شیردەر زیادیکردووە کە لە 87 پرۆژەدا 14 هەزار و 609 سەر ئاژەڵی شیردەری مانگا تێدا بەخێودەکرێت.
هاوکات ئاماژەی بەوەشکرد 50%ـی پرۆژەکانی بەخێوکردنی ئاژەڵی گۆلک زیادیکردووە کە 100 پرۆژەی جۆراوجۆری لەخۆگرتووە و 78 هەزار 216 گۆلکی تێدا بەخێودەکرێت.
لەبارەی بەپیتی خاکی هەرێمی کوردستانیش بۆ کشتوکاڵ کردن، سەرۆکی حکومەتی هەرێمی کوردستان رایگەیاند، خاوەنی سرووشتێکی دەوڵەمەند و خاکێکی بەپیتین، کە ئەمەش دەتواندرێت ببێتە هۆی ئەوەی ئاسایشی خۆراکی خۆی ناوخۆ مسۆگەر بکات و پێداویستییە ناوخۆییەکان دابینبکرێت. گوتیشی، هەر ناوچەیەکی هەرێمی کوردستان تایبەتمەندی خۆی هەیە کە دەتواندرێت سوودی زیاتری لێوەربگیرێت بۆ بەرهەمی کشتوکاڵی، وەک گوێزی هەورامان، هەناری هەڵەبجە، گەنم و دانەوێڵە لە گەرمیان و شارەزوور، هەنجیری ئاکرێ و سێوی بەرواری باڵا هەیە.
سەرۆکی حکومەتی هەرێمی کوردستان روونیکردەوە، لە سەردانەکانیان بۆ دەرەوەی وڵات هەمیشە پرسیاری ئەوەمان کردووە کە چۆن بەرهەمی کشتوکاڵی زیاتر بکەین و کوالیتییان بەرزبکەینەوە و بازاڕی ناوخۆ و دەرەوەیان بۆ بدۆزینەوە، تیشکی خستە سەر هەناردەکردنی بەرهەمی خۆماڵی بۆ وڵاتانی کەنداو کە ئەمەش هاندەرێکی باش بوو بۆ بەرزکردنەوەی بەرهەمی خۆماڵی.
لە بەشێکی دیکەی قسەکانیدا سەرۆکوەزیران مەسرور بارزانی رایگەیاند چوار بەنداوی گەورە و لە قۆناغی لێکۆڵینەوەدایە و دەبێتە هۆی بەرەو پێشچوونی کەرتی کشتوکاڵ و بۆ بەرهەمهێنانی وزە و پێشخستنی کەرتی گەشتوگوزاریش سوودی دەبێت.
دەقی گوتارەکەی سەرۆکی حکومەتی هەرێمی کوردستان:
بەناوی خوای گەورە و میهرەبان
خوشك و برایانی هێژا
ئامادەبووانی قەدر گران:
گەلەك بەخێر بێن، سوپاس بۆ ئامادەبوونی ئێوە لێرە، من زۆر خۆشحاڵم كە ئەم پرۆژە مەزنە دەبینم كە گرنگە بۆ ئەم دەڤەرە و بەم شێوەیە هاتۆتە دروست كرد، دەستخۆشی لە جێبەجێكەرانی ئەم پڕۆژەیە دەكەم، كە بەڕاستی كارێكی زۆر جوانیان ئەنجام داوە.
دیارە ئەو دەڤەرە پێویستە بە هەموو جۆرێك پێشەنگ بێت. حەز دەكەم بزانن ئەو جێیەی ئەم كارگەیەی لێ دانراوە، هەمان ئەو جێیەیە كە چەندین داستانی لە دژی داگیركەر و زۆرداران كە هەوڵیانداوە كوردستان داگیر بكەن، تێیدا تۆمار كراوە، بە سەدان شەهید لەم دەڤەرە گیانیان بەخت کردووە. ئێستا ئەم كارگەیەی لێرە دانراوە، بۆ ئەوەیە جارێكی دیكە هەم سوودێكی زیاتر لە سرووشتی ژیانی ئەم دەڤەرە وەربگرن، هەم خزمەتی خەڵكی ئەم دەڤەرە بكەن و ئابووریی ناوچەكە و دەڤەرەكە، تاك و گوندنشینانی ئەم دەڤەرە پێش بخەن و بە شێوەیەكی گشتیی ئابووریی هەرێمی كوردستان بەرەوپێش ببەن. جێی دەستخۆشییە و من جارێكی دیكە دەستخۆشی لە ئێوە دەكەم.
پار لە ژمارەیەك سەردانی ئێمە بۆ چەندین وەزارەت ، سەردانی وەزارەتی كشتوكاڵیشمان كرد، لەوێ چەندین بەرنامەمان خستە نێو كارنامەی خۆمان لە حكومەت، بە سووپاسییەوە وەزارەتی كشتوكاڵ بەرنامەی خۆی جێبەجێ كرد، پاڵپشتییەكی زۆری حكومەتیان لەگەڵدا هەبوو، بەڵام ئەوانیش زۆر خۆیان ماندوو كرد. سوپاسی وەزیر و هەموو ستافی وەزارەتیش دەكەم كە پشتیوان بوون بۆ جێبەجێكردنی ئەو پرۆژانە.
بۆیە ئێمە داوامان كرد بۆ ئەوەی خەڵكی ئێمە لە گوندەكانەوە بەرەو شارەكان كۆچ نەکەن ،دەبێ هەوڵ بدەین پرۆژەكان بەرەو گوندەكان بگوازینەوە و ئەو پرۆژانەی پێویستن، لە گوندەكان دابمەزرێن تاوەكوو خەڵكی دەڤەری دوورەدەست و هەژارنشین و گوندنشین تێیدا سوودمەند بن، یەكێك لەو پرۆژانەی كە ئێمە ئەوكاتیش باسمان كرد، دانانی ئەم كارگەیەی شیرەمەندی بووە، لێرەش بینیمان زۆر بە ڕێك و پێكی و دوور و درێژی هاتە باسكردن كە بە چ شێوەیەك هاتە دانان و چەند خەڵك تێیدا سوودمەند بوون. جێی دەستخۆشییە كاتێك بینمان تاوەكوو 300 كەسیش دەبن پاش ئەوەی پرۆژەكە بە تەواوی كەوتە كار، دەبنە خاوەن كار لێرە، هەروەها زیاتر لە 2500 ماڵ لێرە دەژین، ئەو كەسانەی ئاژەڵیان هەیە و ئەو كەسەی شیری دەهێنێتە ئەم كارگەیە، دەبێتە رزقێك و سەرچاوەیەكی داهات بۆ ئەو بنەماڵانە.
گرنگیدان بە كشتوكاڵ لە بەرنامەی كابینەی حكومەتدا پێموایە دیارە و ئێمە گرنگییەكی زۆرمان پێ داوە، چونكە بە باوەڕی ئێمە كشتوكاڵ ئەساس و بناغەیە بۆ بوارەكانی دیكەی پێشخستنی ئابووری وەكوو پیشەسازی و بازرگانی یان هەر بابەتێكی دیكەی ئابووری، باوەڕ بكەن ئەساس و بناغەكەی پێشخستنی كەرتی كشتوكاڵییە.
سرووشتی ئێمە سرووشتێكی زۆر گونجاوە بۆ ئەوەی ئێمە سوودی لێ ببینین، لێرە پێویستە ئەوەشمان لەبیر نەچێت كە پێویستە زۆر گرنگی بە پاراستنی سرووشتی خۆمان بدەین، وێڕای ئەو پرۆژانەی كە ئێمە دروستیان دەكەین، بەڵام پاراستنی سرووشتەكەشمان زۆر گرنگە، لە هەمان كاتدا گرنگیدان بە پاراستنی ئاسایشی خواردن و ئاویش ئەركێكی سەرەكیی حكوومەت و هاووڵاتیانە.
لە ساڵی رابردوودا بەداخەوە لەبەر كەمئاوی، لە زۆر جێگەدا بێئاوی بوو، ئەو ئاوەی هەیە پێویستە ئێمە بە باشترین شێوە سوودی لێ وەربگرین، ئێمە لەگەڵ زۆر پسپۆڕدا گفتوگۆمان كرد كە چۆن دەتوانین باشترین سوود لەو ئاوە وەربگرین تاوەكوو ئاو بە خەسار نەدرێت و ئاوی ژێرزەوی بەفیڕۆ نەدرێت. ئێمە بەردەوام بووین و لە گفتوگۆدابووین لەگەڵ پسپۆڕانی ناوخۆ و وڵاتانی دۆستی ئێمە زۆریان پێشنیارمان كرد هاریكار بن، تاوەكوو ئێمە بتوانین بە باشترین شێوە سوود لە سرووشتی خۆمان و ئاوی خۆمان وەربگرین. ئەوەی لە هەموان گرنگترە ئەوەیە كە ئێمە بۆ دابینكردنی خواردنی هاووڵاتیانی هەرێمی كوردستان پشت بە خۆمان ببەستین و منەتمان بە كەس نەبێت و ناچار نەبین بكەوینە هیچ قەیرانێك ئەگەر خوانەخواستە دۆخەكە بەرەو خراپبوونیش بچێت.
ئەوەی گرنگە ئەوەیە كە حكومەت هەموو پشتیوانییەكی ئەم جۆرە پرۆژانە دەكات، بەڵام لە هەمانكاتدا پێویستە خاوەن پرۆژەكانیش هەوڵبدەن زیاتر بەرهەمی خۆماڵی بەكار بێنن، هەروەها ئەوەی دەیكەن بە درووستی بۆ هاووڵاتیانی ڕوون بكەنەوە. ئەگەر شیری سرووشتییە، ئەوەی كە پێی دەڵێن ئۆرگانیك، بنووسرێت و باس بکرێت، ئەگەر شیری تۆز هەیە و دەتانەوێ ئەو شیرە بدەنە ماركێت و بازاڕان، پێویستە بنووسن ئەمە شیری تۆزە تا هاووڵاتی بزانێت كامەی شیری ئۆرگانیك و دروستە و كامەی شیری تۆزە یان بۆ بابەتی تیجاری بەكار دەهێندرێت.
لێرەدا هەندێك ئامار هەن كە دەمەوێ ئاماژەیان پێ بدەم، لە میانی كابینەی نۆیەم ئەو پرۆژانەی كە لێرەدا زیادبوون لەبارەی ئاژەڵانی شیردەر لە هەرێمی كوردستان، 75% ئەم جۆرە پرۆژانە لە هەرێمی كوردستان زیاد كراون، 87 پرۆژە ئێستا لە سەرانسەری كوردستان هەیە كە بۆ بەخێوكردنی ئاژەڵ و مانگای شیردەر هەن كە ژمارەیان دەگاتە 14 هەزار و 609 مانگا لە هەموو هەرێمی كوردستان. پرۆژەی زیادكردنی گۆلك 150% زیادی كردووە، 100 پرۆژەی جۆراوجۆر لە سەرانسەری كوردستان هەن كە ئەویش 78 هەزار و 216 گۆلك هەن.
ئەمانە هەمووی نیشانەی ئەوەیە كە چەندە پەرەپێدان بە كەرتی كشتوكاڵی و كەرتی ئاژەڵی بەرەوپێش چووە. هەر جێگەیەكی كوردستان تایبەتمەندییەكی خۆی هەیە، هەر جێیەك دەتواندرێت بۆ بابەتێكی تایبەتیی كشتوكاڵی سوودی زیاتری لێ ببیندرێت. ئێستا هەورامان، گوێزی هەورامان هەیە، هەناری هەڵەبجە هەیە، گەنم و دانەوێڵە ناوچەی گەرمیان و شارەزوور هەیە، برنجی دەشتی نافكوڕ هەیە، هەنجیری ئاكرێ و بجیل هەیە، سێوی ناو بەرواری هەیە، هەنگوینی ناوچەی سیدەكان هەیە، هەر ناوچەیەك پێی دەكرێ پێی دەكرێ زیاتر گرنگی پێ بدرێ تاوەكوو ئەو بەرهەم و بەروبوومی ناوخۆیی ببنە داهاتێكی زیاتر بۆ خەڵكی ناوچەكە و بۆ پێشخستنی كەرتی كشتوكاڵی لە هەرێمی كوردستان.
لە سەردانەکانمان بۆ دەرەوە كاتێك دەچین لەگەڵ وڵاتانی دیكە قسە دەكەین، یەكێك لە خاڵە سەرەكییەكان ئەوە بووە كە ئەوان چۆن دەتوانن هاریكاریی ئێمە بكەن تاوەكوو ئێمە بەروبوومی كشتوكاڵیی ناوخۆیی خۆمان زیاتر بكەین و كوالێتییان باشتر بكەین و نرخ و تێچوونیشیان كەمتر بكەینەوە، لە هەمان كاتیشدا بازاڕێكی ناوخۆیی و بازاڕێكی دەرەوەش بۆ جووتیارانی خۆمان بێنین. سوپاس بۆ خوا ئێمە سەركەوتوو بووین، چەندین بەروبوومی ناوخۆیی پار هەناردە كرا بۆ چەندین وڵاتی كەنداو و تەنانەت بۆ ئەورووپاش، ئێمە بەنیازین ئەمساڵ و ساڵی داهاتووش ئەم بەروبوومانە زیاتر ببن و جۆری وانیش زیاتر ببێت و جۆری بەرهەمهێنانی ئەو بەرهەمانەی كوردستان بە جۆرێك بێت كە خەڵك زیاتر ڕووی تێ بكەن ئینشائەڵا.
ئێمە بۆ بابەتی ئاو، دیسان چەندین پرۆژەی دیكە هەن بۆ دروستكردنی بەنداو و پۆند، بەداخەوە بەنداو لە هەموو جێیەك دروست ناكرێت، دەبێت جێی جوگرافییان گونجاو بێت تاوەكوو ئێمە بتوانین ئەو بەنداوانە دروست بكەین، بەڵام چوار بەنداوی مەزن لە كوردستان لە هەموو پارێزگاكان دەستنیشان كراون، لە قۆناغی دیراسەكردندان و ئینشائەڵا ئەگەر تەواو ببێ و جێبەجێ بكرێن، هاریكارییەكی یەكجار زۆر دەبێت بۆ پێشخستنی كەرتی كشتوكاڵی، لە هەمان كاتدا دەتواندرێت هەندێك لەو بەنداوانە ڕەنگە بۆ وزەش بەكار بێن بۆ بەرهەمهێنانی كارەبا، بەڵام دیسان بۆ بابەتی گەشتوگوزاریش گەلەك گونجاو بن و دەكرێ ڕووبەرێكی زۆر بێنە بەكارهێنان بۆ پێشخستنی كەرتی گەشتوگوزاری.
ئێمە چەندین قەیرانمان تێپەڕاند، بەداخەوە بەڵام زۆر چانسمان نەبوو هەر لە دەستپێكی كابینەوە تاوەكوو ئێستا، بەڵام سوپاس بۆ خوا ئەو قەیرانانە تێپەڕێندران، ئینشائەڵا بە هاریكاریی هەموو لایەك و ئێوە و حكوومەتیش هاریكار بێت، ئینشائەڵا بەرەو ئاسۆیەكی ڕوونتریش هەنگاو دەنێین.
ئەوەی گرنگە ئێمە ئیرادەمان هەبێت و ئیرادەی خۆمان نەدۆڕێنین، پشت بە خۆمان ببەستین، كوردستان زۆر دەوڵەمەندە، هەم سرووشتەكەی و هەم خەڵكەكەی، سامانە سرووشتییەكانی گەلێك دەوڵەمەندە، ئێمە پێمان دەكرێ زۆر زیاتر سوود لە سرووشتی خۆمان و ئەو شتانە وەربگرین بۆ ئەوەی ببێتە خێر و بەرەكەت و بەرهەمێك بۆ ژیاندن و پێشخستنی وڵاتی ئێمەش.
لەسەر دۆخی ئێمە لەگەڵ حكوومەتی فیدرالی، دەمەوێ چەند قسەیەك بكەم، ئەویش ئێوە دەزانن پێش ماوەیەك، ئێمە ڕێككەوتنێكمان لەگەڵ حكومەتی فیدرالی و لەگەڵ بەڕێز سەرۆك وەزیران كرد بۆ ئەوەی ئەو كێشانەی ماون لە نێوان بەغدا و هەولێر بێنە چارەسەر كردن، هەندێك لەوانە لەسەر نەوت و غاز و لەسەر بودجە و بابەتی ناوچە كێشەلەسەرەكان، ئێمە گەیشتینە چەندین ڕێككەوتن، بەڵام بەداخەوە دیسان چەندین بابەتی دیكەی یاساییان هێنایە پێش و بەربەستیان بۆ جێبەجێكردنی ئەو ڕێككەوتنە دروست كرد.
بەداخەوە پێش چەند ڕۆژێكیش چەند كەسێك لە لێژنەی دارایی هەندێك خاڵیان هێناوەتە پێش كە بەحەقیقەت ئەگەر جێبەجێ بكرێن، زەرەر و زیانێكی زۆر گەورە بە خەڵكی كوردستان دەكەوێت، ئەو خاڵانەش دەستووری نین و بەشێكیش نین لەو ڕێككەوتنەی كە ئێمە لەگەڵ حكوومەتی فیدرالی هەمانە، لەبەر ئەوە ئێمە داكۆكی لەو رێككەوتنە دەكەین كە لەگەڵ سەرۆك وەزیران هەمانە و بەهیچ شێوەیەكیش ئێمە سازش لەسەر ماف و هەقی میللەتی خۆمان ناكەین. ئێمە ئامادەین گفتوگۆ بكەین و بگەینە ڕێككەوتنێك كە لە بەرژەوەندیی هەموو لایەكدا بێت، بەڵام هەقیقەت ئەو مافانەی كە لە دەستووردا بۆ میللەتی ئێمە هاتۆتە دیاریكردن، ئێمە بە هیچ جۆرێك سازشی لەسەر ناكەین، گفتوگۆش بەردەوامن و دڵنیاش بن ئینشائەڵا ئەوە دەبێت كە خێری میللەتی ئێمەی تێدایە.
بابەتی پاشەكەوتی مووچە زۆرجار باس دەکرێت، حەز دەكەم بزانن كە هۆكاری سەرەكیی پاشەكەوتكردنی مووچە بەغدا بووە و حكومەتی هەرێم نەبووە، بەغدا بووە كە بودجەی هەرێمی بڕیووە، بۆیە هەرێم ناچار بووە هەندێك پارەی قەرز كردووە یانیش چەندین جاریش نەیانتوانیوە مووچە بدەن یان نیوەیان داوە، هەرچەندە ئێمە لەم كابینەیە، هەموو مووچەی خۆمان داوە، ڕاستە ئێمە رەنگە مانگێك دواكەوتبین بەڵام هەموو مووچەكانمان داوە، سەرەڕای ئەوەش، ئەو پاشەكەوتی مووچەیە كە باسی دەكەن، قەرزێكە لەسەر حكومەتی عێراق، كاتێك ئێستا دێتە باس كردن، پێویستە ئەو پاشەكەوتی مووچەیە بۆ خەڵك بگەڕێندرێتەوە، راستە هەموو خەڵك و ئێمە هەموو وا دەڵێین و حكومەتیش وادەڵێت، بەڵام ئەم شتە بە موزایەدە ناكرێ، پێویستە ئەو پارەیە لەلایەن حكومەتی عێراقەوە بۆ خەڵكی هەرێمی كوردستان دابین بكرێت تاوەكوو ئەو پاشەكەوتی مووچەیە جارێكی دیكە بۆ خەڵك خەرج بكرێت، ئەگەر مەبەستیش ئەوەیە ئەو پارەیە لە بەشی هەرێمی كوردستانەوە بدرێت، من پێویستیم نە بە بڕیاری حكومەتی عێراق هەیە و نە ئێمە پێویستیمان بە چ بڕیاری دیكەش هەیە، ئێمە خۆمان زیاتر لە هەر خەڵكێكی دیكە، لە خەمی خەڵكی خۆمانین، دڵنیاش بن حەزناكەین هیچ كەسێكی ئێمە، هیچ هاووڵاتییەكی كوردستان لە هەق و مافی خۆیان بێبەش بن، لەبەر ئەوە ئێمە بەردەوام دەبین بۆ ئەوەی شایستەی دارایی هەرێمی كوردستان لە حكومەتی فیدرالی دەستەبەر بكەین. بەڵام لێرەش دیسان جارێكی دیكە دەيڵێمەوە كە دروستكردنی كارگە و زیادكردنی داهاتی ناوخۆیی، دەبێتە هۆكاری سەرەكی بۆ ئەوەی ئێمە زیاتر پشت بە خۆمان ببەستین و منەتمان بە خەڵكی دیكە نەبێت.
جارێكی دیكە دەستخۆشی لە ئێوە دەكەم، ئینشائەڵا هەر سەركەوتوو دەبن و كوردستانیش هەر ئاوەدان دەبێت.
پڕۆژەی کارگەی زۆم لە دوو بەشی سەرەکی پێکدێت کە بریتین کە کارگەی زۆم بۆ بەرهەمە شیرەمەنییەکان و هەروەها بنکەکانی کۆکردنەوەی بەروبوومی ئاژەڵداران و جووتیاران.
لە ئێستادا 12 بنکە تەواو کراون و بەرهەم وەردەگرن، هەشت بنکەی نوێش لە قۆناغی جێبەجێکردن دان، لە ئایندەش بنکەی تر بە گوێرەی پێویستی کارگە زیاد دەکرێن.
شوێنی کارگە دەکەوێتە گوندی ژاژوک لە سنووری قەزای مێرگەسۆر، پڕۆژەکە لەسەر رووبەری 13 هەزار و 46 مەتر دووجا دروستکراوە.
هەروەها قەبارەی بەرهەمهێنان لە کارگەکە 20 تۆنە لە رۆژێکدا، توانای هەیە بگاتە 50 تۆن و هەموو ئامێرەکانی ناو کارگە لە باشترین جۆری (Stain less steel) دروستکراون.
هاوکات لەناو کارگەدا تاقیگەی تایبەت هەیە بۆ پشکنینی شیر و دڵنیابوون لە کوالێتی ئەو شیرەی کە دەگاتە کارگە و ئەو بەرهەمانەی لە کارگە بەرهەم دێت.
لە ماوەی جێبەجێکردنی پڕۆژەکە بە تێکڕا رۆژانە 80 کەس بۆ ماوەی زیاتر لە ساڵێک کاریان لەو پڕۆژەیەدا کردووە و دەبێتە هۆی رەخساندنی زیاتر لە 300 دەرفەتی کاری دیکەش، هەروەها زیاتر دوو هەزار و 700 خێزانی ناوچەکەش تێیدا سوودمەند دەبن.
بەرهەمەکانی کارگەی زۆم بریتین لە ماستی سروشتی و خۆماڵی زۆم، ماستی سروشتی و خۆماڵی کەم چەوری زۆم، ماستاوی سروشتی و خۆماڵی زۆم، پەنیری سپی سروشتی و خۆماڵی زۆم، پەنیری سپی سروشتی و خۆمالێ کەم چەوری زۆم و قەیماغی لوولپێچی سروشتی و خۆماڵی زۆم.
ئەم کارگەیە لە ساڵی 2020 لەلایەن سەرۆک بارزانییەوە بەردی بناغەی بۆ دانراوە و ئەمڕۆ لەلایەن سەرۆکی حکومەتی هەرێمی کوردستانەوە بە فەرمی کرایەوە.
ئامانجەکانی کارگەی شیرەمەنی زۆم:
1. دابینکردنی داهاتێکی بەردەوام بۆ گوندنشینان و ئاژەڵداران لە رێگەی کڕینی شیری ئاژەڵەکانیان کە کۆدەکرێتەوە لە 20 بنکەی کۆکردنەوە کە لەلایەن کارگەی زۆم دروستکروان.
2. هاندەرێک دەبێت بۆ زیادبوونی ژمارەی بەخێوکەرانی ئاژەڵ، بە شێوەیەک کە لە کاتی کارکردنی کارگە بە تەواوی تواناکەی زیاتر لە 27 هەزار هاوبەش لەگەڵماندا سوودمەند دەبن بە فرۆشتنی شیری تازەی مانگاکانیان لە بنکەکان.
3. رەخساندنی هەلی کار: بۆ دابینکردنی بەرهەمێکی تەندروست و سروشتی بۆ هاووڵاتییان، لە ئێستادا کارگەی زۆم بە شێوەیەکی راستەوخۆ هەلی کاری بۆ 100 هاووڵاتیی ناوچەکە رەخساندووە و ئەم ژمارەیە بەرەو هەڵکشان دەڕوات. سەرەڕای ئەوەی کارگەکە بە شێوەیەکی ناڕاستەوخۆ هەلی کاری بۆ زیاتر لە دوو هەزار و 700 ئاژەڵدار رەخساندووە لە ڕێگەی کڕینی شیری مانگەکانیان.
4. بەرهەمەکانی زۆم کاریگەرییەکی باشی دەبێت لە نەچوونی سەرمایەی ناوخۆ بۆ دەرەوە لە رێگەی هاوردەکردن. بەهۆی کۆمپانیان زۆو و کاری هاوشێوە، ئەو سەرمایەیە لە ناوخۆدا مامەڵەی پێدەکرێت و ئەمەش دەبێتە هۆی بووژانەوەی ئابووری وڵات.
بۆ ئەوەی خەرجی گواستنەوەی شیر نەکەوێتە سەر ئەستۆی جووتیاران، کارگەی زۆم هەڵساوە بە دروستکردنی 20 بنکەی شیر کە بەپێی سنووری جۆگرافیایی ناوچەکە دانراون. رۆژانە جووتیار و ئاژەڵدارانی ناوچەکە دوای دۆشینی مانگەکانیان، شیری تازە لە ناو دەفری تایبەت دەگەیننە بنکەکان. شیری تازە لە جووتیاران دەکڕدرێت، پشکینینی بۆ دەکرێت و پاشان بەڕێگای تانکەری تایبەت دەنێردرێتە کارگە. دوای دووبارە پشکینینی شیرەکە بەرهەمەکانی لێ دروست دەکرێت و لە رێگەی ئۆتۆمبێلی تایبەت رەوانەی شار و شارۆچکەکان دەکرێت.