بدە لە هەولێر، داوتە لەكورد

مەشخەڵ كەوڵۆسی
كاتێ ئوسامە بن لادن ویستی لە قووڵاییدا بدات لە سیستەمی سەرمایەداری، چی كرد؟ بەگوێرەی دانپێدانانەكانی كەسانی ئاگاداری ڕووداوەكەی 11ی سێپەتەمبەر، ئوسامە گوتەیەكی بەناوبانگی هەیە كە هەمیشە دەگوترێتەوە و لەكاتی پلاندانان بۆ كارەكە گوتویەتی: بدە لە ڕەمزەكانی سەرمایەداری، باشترین و دیارترین ڕەمزی سەرمایەداری سەردەم، بریتییە لە قوولەی سەنتەری بازرگانی جیهانی.
سەنتەری بازرگانی جیهانی، سیمبولی جوڵەی سەرمایەداری ڕۆژئاوایە، كاتێ هێرش بكرێتە سەر ئەو قوولەیە، زۆر بەخێرایی پەیامەكان دەگات و، سەرمایەداری ڕۆژئاوا لەهەردوو ئاستی ئابووری و پڕوپاگەندەییەوە دووچاری ئاستەنگی ڕاستەوخۆو دەستبەجێ دەبێتەوە.
هەرواش دەرچوو، كاتێ ئەو دوو قوولەیە كرانە ئامانج، بەشێوەیەكی ئۆتۆماتیكی هەموو شتێك گۆڕا. تەنانەت جیهانی مۆێرنی ڕۆژئاوا، هەموو چەمكەكانی سەردەمی نوێ، كەوتنە بەر سەرلەنوێ دیزانیكردنەوەو، تەنانەت خودی ژیانی مەدەنیەتی سەدان ساڵەی ڕۆژئاوا، بەرگری عەسكەرتارییەتی لەبەركرد.
مەبەست لەم چەند دێڕە، ڕێخۆشكردن بوو بۆ ئاماژەدان بەخاڵێك كە دەمەوێت لێرەدا جەختی لێ بكەمەوە. ئەویش ئەوەیە بەئامانجگرتنی هەولێر، مەسەلەیەكی سیمبولییە. مادەم هەولێر یەكەم و تاكە پایتەختی قەوارەیەكی یاساییە كە كورد خاوەنییەتی، ئیتر بەوحوكمە دەبێت چاوەڕوان بین هەموو ئەو سیاسەت و ئایدۆلۆژیا و گروپ و بەرژەوەندییانەی كە هەبوونی خۆیان لە نەبوونی كورددا دەبینن، هەولێر دەكەنە ئامانج. جارێك بەدرۆن، جارێك بە موشەك و جارێك بە گەمارۆی ئابووری و جارێك بەدروستكردنی فەوزای میدیایی و سیاسی.
لەچركەساتی پلاندانان بۆ هەركارێكی تیرۆریستی كە بیانەوێت لەقووڵاییدا گورز لە هەیبەت و شكۆو سیاسەت و ئایندەی كورد بدەن، دیارترین سیمبول دەستنیشان دەكەن. ئەوە ڕاستییەكە و هەموو ئەو كەسانەی كەلە پلاندانانی ستراتیژی شارەزان، تێدەگەن كە مەبەستەكە لەچییە و گرنگی و بایەخی سیمبول لەو پەلامارانەدا چین.
پایتەخت هەم قورسایی یاسایی هەیە، هەم قورسایی سیاسی و پڕوپاگەندەیی هەیە. سەنتەری هەموو چالاكییەكانی كۆمەڵگەی كوردییە، شاڕێگە و شادەماری پەیوەست بوونی كوردە بەدنیای دەرەوە. لەهەولێر هەموو سەلیقەی مرۆڤی كورد كۆدەبێتەوە. لەم سەدەیەدا ئەوەی لەهەولێر هەیە، دوا ئەنجام و دوا تەجەلای سەلیقە و لێزانی و ئەدای كوردە.
باشە ئەگەر تیرۆریست و دوژمنانی كورد، لەهەولێر نەدەن، ئەبێ لەكوێ بدەن؟ كوێ لەهەولێر گرنگترە بۆ ئەوەی لەقووڵاییەوە ئازاری كوردی پێ بدەن؟.
دوژمنانی كورد، تیرۆریست و داخ لەدڵەكان، ئەوەندە هەڵسەنگاندن و ئەزمون و شارەزاییان هەیە كە بزانن لەكوێدا گورز بوەشێنن! لە كوێدا ئازارەكەی سەختتر و بۆ كورد بەسوێترە!. لەوەدان پێویستیان بە ڕاوێژ نیە. دەزگاكانی پشتی كردەوە تیرۆریستییەكان، لەهەڵبژاردنی ئامانجەكانیان، هەڵە ناكەن.
لەم سۆنگەیەوە دەڵێم: هاوكێشەی بدە لەهەولێر داوتە لەكورد، لەئێستادا لەقۆناغی جێبەجێكردندایە. هەر تاوناتاوێك بەشێوەیەك پەلاماری هەولێر دەدرێت. میكانیزمەكانی هێرشەكان، كات و قۆناغەكان جیاوازن، بەڵام ئامانجە هەرە گەورەكە هەر یەك ئامانجە و ئەوەیە كە كورد لەناخەوە و لەجومگە هەرە هەستیارەكانیدا ئازار بدەن.
لەڕاستیدا هیچ جیاوازییەك نیە لەنێوان درۆنێك، لەگەڵ گەمارۆی ئابووری و بڕینی بودجە، لەگەڵ هێرشێكی تیرۆریستی كە تیایدا تەقینەوە بەكاردەهێنرێت. یان دروستكردنی فیلمێك یان گرافیكێك یان هەر میكانیزمێكی میدیایی، چونكە سەرجەمیان بۆ شكستهێنان بە ئەزموونی كورد كەلە هەولێردا خۆی دەبینێتەوە، یەكدەگرنەوە. بێگومان ئەوەش ڕەچاوكردنی ئەو ڕاستییەیە كە لەسەرەوە ئاماژەمان پێدا، كاتی خۆی ئوسامە بن لادنیش بەشێوەیەكی زیرەكانە ڕەنگڕێژی بۆ كردووە. بدە لە سیمبولەكان. بدە لەجومگە هەرە هەستیارەكان، بیناكە خۆی دەكەوێت. بەڵام تا ئیستا هەولێر چاوتیژانەتر لەوەی چاوەڕوان كراوە، هەنگاوی ناوەو، مامەڵەی لەگەڵ پیلانەكان كردووە.