مــــــــــــــــــــــــــــــــەڵۆیەک لــــــــــــە بۆچوونەکانم

خوسرەو جاف
وەک مرۆڤێک، ئەندازیارێک، ڕۆماننووس و نووسەرێک، ژیان و بەرهەمەکانم ئاوێتەی کۆمەڵێک تێڕوانین و جیاوازین. من کەسێکم کاتم لا زۆر پیرۆزە، نووسینیش وەک دەرمان و پەناگەیەک دەبینم بۆ ڕزگاری لە جەنجاڵییەکانی دنیا. لێرەوە دەمەوێت تێڕوانینی خۆم بۆ ئەدەب، فەلسەفەی یاخیبوون و قەیرانی خوێندنەوە لە کۆمەڵگەکەماندا بخەمە ڕوو.
لە دیدی منەوە، چەمکی “یاخیبوون” کە زۆرجار وەک پێوەرێک بۆ نووسەری باش سەیر دەکرێت، لەم سەردەمەدا باوی نەماوە و ڕووخێنەرە نەک بنیادنەر. کۆمەڵگەی ئێمە پێویستی بە بنیادنان و ڕەخنەی ئاقڵانە و ژیربێژانەیە، نەک یاخیبوونێکی کوێرانە کە بەردی بناغەی هەموو باوەڕێک وێران بکات. هەمیشە ئامۆژگاریی ئەوە دەکەم کە نابێت نووسەر خۆی لە چوارچێوەیەکی تەسک و ئایدۆلۆژیایەکی دیاریکراودا بچووک بکاتەوە. نووسەری سەرکەوتوو ئەوەیە کە پەیامەکەی لە ئاستی شار و ماڵەکەیەوە بپەڕێنێتەوە بۆ ئاستی نەتەوە و جیهان، چونکە میللەت تەنها یەک حزب، یەک ئایین یان یەک فەلسەفە نییە.
یەکێک لە ڕا جیاوازەکانم، هەڵسەنگاندنمە بۆ دۆخی شیعری نوێی کوردی. من پێم وایە شیعری ئەم قۆناغە پەریشان و لە پەلەقاژەدایە، بگرە مردووی مردووە! جیاوازیی لەگەڵ پەخشان نەماوە و هەرگیز ناگاتە قاپی گەورەکانی وەک نالی و مەحوی. لە بەرامبەردا، ڕۆمان وەک ژانرێک دەبینم کە هەوڵی باشی تێدا دەدرێت، ڕۆماننووس ئازادیی ئەوەی هەیە مێژوو بکاتە هەوێنی کارەکانی و بە زمانی خۆی دایبڕێژێتەوە، بێ ئەوەی وەک مێژوونووسێک گیرۆدەی سەرچاوەکان ببێت.
من نامەوێت خۆم تەنها لە یەک بواردا گۆشەگیر بکەم؛ ماستەرم لە ئەندازیاریی میعماریدا هەیە، لە پاڵ ئەوەشدا پەیکەر دەتاشم و مەوسووعە و ڕۆمانیش دەنووسم. نووسینی (دائرة المعارف) لە ماوەی بیستوشەش ساڵدا و گەیاندنی بە بیستوپێنج بەرگ، بۆ من بازدان نییە، بەڵکو خزمەتێکە بۆ ئەوەی زانیاریی جیهان بە زمانی دایک بخەمە بەردەستی خوێنەران، لەگەڵ ئەوەشدا بەردەوامم لە نووسینی ڕۆمان.
لەلایەکی ترەوە، کاتێک دەڕوانمە کۆمەڵگەکەماندا، دەبینم خوێندنەوە زۆر کەم بووەتەوە. من تەنها گەنجان خەتابار ناکەم، بەڵکو گلەییم لەو ئەدیب و لێپرسراوانەیە کە ئەسڵەن نازانن کتێب چییە و ساڵی یەک کتێب ناخوێننەوە. لە سەردەمی شەستەکان و حەفتاکاندا خەڵک ماڵ بە ماڵ دەگەڕا و سەرەی بۆ خوێندنەوە دەگرت، بەڵام ئێستا بە هۆی تەکنەلۆژیا و ئینتەرنێتەوە، مرۆڤەکان لە کتێب و خوێندنەوە دوور کەوتوونەتەوە کە ئەمەش کارەساتە.
لە کۆتاییدا دەمەوێت بڵێم، من بۆ خۆم دەژیم و ئازادم چۆن دەژیم و چی دەپۆشم، درێژیی قژم شتێکی تایبەت بە خۆمە و زیانی بۆ کەس نییە، دەبێت خەڵک فێر بێت پێش ڕواڵەت سەیری جەوهەری مرۆڤ بکات. بۆ من، لە هەموو گرفت و ناخۆشییەکدا تاقە پشتوپەنام کتێبخانەکەمە، لە کاتی نووسیندا تەواوی دنیا و دەوروبەرم لەبیر دەکەم، بەوپەڕی باوەڕەوە دەیڵێم؛ بۆنی پەڕەی کتێبم لا لە بۆنی ژن خۆشترە، یان لایەنی کەم کەمتر نییە. هەر کتێبێک و داستان و ئەشقێکی تایبەت بە خۆی هەیە کە تەنها لە کاتی وردبوونەوە لێی درکی پێ دەکەیت.