ئێوارەی ڕۆژی پێنجشەممە 10ی ئەیلوولی 2026 لە پیرمام سەرۆك مەسعود بارزانی پێشوازی لە بەڕێز هەیبەت حەلبووسی سەرۆكی ئەنجوومەنی نوێنەرانی عێراق و شاندی یاوەری كرد كە پێكهاتبوون لە سەرۆكی فڕاكسیۆنەكانی ناو ئەنجوومەنی نوێنەرانی عێراق.
لە دیدارەكەدا شاندی میوان كە بە مەبەستی سەرەخۆشی سەردانی سەرۆك بارزانیان كردبوو، پرسە و هاوخەمیی خۆیان بۆ سەرۆك بارزانی دەربڕی بۆ كۆچی دوایی خوالێخۆشبوو عەبدولواحید ئیبراهیم شێخ عەبدولسەلام بارزانی.
هەر لە دیدارەكەدا گفتوگۆ لەبارەی بارودۆخی گشتیی عێراق و هەڕەشە و ئالنگارییەكانی بەردەم عێراق لە قۆناغی داهاتوو كرایەوە و هەروەها ڕۆشنایی خرایە سەر كار و ئەركی پەرلەمان و كوتلە سیاسییەكانی بۆ پێشڤەچوونی پڕۆسەی سیاسی.
هەر لەو دیدارەدا جەخت لە پابەندبوون بە دەستوور و پاڵپشتیكردنی حكوومەتی عێراقی فیدڕاڵ و دامەزراوەكانی تری دەوڵەتی عێراق كرایەوە بۆ پاراستنی سەقامگیریی عێراق و بەرقەراركردنی دۆستایەتی و پەیوەندیی هاوسەنگ لەگەڵ دەوڵەتانی دراوسێ و هەروەها دژایەتیكردن و بنبڕكردنی گەندەڵی و بازرگانیی ماددەی هۆشبەر لە سەرانسەری عێراق.