دەستەی سەربەخۆی مافی مرۆڤ بە توندی ئیدانە و سەركۆنەی ئەو پەلامارە درۆنییە تێکدەرانەیە دەکات کە بەرەبەیانی ئەمڕۆ دووشەممە (١٧ی ئابی ٢٠٢٦)، لە کاتژمێر (٠٠:٢٨)ی شەودا لە دیوی سنوورەکانی کۆماری ئیسلامی ئێرانەوە ئاراستەی سەر نووسینگەی تایبەتی سەرۆکی ئەنجومەنی وەزیرانی هەرێمی کوردستان و شوێنی حەوانەوەی بەڕێوەبەری ئاژانسی پاراستن لە قەزای پیرمام لە پارێزگای هەولێر کرا.
ئێمە لە دەستەی سەربەخۆی مافی مرۆڤ، جەخت دەکەینەوە کە ئامانجگرتنی ناوبەناوی ناوچە ئاوەدانەکان و دامەزراوە فەرمییەکانی هەرێمی کوردستان بەم شێوازە، پێشێلکارییەکی زەق و مەترسیداری سەروەریی خاکی عێراق و هەرێمی کوردستانە، هاوکات پێشێلکردنی سەرجەم پێوەر و پەیماننامە نێودەوڵەتییەکان و بنەماکانی مافی مرۆڤ و مافی ئاسایشی ژیانی هاوڵاتیانە. ئەم جۆرە کردەوانە مەترسی جدی لەسەر ئارامی و سەقامگیریی هەرێمەکەمان و گیانی هاوڵاتیان دروست دەکەن.
سەرەڕای ئەوەی خۆشبەختانە ئەم هەوڵە تێکدەرانەیە هیچ زیانێکی گیانیی لێنەکەوتەوە، بەڵام دووپاتی دەکەینەوە کە پاراستنی ئاسایش و ژیانی هاوڵاتیان مافێکی بنەڕەتییە و ناکرێت بە هیچ پاساوێک خاکی هەرێمی کوردستان بکرێتە گۆڕەپانی پەلامار و پەیامی سەربازی.
داوا لە حکومەتی فیدراڵی عێراق و کۆمەڵگەی نێودەوڵەتی دەکەین هەڵوێستی ڕوون و جدییان هەبێت بۆ ڕاگرتنی ئەم جۆرە دەستدرێژی و پێشێلکارییە بەردەوامانە، و کاربکرێت بۆ پاراستنی سەروەریی خاک و دەستەبەرکردنی ئاسایش و ئارامی لە ناوچەکەدا.
دەستەی سەربەخۆی مافی مرۆڤ لە هەرێمی کوردستان١٧ی ئابی ٢٠٢٦