ئهمرۆ دووشەممە 2026.7.13، لەڕێورەسمێكی تایبەتدا ئومێد خۆشناو، پارێزگاری ههولێر، بە ئامادەبوونی لوقمان سەعید، بەڕێوەبەری گشتیی پەروەردەی هەولێر، یاریدەدەرانی بەڕێوەبەری گشتیی و بەڕێوەبەرانی پەروەردەی ( ناوەند، دەوروبەر، پیرمام و عەنکاوە )، له دیوانی پارێزگا، پێشوازی لە قوتابیه یەکەم، دووەم و سێیەمەکانی سهر ئاستی هەرێمی كوردستان له بهشەكانی ( زانستی، وێژهیی، پیشەیی ) شاری هەولێر و خانەوادەكانیان كرد و رێزلێنان و خهڵاتی تایبهتی پارێزگای هەولێری پێشكهش بە قوتابیهكان كرد .
له ڕێورەسمەكەدا، پارێزگاری هەولێر لە وتهیهكهیدا، خۆشحاڵی بهدیداری قوتابیهكان و كهس و كاریان نیشاندا و ئاماژەی بەوەدا كە جێگەی شانازییە ئەمساڵ دوای راگەیاندنی ئەنجامە گشتییەكانی پۆلی 12ی ئامادەیی بۆ ساڵی خوێندنی 2025- 2026، قوتابییانی سنووری پارێزگای هەولێر سەرکەوتنێکی گەورەیان تۆمار کردووە.
هەروەها پارێزگاری هەولێر، وێڕای دەستخۆشی لە هیممەت و ماندووبوونی قوتابییەکان، ستایشی ڕۆڵی گرنگی خانەوادە و خێزانەکانیانی قوتابیەكان کرد کە لەم بارودۆخەدا کەشێکی لەبار و گونجاویان بۆ فەراهەم کردوون تا بگەن بەم قۆناغە، هاوکات دەستخۆشی تایبەتی ئاراستەی بەڕێوەبەری گشتیی پەروەردەی هەولێر، سەرجەم بەڕێوەبەری پەروەردەکان، سەرپەرشتیاران و مامۆستایانی سنووری پارێزگای هەولێر کرد کە خەمخۆرانە لە پشت ئەم سەرکەوتنانەوە بوون.
پارێزگاری هەولێر ڕاشیگەیاند: “سەرکەوتنی ئێوە بە سەرکەوتنی خۆمان دەزانین” و جارێكر تر وێڕای بەرز نرخاندنی کۆشش و ماندووبوونیان لە قۆناغی ئامادەیی، هیوای سەرکەوتن و درەوشانەوەی زیاتری بۆ خواستن لە قۆناغی داهاتووی خوێندنیاندا لە زانکۆکاندا.
لە کۆتایی ڕێورەسمەکەشدا، پارێزگاری هەولێر، خەڵاتی تایبەت و ڕێزلێنانی پارێزگای بەخشییە قوتابییە سەرکەوتووەکان، لە بەرامبەردا، خانەوادەی قوتابییان سوپاس و پێزانینی خۆیان ئاراستەی پارێزگاری هەولێر کرد بۆ ئەو پێشوازییە گەرمە و خەمخۆریی بەردەوامی بۆ پشتگیریکردنی کەرتی پەروەردە و بەرزنرخاندنی ماندووبوونی ڕۆڵەکانیان.