ئەمڕۆ شەممە، 13ی حوزەیرانی 2026، بە سەرپەرشتیی سەرۆک مەسعوود بارزانی و ئامادەبوونی جێگرانی سەرۆک و ئەندامانی کۆمیتەی ناوەندی و بەرپرسی لقەکان، پارتی دیموکراتی کوردستان کۆبوونەوەی فراوانی خۆی ئەنجام دا.
کۆبوونەوەکە تەرخانکرا بۆ تاوتوێکردنی دواین گۆڕانکارییە سیاسییەکان، پەیوەندییەکانی هەولێر و بەغدا و کاروباری ناوخۆیی. دەستپێشخەرییەکەی سەرۆک بارزانی و چەقبەستوویی سیاسی لە کۆبوونەوەکەدا، دەستپێشخەرییەکەی سەرۆک بارزانی کە لە جەژنی قورباندا ڕایگەیاندبوو، بەرز نرخێندرا. جەخت کرایەوە کە ئەم هەنگاوەی جەنابیان لە سۆنگەی خەمخۆریی بۆ هەرێمی کوردستان و بە ئامانجی ڕزگارکردنی پڕۆسەی سیاسی لەو چەقبەستووییەی تێیکەوتووە، ڕاگەیاندراوە. کۆبوونەوە ئاماژەی بەوە کرد کە لیژنەیەکی تایبەت لە ئاستی کارگێڕی مەکتەبی سیاسی، سەردانی لایەنە سیاسییەکانی دەستپێکردووە بۆ ئەوەی کێشەکان لە شەقام و ڕاگەیاندنەکانەوە بگوازرێنەوە بۆ سەر مێزی گفتوگۆ و چارەسەری نیشتمانییان بۆ بدۆزرێتەوە.
کاریگەرییەکانی شەڕی ئەمریکا و ئێران لەسەر هەرێم تەوەرێکی تری کۆبوونەوەکە تەرخانکرا بۆ دەرهاویشتەکانی شەڕی نێوان ئەمریکا و ئێران کە لە مانگی شوباتی ئەمساڵەوە دەستی پێکردووە. سەرۆک بارزانی و کۆمیتەی ناوەندی نیگەرانیی قووڵی خۆیان دەربڕی کە هەرچەندە هەرێمی کوردستان بەشێک نەبووە لەو شەڕە، بەڵام بەردەوامیی هێرشە هاژەک و درۆنییەکان زیانی گەورەی مرۆیی و ماددی بە ژێرخانی وزە و بەرهەمهێنانی نەوت گەیاندووە. جەخت کرایەوە کە تەنها ڕێگە بۆ پاراستنی ناوچەکە، پەنابردنە بۆ گفتوگۆ و لێکتێگەیشتن.
پەیوەندی لەگەڵ بەغدا و پشتیوانی لە عەلی زەیدی سەبارەت بە پەیوەندییەکان لەگەڵ حکوومەتی فیدراڵ، پارتی جەختی لە هەڵوێستی نەگۆڕی خۆی کردەوە بۆ چارەسەرکردنی کێشەکان لە ژێر سێبەری دەستوور، بەتایبەت پرسی بودجە و شایستە داراییەکانی فەرمانبەرانی هەرێم. کۆبوونەوە پشتیوانیی خۆی بۆ کابینەی نوێی عەلی زەیدی، سەرۆکوەزیرانی عێراق دووپات کردەوە، بەتایبەت لە هەنگاوەکانی بۆ ڕووبەڕووبوونەوەی گەندەڵی و پاراستنی سەروەت و سامانی گشتی، بەو هیوایەی شایستەکانی هەرێم لە کاتی خۆیدا ڕەوانە بکرێن.
کاروباری ناوخۆیی و ڕێکخستنەکان لە تەوەری کۆتاییدا، کۆبوونەوەکە ئەنجامی دیراسەیەکی هەمەلایەنەی لەسەر ئۆرگان و ڕێکخستنەکانی پارتی تاووتوێ کرد. بڕیار درا ئەو پێشنیاز و ڕاسپاردانەی ئامادەکراون، بکرێنە نەخشەڕێگای داهاتووی حزب بۆ پەرەپێدانی کارەکان و خزمەتکردنی زیاتری هاووڵاتییان.
کۆبوونەوەکە بە دەربڕینی هەستکردن بە بەرپرسیارێتیی نەتەوەیی و نیشتمانی بۆ پاراستنی قەوارەی هەرێمی کوردستان و چەسپاندنی پێکەوەژیان، کۆتایی هات