كارزان گلی – ههولێر
دەوڵەت باخچەلی، سەرۆكی مەهەپە، لە وتاری هەفتانەیدا لە بەردەم گروپی پارتەكەی لەناو پەرلەمانی توركیا داوای كرد، ئەو نادیارییەی لەبارەی پێگەی عەبدوڵا ئۆجەلان سەرۆكی پەكەكە دروست بووە، پێویستە هەڵبگیرێت و گوتیشی: ” ئەو كلێنەی لە ئیمرالی دروست بووە چۆن دادەخرێت؟“
باخچەلی لە وتارەكەیدا زیاتر باسی لە راپۆرتی كۆمیسیۆنی (پاڵپشتی میللی و برایەتی و دیموكراتی) كرد، كە لەبارەی پرسی كورد و چۆنیەتیی چەكدانانی پەكەكە راپۆرتەكەیان داوەتە سەرۆكی پەرلەمان و لەوێش پەسند كراوە و بۆ سەرۆكایەتی كۆمار نێردراوە.
باخچەلی گوتی: ”مادام لە ٢٧ی شوباتی ٢٠٢٤دا، ئۆجەلان پەیامی ئاشتیی نارد و پاڵپشتی و هانی دیموكراسیی دا، دەبێت لەمەودوا ئەو پلانەی دانراوە جێبەجێ بكرێت، بۆ ئەوەی كارەكان بەرێكخراوەیی بكرێت، چۆن كێشەی پێگەی ئۆجەلان لە ئیمرالی بەهەند وەردەگیرێت و ئەو كەلێنەی دروست بووە چۆن دادەخرێت؟“
ئەم گوتانەی باخچەلی دوای ئەوە هات، رەجەب تەیب ئەردۆغان، سەركۆماری توركیا، لە كۆنگرەیەكی رۆژنامەوانیدا گوتی ”ئۆجەلان لێبوردنی گشتی نایگرێتەوە و مافی ئومێد نایگرێتەوە کە ئازاد بکرێ.“
روونە ئەم گوتانەی ئەردۆغان، دەوڵەت باخچەلیی نیگەران كردووە، چونكە سێ جار داوای كرد ئۆجەلان مافی ئومێد بیگرێتەوە و تاوەكوو ئێستا هەنگاوی بۆ نەنراوە.
باخچەلی لە وتارەكەیدا ئاماژەی دا، ئەگەر كێشەیەكی لەو جۆرە هەیە لەبارەی ئیمرالییەوە كە دڵنیام هەیە، ئایە ئەم كێشەیە چۆن چارەسەر دەكرێت؟ چونكە ئۆجەلان پاڵپشتی توركیای بێتیرۆرە و چۆن ئەو كەلێنەی ئیمرالی پڕ بكرێتەوە؟
باخچەلی، لەبارەی قەیوومكردنی چەند شارەوانییەكی دەم پارتی لە باكووری كوردستان گوتی: ”ئەحمەد تورك، سەرۆكی قەیومكراوی شارەوانیی مێردین و ئەحمەد ئۆزەر، سەرۆكی شارەوانیی ئەسەنیورت لە ئیستانبۆڵ، پیویستە لە چوارچێوەیەكی دیموكراتیانەدا هەڵسەنگاندن بۆ گەڕانەوەیان بكرێت.“
سپاسی لیژنەی كۆمیسیۆنی (پاڵپشتی میللی و برایەتی و دیموكراتی) كرد و گوتی، زۆر باش کاری خۆیان کردووە.
داوایشی كرد، بەبێ دواكەوتن و مەرج، پێویستە لێبوردن دەربچێت و هەروەها یاسای تایبەت بە پرسی چارەسەری دەربچێت و كاری پێ بكرێت.
گوتیشی: ”ئابڕووی تورك، ئابڕووی كوردە، نامووسی تورك، نامووسی كوردە، شەرەفی تورك، شەرەفی كوردە.“
بەگوێرەی گوتەكانی دەوڵەت باخچەلی بێت، دەبێت ئۆجەلان مافی ئومێد بیگرێتەوە و ئازاد بكرێت، تەنانەت جێگری باخچەلیش پێشتر ئاماژەی دابوو، لە راپۆرتی كۆمیسیۆنی (پاڵپشتی میللی و برایەتی و دیموكراتی) شوێن بۆ ئازادبوونی ئۆجەلان كراوەتەوە.
باخچەلی لە وتارەكەیدا پەیامێكی بۆ كۆما جڤاكێن كوردستان (كەجەكە) نارد و داوای لێكردن دەستبەجێ خۆیان هەڵوەشێننەوە.
كەجەكە، چەند رۆژێك بەر لە ئێستا راپۆرتی كۆمیسیۆنی پەرلەمانی توركیا رەتكردەوە و ئاشكرای كرد، لە راپۆرتەكەدا باس لە چارەسەری پرسی كورد نەكراوە.
كەجەكە لە راگەێندراوێكدا بەم شێوەیە تێبینییەكانیان لەبارەی راپۆرتی، كۆمیسیۆنی (پاڵپشتی میللی و برایەتی و دیموكراتی) خستبوو روو:
_ لە راپۆرتەكەدا باس لە كێشەی كورد نەكراوە، ئەگەر كێشەیەك باس نەكرابێت، ناتوانرێت چارەسەر بكرێت.
_ لە راپۆرتەكەدا باس لە ئینكاری نەتەوەی كورد و هۆكارەكانی بەدرێژایی ١٠٠ ساڵ نەكراوە.
_ لە راپۆرتەكەدا وا نیشان دراوە، لەڕووی تیۆرییەوە بەرتەسك بووەتەوە و درێژەدانە بەسیاسەتی پێشووتر لەبارەی كوردەوە.
_ ئەگەر بوونی كورد و كێشەی كورد باس نەكرابێت، چۆن توركیا بەدیموكراتی دەبێت؟
_ چەك دابنێن و بگەڕێنەوە بەمانای شكاندنی شكۆ دێت و دووركەوتنەوەیە لە چارەسەر.
_ تەنیا ئەوە مومكینە، لە بەرامبەر چەكداناندا، توركیا بگەڕێتەوە بۆ ئازادی و سیاسەتێكی دیموكراتیانە پەیڕەو بكرێت.
_ دەبێت دەوڵەت جیدی بێت لەوەی هەڵسەنگاندن و كار بكات بۆ ئازادبوونی رێبەر ئاپۆ.