پلینیۆمێك بۆ ئیحتیواكردنی سەركەوتنە ملیۆنییەكە

مەشخەڵ كەوڵۆسی
ڕاستییەك هەیە پێویستە هەموو لایەك بیزانن، ئەویش ئەوەیە: بۆ هەر حیزب و گروپێكی سیاسی، چەندە شكست كێشەیە، ئەوەندەش سەركەوتن كێشەیە. بەو مانایەی كە ئەگەر لە شكستدا “كەمی هێز” هەبێت، ئەوا لەسەركەوتندا ” فائیزی هێز” هەیە و، هەردوو حاڵەتەكەش پێویستیان بەوەیە بەواقیعی مامەڵەیان لەگەڵدا بكرێت.
بەڕای زۆرێك لەپسپۆڕانی سیاسی، لەهەردوو حاڵەتەكەدا، بەسایكۆلۆژیای جیاوازەوە، حیزب و هێزی سیاسی، پێویستە بەخۆیاندا بچنەوە. لەم گۆشەیەشەوە، بێ ئەوەی لەڕاستی دوور بكەومەوە دەتوانم بڵێم: كێشە و لێكەوتەكانی سەركەوتن قووڵترن و، ئەو بارەی سەركەوتن بۆ حیزب و گروپی سیاسی دروست دەكات، ڕەنگە لە شكست قورستر بێت.
زۆر بەكورتی: لە حاڵەتی سەركەوتندا، چاوەڕوانی خەڵك زیاتر دەبێت، حیزب پێویستی بە پلانی تۆكمەتر و كاریگەرتر و، ئەندام و سەركردەی كاراتر دەبێت كە بتوانن حاڵەتی سەركەوتنەكە بەردەوام بكەن. هەروەها حیزب ببەنە قۆناغێك لەگەڵ دۆخی سەركەوتندا بەردەوام بێت و، نە پاشەكشە بكات و نە ترسی ئەوەی هەبێت سەركەوتنەكە ببێتە بار بەسەرییەوە.
قسەیەكی باو هەیە دەڵێت: گەیشتنە لوتكە گرنگ نیە، ئەوەی گرنگە مانەوەیە لە لوتكەدا، بۆیە سەرجەم حیزبە سیاسییە موعتەبەرەكانی دنیا، لەكاتی سەركەوتنەكانیشدا، بەخۆداچوونەوە و پلانی تایبەت دادەڕێژن و، سەركەوتنە جومگەییەكانی خۆیان دەكەنە بەرنامەی سیاسی تایبەت و گونجاو بەقۆناغی سەركەوتن.
سەركەوتنەكەی ئەمجارەی پارتی، شتێكی ئاسایی نیە، بەڵكو گۆڕانكارییەكی گەورەیە و، مەغزای تایبەتی سیاسی و دەرونی و مێژوویی و تەنانەت كۆمەڵایەتیشی هەیە. هاوكات دەرئەنجامی هاوكێشەیەكی نوێی هێزە لەناوچەكەدا، بۆیە پێویستە خوێندنەوەی تایبەت و بابەتی بۆ بكرێت و، ئەو سەركەوتنە بكرێتە بناغە و ناوەڕۆكی ماستەرپلانێكی نیشتمانی بۆ سەرلەنوێ دابەشكردنەوەی ڕۆڵی سیاسی و ئیداری ، گۆڕانكاری لەئاستی ستراتیژ و گوتاردا بێتە كایەوە.
نمونەی زۆر هەن كە پێمان دەڵێن: سەركەوتنیش وەكو شكست، پێویستی بە بەخۆدا چوونەوە هەیە. هاوكات پێویستی بەوەیە ئەو بار و لۆدە گەورەیەی دەكەوێت سەر قەوارەی حیزب، بەشێوەیەكی ئینسیابی چارەسەر بكرێت. جگەلەوەش نەخشە ڕێگەی دوورمەودا هەبێت بۆ ئەوەی سەركەوتنەكە بكرێتە بنەمای بەهێزبوونی ئیدارە و دەوڵەت و كۆی ژیانی حوكمڕانی و سیاسی.
حیزبی شیوعی چین لەكاتێكدا سەركەوت و بووبە جێگای متمانەی خەڵك، لە ساڵی 1953 ەوە نەریتێكی داهێناوە، كە بریتییە لەوەی پلانی پێنج ساڵە بۆ پێشخستنی وڵات و ئۆقرەیی ڕژێمی حوكم دادەڕێژێت. لەم ساڵی 2025دا، پلانی پێنج ساڵە ئەپدەیتی 15یەمینی خۆی پێشكەشكرد، ئەو پلانە بەتەواوی هەرسكردنی سەركەوتنەكانە و وەرگرتنی وزەی پێویستە لەسەركەوتنەكان بۆ پێشكەوتن و سەركەوتنی گەورەتر.
بۆیە زۆر بەپێویست دەزانم، بۆ ئەو سەركەوتنە ملیۆنییەی پارتیش، پلنیۆمێك ئەنجام بدرێت و، لەوێوە سەیر بكرێت سەركەوتنەكە چ لۆدێك، چ زیادە هێزێك بۆ پارتی دروست دەكات، بە گوێرەی نەخشە ڕێگایەكی گشتگیر، دووبارە دابەش بكرێتەوە.