ئێوارهى ئهمڕۆ شهممه 2025/10/25 بهڕێز نێچیرڤان بارزانى، له قهزاى شێخان لهگهڵ بهرپرسانى پارتى دیموكراتى كوردستاندا له ناوچهكه كۆبووهوه و دهربارهى گرنگیى ههڵبژاردنهكانى داهاتووى ئهنجومهنى نوێنهرانى عێراق، بۆ بهشداربووان دوا. پاشان بهڕێزیان بهشداریى له بانگهشهى پارتى بۆ ههڵبژاردنى ئهنجومهنى نوێنهرانى عێراق كرد كه به ئامادهبوونى ڕێكخستنهكان و جهماوهرى پارتى له ناوچهكه بهڕێوه چوو.
له وتهیهكدا تیشكى خسته سهر ئامادهیى و ڕۆڵى خهڵكى ناوچهكه له شۆڕش و ڕاپهڕینهكانى كوردستاندا، ههروهها باسى له خهبات و تێكۆشانیان له ڕێزهكانى پارتیدا كرد و ههندێك له ئامانجهكانى پارتى بۆ خولى داهاتووى پهرلهمانى عێراق ڕوونكردهوه.
ئهمه دهقهكهیهتى:
ئامادهبوویێت بەڕێز،
جەنابێ میر،
ئامادەبوویێت هێژا،
ئێڤار باش،
هوین ههمى لایهك گهلهك ب خێر هاتن،
خۆشحالم كو ئهڤرۆ ئهم پێكڤه یێت كۆم بووى.
گهلهك سپاسیا دلسۆزى و ماندیبوونا ههوه هەمیان دكهم، هون هەمی ل هەر جهەكێ هاتبن، بخێر بێن سەر چاڤا و سەر سەرا.
ئەو تشتێ كو ئەڤرۆ زێدەتر من خۆشحال دكەت و ئەز كەیفخۆش دبم، ئەڤەیە كو جهێ خۆشحالیێ یه، ئهڤ دیمهنێ جوانه كو ئهم دبینن مامۆستایێت ئایینى یێت موسلمان، مهسیحى و ئێزدى پێكڤه لێره دڕونشتینه. ئهڤه دیمهنهكێ گهلهكێ جوان یێ كوردستانێ یە و ڕەنگڤەدانا وێ هەتا هەتا پێویستە د ڤی وەلاتیدا بمینیت. ئەڤە ئەو دیمهنه ئەوێ كو كهیفا دۆستێت مه تینیت.
هەڤالینە،
هوین خهلكێ دهڤهرهكێنە گهلهك تایبهتی و گرنگیا خۆ یا هەی بۆ كوردستانێ. كاك سەربەستی بەحسێ هندەك ل وان تشتێت دیرۆكی كر، بەلێ د شۆڕەشێدا ژی ئەز ببێژم، ب شاهدییا سەدان كەسان، سەدان داستان و قەهرەمانی یێت پێشمەرگا یێت ل ڤێ دەڤەرێ هاتیە تۆماركرن. ل شێخان، باعهدرێ، زێلكان، كهلهكچى، قهسرۆك و ئهترووش، ئهڤ سنووره ههمى، وارێ پارتی یە، وارگەهێ گەلەک قەهرەمان و شەهیدایە یێ كو دەولەت سەرێ وان ئەم ئەڤرۆ لێرە یێت خڕڤەبووی.
هەڤالینە،
ل بیرا مە هەمیایە، لیژنا ناوچا شێخان د وەختێ خۆدا و د شۆڕەشێدا ئێک ژ چالاکترین ناوچێت پارتی بوو. ل بیرا مەیە، چالاکیێت پێشمەرگەیێت لیژنا ناوچا شێخان گەلەک بوون و قەهرەمانییا پێشمەرگێت دەڤەرا شێخان چ جارا ژ هزر و بیرا مە دەرناكەڤن. پێشمەرگێت دەڤەرا شێخان، ب ئێزدیڤە، ب موسلمانڤە، ب مەسیحیڤە هەمیا خەبات كر بۆ دۆزا مللەتێ خۆ.
پێکڤە ڤانە هەمیا هندەک ژ مەزنترین داستانێت شۆڕەشێ تۆمار كرن. خەلكێ قەهرەمانێ ڤێ دەڤەرێ چ ئێزدی، چ موسڵمان، چ مەسیحی، ئەنفال و وێرانكرنا گوندا یێت دیتی و بەری چەند سالا ژی پارتی ب تێكۆشەر و خەباتكارێت خۆ یێت كوردستانێ و یێت ڤی دەڤەرێ ب تایبەتی، ڕی ل داعش گرت و نەهێلا داعش بێنە پێش و ئەفسانەیا داعش قەهرەمانێت مە ل كوردستانێ و ب تایبەتی ژی چونكی ل هەوە د نێزیك بوون ل ڤێ دەڤەرێ، وە شكاندن و پەرت و بەڵاڤ كرن.
هەوە دروشمەك گۆت،
هەوە بەحسێ چەند دەنگا كر بێ زەحمەت؟
چەند بوون؟
ئێك ملیۆن.
هەڤالینە،
خەلكێ ڤێ دەڤەرێ گەلەك باش دزانین كا پارتی و قەهرەمانێت پارتی چەوا بەڕەڤانی ل ڤێ دەڤەرێ و كوردستانێ كر، ئەڤرۆ ژی كو ئەم لڤێرە ڕوونشتینە، ئەم هندەك وان قەهرەمانا ل پێش چاڤێ خۆ دبینین كو هەردەم بۆ مە جهێ فەخر و شانازیێنە و ئەڤرۆ ئەم بەژنا خۆ دچەمینین بۆ خوینا شەهیدێت مە، بۆ قەهرەمانییا پێشمەرگێت مە ل ڤێ دەڤەرێ.
هەڤالینە،
هەوە ب خوینا خۆ و قەهرەمانییا خۆ، داستانێت مەزن ل ڤێ دەڤەرێ تۆمار كرن، سبەهی ژی جارەكا دی دا پارتی بچیت و باشتر و بهێزتر بەڕەڤانیێ ل مافێ كوردستانێ بكەت، سۆزا مە هەمییا چییە؟
سۆزا مە ئەوە كو ڕۆژا 11/11 پێكڤە ئەم هەمی بچینە سەر سندۆقێت دەنگدانێ و دەنگێ خۆ بدەینە لیستا 275 یا پارتی دیموكراتی كوردستان، لیستا كوردستانەكا بهێز و پێشكەفتی.
دا تشتەكێ بۆ هەوە ببێژم، گەرماتیا هەوە ڕەنگێ هندێ ددەت وەختێ من بەحسێ ئێك ملیۆن دەنگا كری، دێ بێژی من كێم یا گۆتی!
هەڤالینە،
دا ئەم پرسیارەكێ بكەین، بۆچی پێویستە پارتی بهێز ل بەغدا بیت؟
سەبەب چییە؟
ئەڤە پرسیارەكە ب ڕاستی پێویستە مە بەرسڤا وێ هەبیت، بۆ؟
چونكی بهێزبوونا پارتی ل بەغدا، بهێزبوونا كوردستانێ یە، گارانتییا پاراستنا كوردستانێ پارتییە، لەوما پێویستە ب هێزڤە بچیتە بەغدایێ. پارتی گارانتییا پێكڤەژیانێیە، پارتی گارانتییا ئاڤەدانكرنا كوردستانێیە، پارتی گارانتییا وێ ماندیبوونێیە ئەوا كو پێشمەرگێت مە و خەباتكارێت مە كار لسەر كری و سەرێ خۆ لسەر دانای، لەوما پێویستە پارتی ب ڤێ پێكڤەژیانێ بهێزڤە ل بەغدا بیت.
ئارمانجا مە ل بەغدا چییە؟
بۆ ئەم بچینە بەغدا؟
بۆ پێویستە خزمەتكارێت مە بچنە بەغدا؟
پێویستە بچنە بەغدا، چونكی مە ئێك ئارمانج یا هەی، ئارمانجا مە جیبجیكرنا فیدرالیەتێ و دەستوورێ عێراقێیە.
بۆ گرنگە دەستوور بهێتە جێبجیكرن؟
چونكی بیست سالە خۆڤەدزین و جەبجینەكرنا دەستووری ل ڤی وەلاتی كارەساتێت مەزن یێت بۆ عێراقێ چێكری. عێراق پشتی بیست و دو سالا و هەتا ڤێ گاڤێ، قۆناغێت گەلەك نەخۆش یێت دیتی. ئەڤرۆ ڤێ هەلبژارتنێ كو ب باوەرییا من ئێكە ل گرنگترین هەلبژارتنێت كو ل عێراقێ هاتیە كرن، ناڤێ وێ دكەینە قۆناغا جیبجیكرنا دەستوورێ عێراقێ، ئەو دەستوورێ كو دڤێت وەكی خۆ بهێتە جیبجیكرن. ئەڤ سیستەمێ كو ئەڤرۆ عێراق دگەل هەرێما كوردستانێ بكارتینیت، سیستەمەكێ تەمام ناڤەندییە.
هەڤالینە،
مە بۆچی ئاریشا مووچەی دگەل بەغدا هەیە؟
بۆ مە ئاریشا ماددەیا 140 هەیە دگەل بەغدا؟
بۆ مە ئاریشا پێشمەرگە و شایستێت دارایی و پڕچەككرنا پێشمەرگەی هەیە دگەل بەغدا؟
ئێك هۆكار یا هەی، ئەو ژی ئەوە كو دەستوور ناهێته جیبجیكرن. پرسا مووچەی مافەكێ هەوە هەمیایە، وەكی هەمی مووچەخۆرێت عێراقێ، پێویستە بهێتە دابینكرن. ئەز بێژم هون ئاگەهدارن كو كارێ پێشی یێ حكوومەتا هەرێما كوردستانێ چارەسەركرنا پرسا مووچەیە. ئەز حەز دكەم بێژمە هەوە ئەڤە ئێكەمین ئەولەویەت و مژارە دێ هێتە چارەسەر كرن.
د جهێ خۆدایە ئەز جارەكا دی ژ دل و زۆر ب دل، سپاسییەكا هەمی خەلكێ هەرێما كوردستانێ بكەم. سەرباری وان گڤاشتنا، سەرباری وان ئاستەنگا و سەرباری وان نەخۆشییا، جارەكا دی ئەڤی مللەتی بۆ دۆست و دوژمنا ئیسبات كر كو دێ دگەل كوردستانێ مینن و دێ دگەل پارتی مینن، دێ حزبا خۆ سەرفەراز كەن.
من پهیڤهك نیە ئەز بشێم سپاسیا وان پێ بكەم. د هەمان دەمێدا من دڤێت ببێژمێ: هەولێت هەرێما كوردستانێ و كارێ پێشین یا حكوومەتا هەرێما كوردستانێ، پرسا ژیان و ژیارا ڕۆژانە یا وەیە و ب ئانههییا خودێ ئهڤ ئاریشە ژی دێ چارەسەر بیت و ڤێكڕا جارەكا دی كوردستانێ دێ ل ڤێ قۆناغێ بەینە قۆناغەكا دی یا گەشتر و ئاڤاتر.
هەڤالینە،
وە مەعنەویاتێت من بلندتر كرن بۆ بدەستڤەئینانا دەنگێت زێدەتر. هەوە كارەكێ وەسا كر ئەز ب ئێك ملیۆن دەنگا ڕازی نەبم و داخوازا زێدەتر بكەم. ڤێجا كەیفا وەیە!
هەڤالینە،
كێ ئەو ئیرادە هەیە كو بهێز بەرگریێ ل هەرێما كوردستانێ بكەت؟
پارتی دیموكراتی كوردستانە یا كو بشێت ڤی كاری بكەت. ئەز باوەر دكەم پەرلەمانتارێت مە یێت ڤێ جارێ ئەركێ وان یێ گرانە. ئەركێ وان یێ گرانە و ئەركەكێ پیرۆز یێ هەی، ئەو ژی تەرجەمەكرنا دەستوورییە بۆ كردار ب ڕێكا گوهڕینا یاسایێت عێراقی ژ مەركەزییەتێ بۆ فیدرالیێ. گوهڕینا یاسایێت مجلس قیادة الثورة ئەوێت كو ب ڕاستی ئاستەنگن ل هەمبەر پێشڤەچۆنا عێراقێ.
هەڤالینە،
پرسیا فیدرالییەتێ نە بتنێ بۆ هەرێما كوردستانێ، جیبجینەكرنا دەستووری نە بتنێ زیان گههاندیه هەرێما كوردستانێ، باوەریا هەوە هەبیت، ئەو مهینهتى یێت نەینەوا هەی، ئەو مهینهتى یێت بەسرا هەی، ئەو مهینهتى یێت پارێزگەهێت دی یێت عێراقی هەی، كێمتر نینە ل وان مهینهتى یێت كو مە هەی. لبەر هندێ وەختێ ئەم بەحسێ جیبجیكرنا دەستووری دكەین، مە ب تنێ بۆ هەرێما كوردستانێ نیە، مە جیبجیكرنا دهسووری بۆ هەمی عێراقێ و هەمی پێكهاتێن عێراقێ دڤێت.
ئەگەر پارتیا هەوە یا خزمەتكار بهێز بیت ل بەغدا، بێگومان دەستوور ژی دێ هێتە جیبجیكرن. ئەڤرۆ چ پێویستە بۆ هندێ ئەم ڤی كاری ئەنجام بدەین. ئەز حەز دكەم بێژمە وە، ئەو بەرخودانا وە كری ڕۆژا كو داعش هاتی، بتنێ پێشمەرگە نەبوو. ئەز دزانم خۆبەخشێت ڤێ دەڤەرێ چ ڕۆلەكێ مەزن هەبوو. خۆبەش چۆنە چەپەرا ئێكێ بۆ پشتەڤانیكرن و پاراستنا هەرێما كوردستانێ. نە پێشمەرگە بوون و نە پێویست بوو بچن، خۆبەخش بوون.
ئەو هەڤالێت كو ئەڤرۆ ئەم لڤێرە بۆ بەغدا دهنێرین، ئەركێ وان گەلەك بزەحمەتتر و مەزنترە ل وان خۆبەخشا.
چونكی دێ چ كەن؟
دێ بەرگریێ ل دەستكەفتێن هەرێما كوردستانێ كەن. ب ئانههییا خودێ دێ برایەتییا ناڤبەرا پێكهاتێت عێراقی ب عەرەب و كورد و مەسیحی و ئێزی و ئەڤان هەمیا ب چۆنا خۆ بۆ بەغدا، كویرتر كەن.
ئەز باوەر دكەم ئەو گەرماهییا من ژ هەوە دیتی، هون دێ شێن ڤێ بدەستڤە بینن. ڕۆژا هەلبژارتنێ 11/11 سۆز و پەیمانێت مە بۆ پشتگیرییا هەرێما كوردستانێ و پێكڤەژیانا ڤى سنووری، پێكڤە ئەم هەمی بچینە سەر سندۆقێت دەنگدانێ و دەنگێ خۆ بدەینە پارتی دیموكراتی كوردستان.
هەڤالینە،
هون خەلكێ خۆشتڤی یێ ڤێ دەڤەرێ. هون خەلكێ دەڤەرەكێنە كو نموونەیا پێكڤەژیانا كولتووری یا ئاشتیانە بەرچاڤ دكەن. شێخان دەڤەرەكا پێكڤەژیانێیە. ل ڤێ دەڤەرێ ئێزدیا جهێ دای بۆ ئاڤاكرنا مزگەفتا. خەلكێ ئێزدی زەڤی یێت خو یێت داین بۆ چێكرنا مزگەفتا. لالشا نوورانی كو پیرۆزترین پەرستگەها ئێزدییایە، یا ل ڤێ دەڤەرێ. ل ڤێ دەڤەرێ جەژن و شاهی و بەهی یێت ئێزدیا و موسلمانا و مەسیحییا، ڤێكڕا دهێنە كرن.
ئەڤ نموونەیا مەزن یا پێكڤەژیانێ، تابلۆیەكا نەخشاندییە د دیرۆكا گەلێ مەدا و چ جارا ناهێتە ژبیركرن. ڕژێما ژناڤچۆیی گەلەك هەول دان ئەڤێ پێكڤەژیانێ تێكبدەت، بەلێ هیچ نەشیا. پێكڤەژیان و برایەتی، بنگەهێ هزر و ڕێبازا شێخێت بارزان بوویە. بنگەها هزرا شێخێت بارزان، پرسا پێكڤەژیانێ بوویە. پێكڤەژیانا نەتەوە و دینا د ئێك وەلاتدا. ئەڤە بوو ڕێبازا شێخێت بارزان. ئەڤە ئەو ڕێبازە ئەوا كو ئەم لسەر دچین، پێكڤەژیانا ئاشتییانە یا هەمی نەتەوەیا ڤێكڕا د وەلاتەكیدا.
ئەڤ باوەرە بنگەهەكێ سەرەكییە د هزرا پارتیدا، پارتی وەكی حزب لسەر ڤێ ڕێچێ دچیت. لەوما ژبەر پێكڤەژیانا هەوە یا خورت، هون خەلكێ دەڤەرا شێخان، خەلكێ ڤى سنوورى، ئەز دێ بێژم ژبەر ڤێ پێكڤەژیانێ، هون پارتی یێت ژمارە ئێكن.
ئەڤ كولتوورێ هەوە جهێ شانازییا پارتییە. هەبوون و پێكڤەژیانا ئاشتیانە یا ئێزدییا، مەسیحییا ل هەر جهەكێ، وێنەیەكێ زۆر یێ جوان یێ جڤاكا كوردستانێیە. چەند جوانە كو ل جهەكێ وەكی ڤێ دەڤەرێ، مزگەفت، دێر، لالش و جهێت پیرۆزێت ئێزدیا، هەمییا ڤێكڕا دبینین. ئەڤە وێنەیەكە، ئەڤە كولتوورەكە كو جیهانا دەرڤە ڕێزەكە تایبەتی یا هەی بۆ كوردستانێ و ئەڤ كولتوورێ كو ل ڤێ دەڤەرێ هەیه. ئەڤە دەولەمەندییەكا مەزنە، هێزە بۆ كوردستانێ، هێزە بۆ وڵاتێ مە، هێزە بۆ پارتی. ئاخافتنا من ئەڤەیە بۆ هەوە: ب هەمی هێزا خۆ، ڤێ پێكڤەژیانێ بپارێزن ل ڤێرە.
پارتی بەردەوام هەول دایە و كار كرییە بۆ هندێ كو نوێنەرایەتییا ڕاستی یا هەمی كوردستانێ بكەت، كو نوێنەرێ هەمی پێكهاتەیا ل دەزگەهێت سیاسی و ئیداری ل كوردستانێ و عێراقی هەبن، دیرۆكا پارتی ژی دیارە كو بەردەوام و بێ جداهی حزبا هەمی دین و نەتەوەیێت كوردستانێ بوویە. هەر ژ ڕۆژا دامەزراندنێ و ههتا ئەڤرۆ، پارتی حزبەك بوویە كو جهێ هەمی كەسەكێ تێدا هاتیە ڤەكرن و ئەڤە د لاپەڕەكێ زێڕین یێ دیرۆكێدا دێ هێتە نڤیسین.
ژ ههمى دین و نەتەوەیێت جدا یێت كوردستانێ، قەهرەمان و سەركردە یێت دناڤ پارتیدا هەی و هەبووینە. قەهرەمانێ ڤێ دەڤەرێ، مەحموود ئێزدی ناڤەكێ دیار و نموونەیەكێ ڤێ چەندێیە.
داكو ئەڤ پێكڤەژیانە ژی یا مسۆگەر بیت و مافێت هەمیا ژی بهێنە پاراستن و جداهی چێنەبیت، داكو ڤی كولتووری ل هەمی دەڤەرێت دی ژی جێگیر بكەین، دڤێت ئەم پێكڤە كار بكەین، هەول بدەین و ماندی ببین دا پارتی سەركەڤیت، دا لیستا 275 یا پارتی سەركەڤیت و ب ئانههییا خودێ و ب پشتهڤانییا ههوه، دێ سهركهڤیت.
خوشك و برایێت هێژا،
دگەل هەمی خزمەتا كو هاتیە كرن ژی، بەرنامێ مە یێ حكوومەتا هەرێما كوردستانێ بۆ دەڤەرا شێخان، بەشەكێ كێم یێ هاتیە جیبجیكرن. گەلەك زێدەتر یێ مای بۆ ئاڤەدانكرنا دەڤەرا شێخان. ئەم چاڤەڕێینە ئێزدی كاروان ـ كاروان ژ ئەورووپا و وهلاتێت دی بێنە سەردانا لالش و شێخان ببێتە وارگەهەكێ گرنگ یێی گەشتیارییا ئایینی ل ڤێ دەڤەرێ، ئەم چاڤەڕێى ڤێ ئێكێینە. ئەڤ دەڤەرە دەڤەرەكا گرنگە كو نەینەوا و بەهدینا پێكڤە گرێددەت. مە دڤێت ببیتە دەڤەرەكا بازرگانی و كەرتێ تایبەت تێدا چالاك ببیت. ئەڤە بەرنامێ حكوومەتا هەرێما كوردستانێیە و ب ئانههییا خودێ دێ هێتە جیبجیكرن.
ئەگەر ئەم ڤێ دەڤەرێ بكەینە نموونە دێ چ بینین؟
دێ خۆشگوزەرانییا زێدەتر یا خەلكی بینین، دێ ئاڤەدانییەكا زێدەتر بینین، لەوما ئەم چ دبێژین؟
ئەم دبێژین پارتی حزبا كردارێیە، پارتی حزبا ئاڤەدانییا كوردستانێیە.
سنوورێ وە سنوورەكێ گرنگە، چونكی هەژمارەكا مەزن یا دەنگدەرا یێت بازنەیا نەینەوا ژی یێت ل ڤێرە كۆمبووی. ژبەر هندێ ئێك دەنگ ژی ژبۆ مە زۆرە. ڕۆژا دەنگدانێ پێویستە ئەم هەمی پێكڤە بەرەڤ سندۆقێت دەنگدانێ بچین.
پارتی هند یا پشتڕاستە ب جەماوەرێ خۆ، یا پشتڕاستە كو دێ سەركەڤیت، هندەك جارا ب ڕاستی سستی چێ دبن. هیڤیدارم د ڤان هەلبژارتناندا ئەو سستی چێ نەبیت، حسابا هندێ بكەن هەر دەنگەك بۆ مە یێ گرنگە بۆ هەلبژارتنا كوردستانێ و پێویستە ئەم ئێك دەنگ ژی حساب بكەین و دەلیڤێ نەدەین ب ئانههییا خودێ ئێك دەنگ ژی كێم ببیت.
مەسیحی بەشەكێ گرنگن د دیرۆكا ڤی وەلاتیدا، هەمی هەولێت مە بۆ هندێنە كو مەسیحی كۆچبار نەبن و لسەر ئاخا خۆ بیمینن. لسەر ئاخا كوردستانێ بمینن، ئاخا پێكڤەژیانا هەمی نەتەوەیا، بەرەڤ دەرڤەی وەلاتی نەچن و ل ڤی وەلاتی بمینن. خەباتا پارتی بۆ پارستنا مەسیحییا و مافێت وان د دیرۆكا پارتیدا یا دیارە، پشتەڤانییا مەسیحییا ژی د دیرۆكا پارتیدا بۆ پارتی جهێ سەربلندیێ و سەرفەرازیێیە.
پارتی مەزنترین پشتەڤانا مەسیحییایە و دێ هەر مەزنترین پشتەڤانێ مەسیحییا مینیت ل كوردستانێ و ل عێراقێ. مەسیحی د شۆڕشێدا ل ناڤ پارتی پێشمەرگە بووینە، د ئۆپهراسیۆنا ئەنفالاندا ئەگەر ئەم بەرێ خۆ بدەینێ چەندین خێزانێت مەسیحی ل دەڤەرا بارزان و ل بههدینان ژی دگەل خێزانێت كورد ئەنفال بووینە و گوندێت وان ژی هاتینە وێرانكرن. هەرچییەكا بۆ مەسیحییا بكەین وەكی پێكهاتەكا ڕەسەن یا وهلاتێ مە، كێمە. دیسا جهێ سەربلندی و سەرفەرازیێیە كو ئەم بێژین پشتەڤانێ ئێكەم یێ مەسیحییا ل عێراقێ و هەرێما كوردستانێ، پارتی دیموكراتی كوردستانه و هەر دێ مینیت پشتەڤانا وان.
هەڤالینە،
ژ پارێزگەهێت عێراقێ وەختێ سەرا هەرێما كوردستانێ ددەن، وەختێ ڤێ پێشكەفتنێ دبینن، خزمەتگوزاریێ دبینن، پێ داخبارن. بێگومان مللەتێ مە ب ڕاستی هەژی پێشكەفتنەكا زێدەتر و خزمەتگوزارییەكا زێدەترە ژ ئەوا كو هەی، لێ ئەو دەستكەفتێت كو ل هەرێما كوردستانێ هاتینە بدەستئێخستن، كێم نینە.
خزمەتكارێت وە كو پارتینە و هەوە باوەری دایێ، ئەڤ كاروانێ ئاڤەدانكردنێ یێ دەستپێكری و نها ژی حكوومەتا هەرێما كوردستانێ لگۆر شیانێت خۆ یا بەردەوامە. هیڤیا من ئەوە پشتی ڤان دەنگدانا و پشتی ڤان هەلبژارتنا، ب گوڕوتینەكا زێدەتر پرسا ئاڤەدانیێ ژی بكەڤیتە دناڤ پرۆگرامێ حكوومەتێدا و زێدەتر ببیتن.
من سەرێ وە گەلەك ئێشاند، بوورن، بەلێ مە ئێك ئاخڤتن و سۆز یا هەی، سۆزا مە ئەوە كو ڕۆژا 11/11 گەلی گەنجا، گەلی كوردستانى و خەلكێ دەڤەرا شێخان، مەسیحی، ئێزدی، موسلمان، هەمی ڤێكڕا ڕۆژا 11ێ هەیڤێ پەیمانا مە و پەیمانا هەوە، بێگومان پشتی كو من هون دیتن ئەو چاڤەڕێكرنا من یا ئێك ملیۆن دەنگی پیچەك چۆنه سەرتر ژی. گەرماهییا هەوە ئەو گەرماهی دا مە، ژبەر هندێ هەڕنە ناڤ خەلكی و بێژنە وان داكو خزمەت و ئاڤەدانی هەبیت، داكو ئارامی و تەبایی هەبیت، داكو پێڤەژیان و برایەتی هەبیت، داكو ناڤبەرا هەمیا یا پاراستی بیت و ئاریشە نەبن، بێژنە خەلكی كییە یێ كو ڤان تشتا دكەت؟
پارتییە، دەنگێ خۆ بدەنە پارتی دیموكراتی كوردستان.
زۆر سپاس و سەر چاڤا هاتن.