شێرکۆ حەبیب
لەم ماوەی دواییدا گرتە ڤیدیۆیەک لە تۆڕە کۆمەڵایەتییەکان بڵاوبۆوە، چەندین جار سەیرم کردەوە، چونکە لەو باوەڕەدا نەبووم ئەوەی گوێبیستی بووم دروست بێ، بۆیە گوتم با چەند جار دووبارەی بکەمەوە، خاتوونێک سەر بەیەک لەو حزبانەی ئەم دواییە دروست بوون نە ساردی و نە گەرمیان دیوە بە ناو ئۆپۆزسیۆنن، وتەکانی جێگای سەرسوورمانە کە تاکی کورد گەیشتۆتە ئەم رادەیە بەو شێوازە دژی وڵاتەکەی بیربکاتەوە.
مووچە مافێکی سەرەکی و دەستوری و یاسایی فەرمانبەر و مووچە خۆرانی هەر وڵاتێکە، ئەوە هیچ گفتوگۆیەک هەڵناگرێت، بەڵام بۆ ناپرسن کێ هۆکاری ئەم گرفتەیە، بۆ ناپرسن لە حکوومەتی بەغدا، لەگەڵ ئەوەی مووچە نابێت تێکەڵاوی گرفت و ناکۆکییە سیاسییەکان بکرێت، و ئەمە خێر و سەدەقە و زەکات نییە، بەڵکو مافە لەگەڵ ئەوەشدا بێ ئەو مووچە کەس لە برسا نامرێ چونکە خوای مەزن و دلۆڤان کە مرۆڤی خەلق کردووە رزقیشی بۆ دابین کردووە ئەوجا هەر کەس و رزقی خۆی.
ئەوەی لێرە مەبەستمە و ئاماژەی پێبکەم گوتەکانی ئەو ئافرەتەیە و گوتی (مووچەکەمان (توگین) بکەن و بماندەنێ ئەوجا بە خاین بەجاش بە خۆفرۆش ناومان دەبەن گرنگ نییە قەوارەی هەرێمش تێک دەچێت با تێکچێت). واتە قەبووڵیەتی کەرامەتی خۆی لەدەست بدات بۆ چەند دینارێک و قەوارەی هەرێمێک هەڵبووەشێتەوە بۆ چەند دینارێک، لای ئەو جۆرە کەسانە نە کەرامەت و نە خوێنی شەهیدان گرنگ و بایەخدارە، گرنگ مووچەی پێ بدرێت لەسەر حسابی کەرامەت.
کە هەزاران پێشمەرگە و خانەوادەی کەم درامەت و پێویست بۆ ئەو بڕە مووچەیە ئەو بێ کەرامەتیە قەبووڵ ناکەن، چونکە خاوەن کەرامەتن و خوێنیان بۆ ئەم خاکە ڕشتووە خەباتیان بۆ کردووە تا ئەمڕۆیان بەدی هێناوە.
بەڵێ داواکردنی مووچە مافێکی یاساییە و کەس نکۆڵی لەوە ناکات، بەڵام بە خاین و خۆفرۆش و جاش ئەوە بەهەموو کەسێک قەبووڵ ناکرێت، تەنها ئەوانەی نەفس نزم نەبن، یا قەوارەی هەرێم تێک بچێت ئەوەش بەهەموو کەس قەبووڵ ناکرێت تەنیا ئەوانەی نازانن دلۆپە خوێنی پێشمەرگەیەک و هاووڵاتیەکی شەهید چەند بەها و بەنرخە، ئەم قەوارەی بەخەباتی زیاتر لە سەد ساڵەی خەباتی میللەتی کورد هاتووەتە ئاراوە هەزاران جوامێر و قارەمان گیانی خۆیان بەخشی بۆ ئەو قەوارەیەی هەرێم، هەزاران لە خەبات و تێکۆشاندا هەوڵیاندا بۆ ئەو قەوارە، راستیان فەرمووە؛ قەدری زێڕ لای زێڕنگرە.