فەستیڤالا ڕامان

بەیار باڤی
(زاخۆ)
ل هەردوو ڕۆژێن 19 و 20ێ مەها کانوونا بچووك یا بۆری، دووەمین فەستیڤالا ڕامان یان ژی گۆڤارا ڕامان ل هەولێرا پایتەخت هاتە سازکرن. بەندە ژی یەك ژ بەشداربوویێن ئەڤێ چالاکییا ئەدەبی – ڕەوشەنبیری بوو، کو ب دیتنا من ئەڤە یەك ژ ئەوان چالاکیێن جودا و جهێ دەستخۆشیێ بوو، ب تایبەت ل ئەڤان سالێن دویماهیێ ب ئەڤی ڕەنگی بهێتە ساز کرن …
چەندین خالێن جوان و بالکێش د ئەڤێ ڤەستیڤالێ دا هاتن بەرچاڤ، ئەم پالداین کو ببیت بابەتێ ئەڤێ نڤێسینا مە :
– (کولتوور و ئەدەبیات – ئێستا و ئاییندە)، کو ناڤونیشان و لۆگویێ ڤەستیڤالێ بوو.. ئەڤ مژارە ل ئەڤی سەردەمێ گێژەڤانکا تەکنۆلۆژیا سەردەم و ژیرییا دەستکرد، ڕۆژانە دهێتە ئازراندن و جهێ گەنگەشێیە.
تەوەرێن گرێدایی ب مژارێ ڤە: د ئەڤان دوو ڕۆژان دا 17 بابەتێن گرنگ و گرێدای ڕۆژەڤا ئەدەبی – ڕەوشەنبیریی ژ ئالیێ مامۆستایێن شارەزا و تایبەتمەند ڤە د پێنج پانێڵان دا هاتنە پێشکێشکرن و پرسیار و گەنگەشە ل سەر هاتنەکرن :
1- کولتوور و ئاشتەڤایییا جڤاکی؛ ئەڤ مژارە ب تایبەت ل ڕۆژگارێ مە یێ ئەڤڕۆ و جیهانەکا پڕی هەڤڕکی و ململانێ، بابەت گرێدایی هەر تاکەکێ جڤاکێیە.
2- کولتوور و زیرەکی دەستکرد؛ ئەڤ مژارا زیرەكی یان ژی ژیرییا دەستکرد گەلەك جاران وەکو گەف و هەلامەتەکی ژ ئالیێ مرۆڤی ڤە دهێتە بەرێ خۆدان کو ل پێشەڕۆژێ ببیت شوینگرێ وی بۆ کار و کریاران، هەتا ل سەر ئەدەب و داهێنانێ ژی! هەلبەت بابەت نە ب تنێ گرێدایی تەخا ئەدیب و نڤێسەرانە، بەلکو ب پترییا جڤاکی ڤە هەیە.
3- کولتوور ل سەردەمێ تەکنۆلۆژیایێ دا؛ ئەڤە ژی مژارەکا دی یا گرنگ بوو، کو فەلسەفە و داب و نەریت و بهایێن جڤاکی دێ چەوا خۆ ل بەر ئەڤێ پێلا تەکنۆلۆژیایێ گرن، مژارەك گرێدایی جڤاکێ و کەلتوورێ جڤاکێ و کەتوارێ هەبوونا دوو هێزێن نەهەڤسەنگە!
4- کولتوور و دیتنەك بۆ پێشەڕۆژێ؛ چەند دیتنەك بۆ ڕەوشا ئەدەبی ل پێشەڕۆژێ و ئاسۆیێن خۆڕاگری و مانا ئەدیب و ئەدەبێ ڕەسەن، کو هەلبەت نڤێسەرێ داهێنەر هەر دێ مینیت سوارچاکێ مەیدانا ئەدەبی !
5- کولتوور کرن و ئاستەنگێن ل پێش کولتوورکرنێ؛ ئەڤە ژی پانەڵێ دوماهیێ بوو، کو تیشك دئێخستە سەر هندێ، چەوا کەلتوورێ خوێندنێ ل ئەڤی سەردەمێ تەکنۆلۆژیایێ بمینیت و خۆ ڕاگر بیت؟ هەر وەسا بەرچاڤکرنا ئەوان ئاستەنگێن دکەڤنە د ڕێ دا، هەلبەت ئەڤە ژی یەك ژ ئەوان بابەت و مژارێن ڕۆژانەیە، کو دبیتە جهێ گەنگەشە و کێش و ڤەکێشێ ب تایبەت د ناڤ نڤیسەران و تەخا روشەنبیر ب گشتی دا. زێدەباری ئەڤان بابەت و مژارێن ئاماژە پێ کری، هەر وەسا پێتڤییە ئاماژێ ب چەند خالێن دی ژی یێن ئەرێنی بکەم (کو بدیتنا من وەکو خالێن سەرکەفتنێ بۆ ئەڤێ چالاکییا ئەدەبی – ڕەوشەنبیریی دهێن هەژمارتن) مینا ئەڤێن ل خوارێ :
– مامۆستایێن بابەت پێشکێشکرین، د بیاڤێ دیارکری دا کەسێن شارەزا بوون.
– پێگیری ب دەمێ دیارکری و گەهاندنا پوختەیا بابەتی و مانا دەم و دەلیڤا پێتڤی بۆ پرسیاران و گەنگەشێ . و ئەڤە ژی وەکو (تشویق)ـەکێ بوو، کو هەتا دویماهیێ هۆل یا ئارام و پڕ بیت، هەلبەت ئەدمینەرێن پانەڵان ژی د ئەڤی بواری دا دسەرکەفتی بوون.
– خالەکا دی یا جهێ دلخۆشیێ، پتریا نڤیسەران و هەروەسا ڕەوشەنبیرێن بەشدار بووی ل ئاستەکێ بەرز و تایبەتمەندبوون، کو شێوازێ پرسیاران و گەنگەشەکرن و هەروەسا بێدەنگی و ئارامییا هۆلێ ژی ل هەمو ماوێ چالاکیێ؛ گرۆڤێ ئەڤێ ڕاستیێیە.
– ژخالێن دی یێن ئەرێنی، هەتا ڕادەیەك مەزن هەڤسەنگی د هاتنا مێهفانان دا ل ناڤبەرا جهێن جودا جودایێن هەرێما کوردستانێ و هەر وەسا پارچەیێن دی یێن کوردستانێ هاتبووکرن .
– سپێدەیا ڕۆژا دەستپێکێ و هەروەسا دویماهی ئینان ب ئێڤارییەکا هۆزان خواندنێ، کو ئەو ژی بۆ 17 هوزانڤانان، جوانییەکا دی دابوو فەستیڤالێ..
– خەلاتکرنا مامۆستایێ شوینوارناس و نڤیسەر و خەمخۆرێ کولتوورێ کوردی عەبدلڕەقیب یووسف ل دەستپێکا فەستیڤالێ، ئەو خۆ ب خۆ خالەکا پڕشنگدارە، کو هزر ل ڕێزگرتنا کەسایەتیەکێ هەموو تەمەنێ خۆ بۆ خزمەتا پاراستنا شوینوار و کولتوورێ مللەت و وەڵاتێ خۆ تەرخان کری …