نامەیەک بۆ ڕەمزی نیشتمانەکەم: ئاڵا

ئاوات قەرەداغی
نامەیەک لە لێواری قووڵاییەکانەوە بۆ لوتکەی شنەبای نیشتمان ئەی ئەوەی ڕەنگەکانت لە خوێنی ئۆقرەنەگرتنی ئەم گەلە هەڵکێشراو، ئەی ئەو پەڕچەمەی کە کاتێک با دەتجووڵێنێت، لێدانی دڵی سەدان ساڵەی چیاکان و پێدەشتەکان دەگوازیەوە. لەم کەنارە ئارامەی تەمەنەوە، لەو شوێنەی کە تیشک و وەرزی گۆڕانکاری لەسەر لێوارەکانی ڕۆحم تێدەپەڕن، نامەیەکت بۆ دەنووسم، وەک ناڵەیەکی مێژوویی کە دەبێت هەموو ئەو کەسانەی بەناو ئەم جیهانەدا تێدەپەڕن، سێبەری ئەم نامەیە بیانتەنێت و لە خەوی گران بەئاگا بهێنێتەوە.
ئێمە لە سەردەمێکدا ژیان بەڕێ دەکەین کە هەندێک جار شتەکان ئەوەندە گەورەن کە مرۆڤە بچووکەکان ناتوانن لە قەبارە مەزنەکەیان تێبگەن، و ئەوەندە لە ژیانمانەوە نزیکن کە بەهۆی ئەم نزیکییە هەمیشەییەوە، لە بیریان دەکەین و لێیان بێئاگاین. ئاڵا، تۆ ئەو تاقە ڕوخسارەی کە تاریکیی سەدەکانی پێ ڕووناک دەبێتەوە. کەسانێک هەن کە لەگەڵ بوونتدا ڕاهاتوون، هەموو ڕۆژێک، بێ ئەوەی بۆ ساتێک چاو لە بەرزاییەکانی باڵات بگێڕن، وەک تابلۆیەکی کۆنی سەر دیواری مێژوو بەلاتدا تێدەپەڕن. ئەوان نازانن لە پشت ئەم ڕەنگە سوور، سپی، سەوز و ئەو هەتاوە زێڕینەوە، چەندەها چیرۆکی قوربانی، شۆڕش و دایکی بە جەرگی سووتاو خۆیان شاردۆتەوە.
کەچی، کارەساتەکە لەوەدایە، لەو ڕۆژەی کەسێک، ڕۆشنبیرێک یان تێپەڕبوویەک ئاڵا دەکاتە کەرەستەیەکی ڕۆتینی و تەنها لە بۆنەکاندا وەک سێبەرێکی لێدەکات، لە ڕاستیدا دەستدرێژی دەکرێتە سەر جەوهەری مانامان. زۆربەی جار، ئەوانەی چاویان لەسەر گۆڕانکارییەکانە، وەک جنۆکەیەکی بێباک بەلاتدا دەگوزەرێن، یەکێک ژیانی لە سایەتدا دەبینێت، و ئەوی تریان تەنها تێپەڕبوونی کات و خولانەوەی میلی کاتژمێرێک بەدی دەکات.
ئەی ئاڵای من! چەندە تاڵە مرۆڤێک ببێتە خاوەنی گەورەترین نیشتمان، کەچی لە ناوەوە چۆڵ و بێبەش بێت لە تێگەیشتن. خۆشەویستی لەو قووڵاییە فەلسەفییەتدایە کە چاوەکان نایبینن و تەنها دڵی ماندوو دەیخوێنێتەوە. کاتێک کەسێک بێباکانە چاوی لەسەر ڕەنگەکانت هەڵدەگرێت، ئەو لە ڕاستیدا نە بوونی تۆ دەناسێت و نە شکۆی ئەو خاکەی کە لەسەری دەژی.
ئەمڕۆ، لە بەردەم ئەم نامە بێگەردەدا، بانگەوازێکی پڕ لە سۆز دەبێژم :تکایە، کەسێک هەڵبژێرە، نەتەوەیەک بهێنە پێش چاو، و مرۆڤێک بخە مەیدان کە بوونی ئەم ئاڵایە وەک ( موعجیزەیەک ) ببینێت نەک وەک شتێکی ئاسایی!
چونکە داننان بە جەوهەری ئەم ئاڵایەدا، بەنرخترە لەوەی تەنها بە بوونی ڕابێین. ڕاهاتن بە شتە پیرۆزەکان، مەترسیترین قۆناغی داڕمانی ڕۆحییە. گەلی کورد بە مێژوویەکی پڕ لە زەمەن و خوێن گەیشتووەتە ئەمڕۆ، و شایەنی ئەوە نییە کە ئاڵاکەی تەنها وەک پارچە قوماشێک لەسەر ڕێگاکان ببینرێت، بەڵکو دەبێت ببێتە بڕبرەی پشتی ڕۆحمان.
ئەو کەسانەی لەم کات و سەردەمەدا دەژین، با بزانن کە تەمەنی مرۆڤ کورتە و کەنارەکانی ئارامی زۆر لە مێشکمانەوە نزیکترن، ئەوەی لە دواوە دەمێنێتەوە تەنها ڕاستگۆیی و ئەو خۆشەویستییە پاکەیە کە بۆ ئەم نیشتمانە و ئاڵاکەی هەتە. با ئەمڕۆ، پێش ئەوەی درەنگ بێت، چاوەکانمان بکەینەوە و لە جیاتی ( ڕاهاتن )، لە ڕەنگەکانی ئاڵا تێبگەین، چونکە نیشتمانی بەهێز، بە ڕوانینی قووڵ و بە دڵێکی پاک بنیات دەنرێت، نەک بە بێباکی و ڕووکەشگەرایی.
ئەی ڕەمزی بێگەردی من، ئەم نامەیەم بۆ تۆ، هاوارێکی بریندارە لە کەنارێکی ئارامەوە، بۆ ئەوەی ڕۆژێک زووتر، هۆشی ئەم نیشتمانە لە خەوی ڕۆتینیات بەئاگا بێتەوە.
با ئاڵا، موعجیزەی ژیانمان بێت، نەک ڕووداوێکی تێپەڕبوو!