ئاری ئاغۆک
لەم ڕۆژانە لەگەڵ ئاریای کورە بچکۆڵەکەم، بە ئۆتۆمبێل سەردانی شوێنێکمان دەکرد، لە رێگادا لە شەقامی سەد مەتری هەولێرێ، ئۆتۆمبێلێک شوفێرەکەی خانمێک و ئەوەی تەنیشتیشی منداڵێک بوو، چەند کیلۆ مەترێک لە پێش ئێمە دەڕۆیشتن، لەناکاو منداڵەکە جامی ئۆتۆمبێلەکەی کردەوە و کیسەی بەتاڵی جپسی فڕێ دایە لای ڕاستی شەقام، یەکسەر من و ئاریا تەماشای یەکترمان کرد، کوڕەکەم سەرسوڕمانی خۆی دەربڕی و دەیوست پرسیار بکات، بەر لەوەی بپرسێ بینیمان ئەوجارەیان خانمی شوفێر دەبەی ئاوی بەتاڵی فڕێدایە لای چەپی شەقام.
ئینجا ئاریا بەسەرسوڕمانەوە پرسی: بابە ئەوە کودەبی ئەو منداڵە و ئەو ژنە شت فڕێدەنە سەرشەقام!.
وەڵامی من بۆ کوڕەکەم ئەوەبوو کە ئەوانە شار و نیشتیمانی خۆیان خۆش ناوێ بۆیە بایەخ بە ژینگە نادەن و هەست بەلێپرسراویەتی ناکەن.
ئەویش گووتی: ئەدی ئەو منداڵە لە قوتابخانە فێری پاک و خاوێنی و ژینگە پارێزی نەبووە؟! ئەدی دایکی خۆ گەورەیە کوو دەبی شت لەناوسەیارە فڕێ بدات؟!
تا گەیشتینە شوێنی مەبەست باسی ژینگە پارێزی و خاکپارێزم بۆ کوڕەکەم کردو تێم گەیاند کە ئەمە کارێکی هەڵەیە، ئەویش دەیزانی هەڵسوکەوتی ئەو دایک و منداڵە هەڵەیە، بەڵام ئەوەی لێرەدا بووە هەوێنی ئەو نووسینەم، گەڕانەوە و ئاماژەدانە بۆ ئەو پەندە کوردیەی کە دەڵێ (گەورە ئاو دەرژێنی و گچکەش پێ لێ دەخشێنی)، بەڵام ئەو دیمەنەی من بینیم پێچەوانەبوو، لەبڕی ئەوەی دایک وەک مامۆستا و پەروەردەکاری ماڵ و خێزان و منداڵ، بەشێوازی خۆی تێی بگەیەنێ کە فرێدانی هەر شتوومەکێک لە ناو ئۆتۆمبێلەوە کارێکی ناشارستانی و نامرۆیی و هەڵەیە، چونکە لەو حالەتە هەم شار پیس دەبێ هەم ئەرک و کاری ژینگەپارێزانی شار قورستر و زەحمەتتر دەبێت، کەچی دایک هیچ وەڵام و ئامۆژگاری نەبوو، یەکسەر دەستی بۆ مۆبایلەکەی بردو وابزانم دەستی بە سنپاپ و ستریک کرد!
بەهەرحاڵ،،، ئەوەی من بینیم ڕەنگە یەکێک بێ لەو دیمەن و حالەت و دیاردە بەردەوامییانەی کە بەشێک لە خێزانی کورد پێیوە خەریکن، بۆیە کاتێ دەڵێین ژینگە پارێزی ڕەوشت و بەرپرسیاریەتییە، ئەوا بەو واتاو مانایەدێت کە پێویستە هەر تاکێکی کومەڵگە بەرپرسیاریەتیانە مامەڵە لەگەڵ ئەو پرس و خەمی ئێستا و ئاییندە بکات، بۆیە کەدەڵێین (هۆشیاری،،،،، هەمیشە هۆشیاری)، بەر لە فێربوون و تێگەیشتن، پێویستە پرسی ژینگە و پاک و خاوێنی ژینگە بکەنە خەمی گەورەی ژیان.
لەبیرم چوو ئەوەش بڵێم، جۆری ترومبێلەکەی ئەم خانمە شوفێرە قەبارەکەی لە هی من بەرزتر و نرخەکەشی لە هی من زۆر گرانتر، بەڵام هەست و لێپرسراویەتییان بەرانبەر بە خاک و ژینگە و شارپارێزی لەو پەڕی نزمی و لاوازی بوو!