پەیمان خواجە
خواندنا پیشەیی وەک بەرێ بنیاتێ بۆ پاشەروژا ئابووری و بازاڕێ کاری ل هەرێما کوردستانێ دهێتە هژمارتن، ڕاگەهاندنا پڕۆژێ چاکسازیێ د خواندنا پیشەیی دا و ئیمزاکرنا یاداشتا لێکتێگەهشتنێ د ناڤبەرا وەزارەتا پەروەردێ و چەند سازیێن پەروەردەی یێن پیشەیی دا، پێنگاڤەکا مێژوویی و گرنگە بۆ رێکخستنا ڤی کەرتی و گونجاندنا وێ دگەل پێدڤیێن بازاڕێ کاری، چونکە د ڤی سەردەمی دا پێشڤەچوونا ئابووری ب تنێ ب باوەرنامە یێن ئەکادیمی ئاڤا نابیت بەڵکو ب هەبوونا هێزەکا کار، یا ڕاستەقینە و شارەزاییێن تەکنیکی دهێتە ئاڤاکرن و گەشەپێدانا ڤی کەرتی گەنجان ئامادە دکەت دا ببنە فاکتەرێن سەرەکی د ئاڤاکرنا وەلاتی دا و ڕێژەیا بێکاریێ کێم دکەت، چونکە بازاڕ پێدڤی ب هوستایێن شارەزا وژێهاتی د بوارێن جودا دا هەیە هەروەسا زێدەکرنا بەشێن نوو یێن پیشەیی هەماهەنگیێ د ناڤبەرا خواندنێ و بازاڕی دا دروست دکەت لەوما پڕۆژێ چاکسازیێ د خواندنا پیشەیی دا ل وەزارەتا پەروەردێ پێنگاڤەکا ژیرانەیە بەرەف پاشەڕۆژەکا ئابوورییا ئارام د، و پشتەڤانیکرنا ڤی پڕۆژەی مەرجێ سەرەکی یە دا کو هەرێما کوردستانێ ل شوینا کو ببیتە وەڵاتەکێ بکاربەر، ببیتە وەڵاتەکێ بەرهەمهێنەر و خودانا پیشەسازیا خۆ یا سەربەخۆ هەروەسا دەرچوویێن بەشێن پیشەیی د بازاڕێ کاری دا نەک ب تنێ هێزەکا کارێ ئاسایینە، بەڵکو دینەمۆ و کارگێرێن سەرەکی یێن مەیدانێن بەرهەمئینانێ نە و ڕۆلێ وان یێ مەیدانی ڕاستەوخۆ د چەسپاندنا کواڵێتییا کار و بلندکرنا ئاستێ بەرهەمئینانا ناڤخۆیی دا، ڕەنگ ڤەددەت، ژبەر کو ئەڤ گەنجە ب شارەزایی یا خۆ، دشێن ئاستەنگێن تەکنیکی د دەمەکێ کێم دا چارەسەر بکەن و ومەزاختنێن هاوردەکرنا شارەزایێن بیانی ل سەر کۆمپانیا و کارگەهان کێم بکن .
پشتی ئاشکرا کرنا پروژێ چاکسازیێ دخواندنا پیشەیی دا ل دویماهیێ وەزیرێ پەروەردێ (د. ئالان حەمە سەعید) بەرامبەر ڕاگەهاندنێ ڕاوستا و داخواز ژ هەمی دەزگەهێن ڕاگەهاندنێ کر کو گرنگیەکا تایبەت ب ڤی بابەتی بدەن و ببنە ئامرازەکێ سەرەکی بۆ سەرکەفتنا ڤی پڕۆژەی، ژبەر کو ڕاگەهاندن دشێت تێگەهشتنا جڤاکی بەرامبەر خواندنا پیشەیی بگوهۆڕیت و وێنەیێ نەریتی یێ کو خواندنا پیشەیی ب بــێهێزتر ژ خواندنا ئەکادیمی دبینیت نەهێلیت و ب ڕێکا بەرهەڤکرنا ڕاپۆرتێن مەیدانی و دیارکرنا چیرۆکێن سەرکەفتنا گەنجێن پیشەکار و بەلاڤکرنا هۆشیاریێ ل سەر دەرفەتێن کار و ئایندەیێ ڕووهن د ڤی بواریدا، گەنجان هان بدەت دا کو ب شانازیڤە بەرەف بەشێن پیشەیی بچن و ببنە هەڤپشک د ئاڤاکرنا ئابوورەکێ سەربەخۆ و سەردەمیانە دا بۆ هەرێما کوردستانێ.
پەیڤدارا وەزارەتا پەروەردێ