ئەیاد خالد
هەر ژ کەڤندا و ل سەر دەمێ شۆڕەشێن کورد و کوردستانێ، ئافرەتێ مل ب ملێ پێشمەرگەی بەرگیری ژ ئاخ، زمان و کلتوورێ کوردی کریە؛ ب تایبەتی ل دەڤەرا زاخۆ کو لاندکا شۆڕەشێ بوویە. ئەو زاخۆیا خودان ئافرەتێن قەهرەمان، ئەو ئافرەتێن ب دەستێن خۆ یێن زێرین بەردەوام پشتەڤانیا شۆڕەشا کورد و کوردستانێ دکر و کەل و پەل و پێدڤی بۆ قەهرەمانێن کوردستانێ ئامادە دکرن.
ئافرەتا کورد ئەرکەکی قورس ل سەر ملان بوو؛ د ڕۆڵێ خۆ دا بۆ زارۆکێن خۆ هەم دایک بوو و هەم ژی باب. زارۆکێن خۆ ب نیشتیمانپەروەری مەزن دکرن و د وی دەمێ ڕژێما گۆڕبەگۆڕا عێراقێ زۆڵم و زۆری ل کوردان دکر، وان پاراستنا زمانێ شیرینێ کوردی، کلتوور و جلوبەرگێن جوان یێن کوردی دکر.
ئافرەتا مە نوکە ژی، ب وی مۆرالێ جاران، ل ڤی دەمێ کوردستانا ئازاد دا -کو ب سایە و سەری مەرجعێ بالایێ کورد و کوردستانێ “سەرۆک بارزانی” هاتیە دەستڤە- بەردەوامە وەک شێرەژنەک پاراستنا زمان، کلتوور و ڕەسەناتیا کوردی دکەت. ئەڤڕۆ ب چاڤێن خۆ دبینین کا چەوا جوانی د باژێڕێن کوردستانێ هەمیێ و ب تایبەت “زاخۆیا دەلال” دا یا دیارە.
ئافرەتا زاخۆ ئەڤڕۆ د بوارێن جودا جودا یێن ژیانێ دا پێشەنگە. هەر ژ دەمێ بۆری هەتا نوکە، نموونەیا ئافرەتا قەهرەمان بوویە و زاخۆ هەردم د پێشەنگیا ئافرەتێن خودان نموونەیێن جوان دا بوویە. ئافرەتا کورد ب درێژاهیا مێژوویێ، بەردەوام پاراستن و پەروەردەکرنا نەوەیەکێ نوی ب زمانێ شیرینێ کوردی کریە. ئەڤڕۆ ژی ئافرەتێ ل زاخۆ سەلماند کو ئەوی باژێڕی بوویە دەرگەهێ کۆمکرنا هەر چار پارچێن کوردستانێ، داکو بسەلمینن زمان و کلتوور تشتەکێ بەرزەبووی نینە. ب درێژاهیا مێژوویێ، ئافرەتا کورد و ب تایبەت ئافرەتا زاخۆ، د لاپەرێن مێژوویێ دا ب پەیڤێن زێرین ناڤێ خۆ نڤیسیە، داکو زمان، کلتوور و نەتەوایەتیا کورد د پاشەڕۆژێ دا ب پارێزراوی بمینیت.