مەشخەڵ كەوڵۆسی
لە زۆرێك وتار و نوسین و بەرنامەی میدیایی و كۆڕ و كۆبوونەوەی جیاجیادا، تەنانەت لەناو جڤاتە كۆمەڵایەتییەكانیشدا، گوێبیستی وشەكانی وەك: ئامانجە باڵاكان، بەرژەوەندییەكانی گەلی كوردستان…هتد، دەبین.
جاری واش هەیە گروپێك یان كەسێك تۆمەتبار دەكرێت بەوەی لەبەرژەوەندییەكانی كوردستان لایداوە، یان دژی بەرژەوەندییەكانی خەڵكی كوردستانە. یان بەهەر شێوازێكی تر، مامەڵەی سیاسی و لۆژیكی و تەنانەت ئەدەبیش لەگەڵ ئەو وشەیەدا دەكرێت.
لەڕاستیدا یەكێك لە كێشەكانی نەتەوەی كورد، هەروەها یەكێك لەكێشە هەرە گەورەكانی ئەزمونی حوكمڕانی كوردستان، بەوردی ئەوەیە كە هەر لەسەرەتاوە نەیتوانیوە بەوردی بە ئێمە بڵێت: بەرژەوەندییەكانی خەڵكی كوردستان وقەوارەی هەرێم ئەم خاڵانەن!.
لەهیچ دۆكیۆمێنتێكی یاسایی و سیاسی ئەم ئەزمونەدا، لەهیچ جێگەیەكدا ئەو بابەتە ڕوون نەكراوەتەوە، ئەزمونی حوكمڕانی كوردستان خاڵی خاڵییە لە بابەتێكی لەمجۆرە كە زۆر گرنگ و زۆر مەترسیدارە.
تۆ سەرەتا پێویستە دیدگا و پرۆژە و ستراتیژی نەتەوەیی خۆتت هەبێت، پێناسەی تێروتەسەلی ” بەرژەوەندییەكان”ی خۆتت كردبێت، هێڵی سوری ئەو بەرژەوەندییانەت دیاریكردبێت، بەڕوونی پێمان بڵێت: لەكوێدا بەرژەوەندییەكان دەستپێدەكەن و، لەكوێدا مەترسیی لەسەر ئەو بەرژەوەندییانە دروست دەبن؟ هاوكات پێویستە بەڕوونی و بەدیراسەی ورد و بەداتا پێمان بڵێت: بۆ مسۆگەركردنی بەرژەوەندییەكان ئەم پلانانە ڕیزبەندی دەكەین.
لەبارەی مەترسی لەسەر بەرژەوەندییەكانیش، پێویستە بەهەمان شێوە پێمان بڵێت: مەترسییەكانی سەر بەرژەوەندییەكانی كورد، لەڕووی مادی و مەعنەوی، لە درێژخایەن و كورتخایەن چین و چی دەبن؟ كام لایەن و كام كەسایەتی و كام ئەدەبیات و كام تەكنەلۆژیا و كام جۆری پەیوەندی ناوخۆیی و دەرەكی، كام مادەی خاوی سروشتی، كام پێشهاتی كەونی…هتد، دەبنە مەترسی لەسەر بەرژەوەندییەكانی كوردستان؟.
بەرژەوەندییەكان خۆیان چین؟ پێناسەیان چییە؟ بەكام یاسا و لە كۆنتێكستی كام پرۆژەو دیدگای یاسایی وستراتیژیدا، ئێمە پێناسەمان كردوون؟. كێ هێلەكانی ئەو بەرژەوەندییانەی كێشاوە؟ لەسەر چ بنەمایەك داڕێژراون؟ كامانە پێوەرەكانی ئەو بەرژەوەندییانەن؟ ئایا پەرلەمانی كوردستان كە بڕیارە جێگەی بابەتی یاسادانان و هەموو یەكلاییكردنەوەی بابەتە زیندەییەكانی ئەزمونی حوكمڕانی كوردستان و كۆمەڵگەی كوردستان بێت، لەكام یاسادا ئەو بابەتەی بۆ ئێمە یەكلایی كردۆتەوە؟.
ناسیۆنالیزمی كوردی، كە شۆڕشەكان و ژیانی حیزبایەتی و ئەزمونی حوكمڕانی كوردستانیش بەرهەمی ئەون و لەمنداڵدانی ئەوەوە هاتوونەتە دەرەوە، تاكو ئێستا نەیتوانیوە خۆی بنوسێتەوە، نەیتوانیوە خۆی تیۆریزە بكات، نەیتوانیوە خۆی پێشكەش بكات و، ڕێگەچارەی ڕزگاربوون بخاتە بەردەمی كورد.
پرسیارەكە ئەوەیە: كەواتە بۆچی گلەیی بكەین لە پەرلەمانی كوردستان، كە ئەویش نەیتوانیوە یاسای بەرژەوەندییە باڵاكانی كوردستان دەربكات؟ یان بۆچی گلەیی بكەین لە دەزگا ئەمنییە باڵاكان، كە ئەوانیش نەهاتوون ستراتیژی ئاسایشی نەتەوەیی كوردستان، بنوسنەوە؟.
مادەم دەقێكی یاسایی، یان ستراتیژێكی نەتەوەیی نیە بۆ بابەتی بەرژەوەندیی كوردستان و هەروەها بۆ بابەتی ئاسایشی نەتەوەیی، ئەوا ئێمە دەكەوینە بەردەمی دوو بەرئەنجامی پێچەوانە و ، دوو ڕاستە هێڵ كە قەت ناگەن بەیەك:
یەك: مادەم پێوەرێكی یاسایی، یان ستراتیژێكی نەتەوەییمان نیە بۆ بابەتی بەرژەوەندیی، كەواتە ناتوانین بە وردی دەستنیشانی بكەین، كام كارەمان لەبەرژەوەندی كوردستانەو كام كارەمان لەدژی بەرژەوەندی كوردستانە.
دوو: مەسەلەی دەستنیشانكردنی بەرژەوەندی كوردستان دەبێتە بابەتێك بۆ ئیجتیهاد و مەزەندەگیری و ویژدانی تاكەكەسی. تاكە كەسیش بەگوێرەی ئەقڵ و ئیدراك و بەرژەوەندی خودی خۆی، دەستنیشانی دەكات، چی بەرژەوەندی كوردستانە و چی لەدژی بەرژەوەندی كوردستانە. لەوەشدا گلەیی لێناكرێت چونكە هیچ پێوەرێكی یاسایی و سیاسیمان نیە كە بگەڕێینەوە بۆی لەكاتێكدا بابەتی بەرژەوەندی كوردستان دێتە پێشەوە.