عومەر چنگیانی
دە ساڵێک لەمەوبەر زیاتریش، لە لاپەڕە “19” ی ژمارە 2297ـی ئەم ڕۆژنامەی هەولێرە سێشەممە 19ـی كانوونی دووهەمی 2016 لەژێر سەردیڕی: (لەگەڵ “ناڵەی دەروون”ـەكەی “خاڵ”ـی ڕەحمەتیدا) ئەم بابەتەم بڵاو كراوەتەوە و لەم ئەمڕۆیەدا بە ئەركی دەزانم بێخەمەوە بیری خوێنەرە بەڕێزەكانی گوڵخەرمانەكەم كە تیایدا گوتوومە: (ئەمە جاری یەكەمم نییە دەریای زانستی جەنابی مامۆستا شێخ “محەمەدئەمینی خاڵ”ـی ڕەحمەتی بشڵەقێنم و لێیەوە جامۆڵەیەك هەڵگۆزم و لە پێشدا كەمێك تینوویەتی خۆمی پێ بشكێنم و، بە ئێوەی بەڕێزیش بڵێم: “ئادەی گەلۆ ئاوڕێك لەو بەرهەمانە بدەنەوە و وانەیەكی لێ وەربگرن!”
باوەڕ ناكەم دواجاریش بێت، جا با بچینە بەردەم ئەو چیای زانستە كە لە دووتوێی “ناڵەی دەروون”ـەكەیدا دەفەرمێت:
“ئەگێڕنەوە دەڵێن: یەحیای كوڕی خالیدی بەرمەكی وتوویەتی: هەركەسێك ئەگەر بە پیشە و پایەیەك لەخۆی گۆڕرا، دەعیە و دەماری پەیدا كرد، ئەوە بزانە كە پیشەكەی یا پایەكەی گەلێ لە خۆی بەرزترە و، ئەو كەسە زۆر ناوەجاخە! ئەگەر نەگۆڕرا، ئەوە بزانە كە خۆی لە پیشە و پایەكەی بەرزترە و، ئەو كەسە زۆر وەجاخزادەیە.
وەجاخزادە تا گەورەتر بێ، زبانی شیرین تر و، ناوچەوانی ڕوونتر و دەروونی فراوانتر و، دڵی پاكتر ئەبێ، وەلێ ناوەجاخ بە پێچەوانەی ئەمەیە.
وەجاخزادە دەستمایە و، داراییەكی ئەگەر ببێ، هەمیشە بڵاوی ئەكاتەوە، لە ڕێی یارمەتی و دەستگرتنی داماوان و، لێقەوماوانا، بەڵام ناوەجاخ وەك زەروو هەر خوێنیان ئەمژێ.
وەجاخزادە وەك مۆم ئاگر لە خۆی بەرئەدا، بۆ ئەوەی مەردم لەبەر ڕووناكییەكەی دابنیشێ و بەهرەمەند ببێ، بەڵام ناوەجاخ ئاگر لە خەرمانی هەژارێك بەرئەدا، بۆ ئەوەی خۆی جگەرەیەكی پێ داگیرسێنێ، یا كۆشكێك ئەڕووخێنێ، بۆ ئەوەی چوارچێوەی دەرگایەكی دەست كەوێ.
وەجاخزادە بە چرای زانینەوە پێش گەلەكەی خۆی ئەكەوێ و، ڕێگای تاریك و شەوی ئەموستەچاویان بۆ ڕووناك ئەكاتەوە، بەڵام ناوەجاخ ئەگەر ترووسكەیەك ببینێ فووی لێ ئەكا تا ئەیكوژێنێتەوە.
وەجاخزادە ئەگەر بێگانە بە لەك و كولوور زێڕ و زیوی بەسەردا بڕێژێ هەڵناخەڵەتێ و، كارێكی وای لێ ناوەشێتەوە كە زیان بە یەكێك بگەیێنێ، بەڵام ناوەجاخ بە ئافەرینێك گەلەكەی خۆی ئەفرۆشێ و، بۆ پایە و ناونیشانێك، ئەیكوژێ و ژێرپێی ئەخات.
وەجاخزادە لە پێناوی سوود و قازانجی هەمووانا ئەگەر خۆیشی تووشی دەردیسەری ببێ پێی خۆشە، بەڵام ناوەجاخ وەك كەری دێز وایە، حەز بە تۆپێنی خۆی ئەكات بۆ ئەوەی خاوەنەكەی زیانی پێ بگات! وەجاخزادە لەسەر پێستی خۆی كەوڵی كەیت، لە بیروئامانجی خۆی لانادات، وەلێ ناوەجاخ وەك ڕیشۆڵە و گوڵەبەڕۆژە وایە، هەردەمێ جۆرێك ئەڵێ و هەركاتەو، ڕوو لە لایەك ئەكات.
وەجاخزادە تا لە پێشتر بێ كەس و كار و خزم و خۆیش و دۆست و برادەری لە لا لەپێشتر و بەنرخترە، بەڵام ناوەجاخ هەزار خزم و دۆستی گیانی ئەگۆڕێتەوە بۆ پوولێك.
وەجاخزادە تا لە ژوورتر بێ، خۆی لە نزمتر ئەبینێ و، تا دەوڵەمەندتر بێ، بێدەمارتر ئەبێ، ئەگەر جیهانی بدەیتێ لە خۆی ناگۆڕێ، بەڵام ناوەجاخ بە دەنكە جۆیەك ئەزەڕێ! وەجاخزادە، ناپاكی و نامەردیی پێ نەنگە، بەڵام ناوەجاخ شانازیی پێوە ئەكات.
وەجاخزادە، بێدینییش بكات لە پەردەیەكی شەرما ئەیكا، بەڵام ناوەجاخ وای ئەكا كە نامووسی بێحەیایی ببات و، پەڕۆی نەنگ و بەدناوی دابدورێ بەسەر بێباوەڕی و بێئایینیدا.
وەجاخزادە، تا زانا تر و ئاگادارتر بێ، خۆی بە نادان ئەزانێ، وەلێ ناوەجاخ كە لەگەڵ دوو پیت و لەتێكی خوێند، ئیتر خۆی بە پێشەوایەكی فەیلەسووف ئەبینێ و، وا ئەزانێ كە لە خۆی زاناتر نییە.
وەجاخزادە حورمەتی خۆی و، ناوەجاخ بێحورمەتییەکەی خۆی پێویست ئەكات لەسەر مەردم. ئەگەر تا ئێستا لەبەر سادەیی مەردم ئەم ناوەجاخانە نەناسرابێتن و، ئەم پیشەپیسانە بینرابێتن و چووبێتنە سەر، لەمەولا ئیتر ناچنە سەر؛ چونكە مەردم هەموو چاویان كراوەتەوە، ئەگەر مەردم زۆر چاك لە هێڵەك نەدەن، لە بێژنگ و قەڵبیری هەر ئەدەن و، پیاوی دووڕووی ناپاكی ناوەجاخی پیشەپەرسیان ناوێ، یەكێكیان ئەوێ كە وەجاخزادە و دەربارەی كۆمەڵە، دڵی وەك ئاوێنە پاك و، گیان و دەروونی وەك چرا ڕووناك و، دەست و زوبانی زۆر چاك و، لە بێدەماریدا وەك خاك وا بێ و، هەمیشە بە گفتار و كردار خزمەت بكا و، هەوڵ و تەقالا بدا بۆ هەڵسووڕاندنی كاروباری باش و، بە سەر و ماڵ درێغ و كۆتایی نەكا لە ڕێی یارمەتی و دەست گرتن و بەرزكردنەوە و سەرخستنی كۆمەڵدا) (1)
پەراوێز:
(1) بنواڕە (ناڵەی دەروون، بەرگی 2، لاپەڕە 3)دا.
وجاخکوێرۆکەر شانازی بە ناپاكی و نامەردییەوە دەكات!
