عەبدولقەهار هەولێری
د. دلاوەر ئاژگەیی، نوێنەری حکوومەتی هەرێمی کوردستان لە یەکێتیی ئەورووپا، لەگەڵ شاندێکی نوێنەرایەتی، سەردانی پەرلەمانی ئەورووپای کرد و لەلایەن جۆرجینا تێئۆدۆرێسکو، ئەندامی پەرلەمانی ئەورووپا، پێشوازیی لێکرا.
لە کۆبوونەوەکەدا، د. دلاوەر ئاژگەیی باسێکی لە دوایین پەرەسەندنە سیاسی، ئابووری و ئەمنییەکانی ڕۆژهەڵاتی ناوەڕاست و عێراق کرد و ئاماژەی بە پێگەی هەرێمی کوردستان وەک فاکتەرێکی گرنگی سەقامگیری و ئاسایش لە ناوچەکەدا کرد.
هەروەها، نوێنەری حکوومەتی هەرێمی کوردستان بە وردی باسی ئەو تەحەددیانەی کرد کە هەرێم ڕووبەڕوویان دەبێتەوە، بە تایبەتی لە بواری ئەمنی و پاراستنی قەوارەی دەستووریی هەرێمی کوردستاندا.
یەکێک لە تەوەرە سەرەکییەکانی گفتوگۆکە، هێرشە مووشەکی و درۆنییەکان بوون بۆ سەر هەرێمی کوردستان، سەرەڕای ڕاگەیاندنی ئاگربەست، هەروەها کاریگەریی ئەو هێرشانە لەسەر بارودۆخی هەرێم و ژیانی هاووڵاتیان.
د. دلاوەر ئاژگەیی جەختی لەوە کردەوە کە هەرێمی کوردستان هەمیشە وەک ناوچەیەکی ئارام و نموونەیەک لە پێکەوەژیانی ئاشتییانە لە ناوچەکەدا دەمێنێتەوە و بەردەوام دەبێت لە پەیڕەوکردنی سیاسەتی ئاشتیخوازانەی خۆی، وەک فاکتەرێکی گرنگی ئاسایش و سەقامگیری.
لەو پێناوەدا، ئاماژەی بە گرنگیی پشتگیریی زیاتر لەلایەن هاوپەیمانان و دۆستانی هەرێمی کوردستان لە کۆمەڵگەی نێودەوڵەتی، بە تایبەتی یەکێتیی ئەورووپا، کردەوە بۆ ڕووبەڕووبوونەوەی ئەو تەحەددییانە و پاراستنی سەقامگیریی هەرێم.
لە بەرامبەردا، جۆرجینا تێئۆدۆرێسکو سڵاو و ڕێزی خۆی بۆ سەرۆک مەسعود بارزانی نارد و ستایشی ڕۆڵی هەرێمی کوردستانی کرد لە پاراستنی سەقامگیری و ئاسایش لە ناوچەکەدا.
ئەندامی پەرلەمانی ئەورووپا هەروەها هاوسۆزی و پشتیوانیی خۆی بۆ حکوومەت و گەلی کوردستان دووپات کردەوە و ئامادەیی خۆی دەربڕی بۆ پشتیوانی لە هەرێمی کوردستان لە ناوەندەکانی یەکێتیی ئەورووپا.
جێگای ئاماژە پێکردنە، هەرێمی کوردستان سەرەڕای ئەوەی لە ڕۆڵی ئاشتیخوزانەی خۆی بەردەوام بووە لە کێشە و ناکۆکییەکانی ناوچەکە، بەڵام قوربانی سەرەکی جەنگ و ململانێکانە و لە ڕابردوو و ئێستادا لە ژێر هەڕەشە و مەترسیی هێرشی موشەکی درۆنییە و لەو بارەیەوە چەندین جار سەرکردایەتیی هەرێمی کوردستان هۆشداری داوە.