فازڵ میرانی: دۆخی عێراق و دۆخی هەرێمی کوردستان کەوتۆتە دۆخێکی دەستشکاندن
فازڵ میرانی، سکرتێری مەکتەبی سیاسی پارتی دیموکراتی کوردستان، لە میانی گفتوگۆیەکی لەگەڵ دەنگی ئەمریکا، ڕایدەگەیەنێت؛ نە سیاسەتی پارتی، نە سیاسەتی یەکێتی، ئەوەیە کە هێرش بکەنە سەر کەسایەتی و سەرکردایەتیی حزبەکان و ئەوانەی ئەوکارە دەکەن لە سۆشیال مێدیا بەرپرسیارێتیان نییە. دەشڵێت؛ بەم نزیکانە لەگەڵ یەکێتی کۆ دەبینەوە.
پوختەی گفتوگۆی فازڵ میرانی، سکرتێری مەکتەبی سیاسی پارتی، لەگەڵ دەنگی ئەمریکا؛
دۆخی عێراق و هەرێمی کوردستان و پەیوەندیی نێوان لایەنەکان
فازڵ میرانی: دۆخی عێراق و دۆخی هەرێمی کوردستان کەوتۆتە دۆخێکی دەستشکاندن، ئەو دوو کوتلەیەی لە عێراق هەیە چوارچێوەی هەماهەنگی و هاوپەیمانی، کوردستانیش ئێمە و یەکێتین، ڕێزمان بۆیان هەیە، بەڵام ئەوانە کاریگەرییەکی زۆر خراپیان نابێت لەسەر هەرێمی کوردستان، ئەوەی ئێمە و یەکێتی تا ئێستا جارێ دەست بادانە، سوپاس بۆ خوا دەستشکاندن نەبووە، بەس بە ئومێدی ئەوە ئینشائەڵڵا دەسبادانەکە سست تر بێتەوەو بەرەو دەستشکاندن نەروات . “
گرژییەکانی پارتی و یەکێتی
فازڵ میرانی: بەداخەوە ئەوانەی ئەو کارە دەکەن لە سۆشیاڵ میدیا بەرپرسیارێتییەکی وەهایان نییە، نە سیاسەتی پارتی نە سیاسەتی یەکێتی ئەوەیە کە هێرش بکەنە سەر کەساییەتی مەسئولی یەکەمەکان نە سەرکردایەتی حیزبەکان “
بەهەرحاڵ ئەو ئیعلامەش بە ڕای من ئاڕاستەکراو نییە، ئەگەر تەماشا بکەی ڕاگەیەنراوی کۆتایی کۆنگرەی سەرکرداییەتی ئێمە، ئەو زمانە زبرەی کە لەگاڵ یەکتر مخاتەبە دەکەین رەفزمان کردووە، دەرگای دیالۆگ هەیە تا ئێمە مەجالی دانوستاندن هەبێت هەروەکو لە پێشەکیش ئێمە دوای هەڵبژاردنەکان سەردانی هەموو حزبەکان بەندە خۆم چووم، بەشێک لەو حیزبانە خوا خێریان بنوسێ دەرگایان لێ نەکردینەوە، قسمێکیش بینیمان برادەرانی یەکێتی کە لامان مەبەست بوو و تا ڕادەیەک لێکتێگەیشتنێکی باشیشمان هەبوو، مەسەلەی سەرۆکایەتی کۆماری عێراق هات، ئەوەی کە ئەوەندە ناهێنێت، من دەڵێم جارەکەی تریش بە تۆم وتەوە، ئەوە وەزعەکەیە ئەگەرنا ئێمە و یەکێتی لێکتێگەیشتنێکی باشمان هەیە لە دوای هەڵبژاردنەکان “.
فازڵ میرانی: بەم نزیکانە کۆ دەبینەوە، هەمیشە من دەڵێم بەدیلی کۆبوونەوە و کۆنەبونەوە چییە؟ بەدیلی رێکنەکەوتن چییە؟ بەدیلی پێکەوە کارکردنی ئێمە و یەکێتی؟ نە بەدیلک لای خۆمان دەبینم نە برادەرانیش تا ئێستا بەدیلێکیان نیشان نەداوم قەناعەتی پێ بکەم، بەدیلی ئەوەی پێکەوە بیکەین چییە؟
لە کوردستان بێ ئیلتیزامی دروست بووە
فازڵ میرانی: وەڵاهی لێت ناشارمەوە بە داخەوە لە کوردستاندا، ئێستا شێوەیەک لە بێ ئلتیزامی دروست بووە لە ناو حیزبەکانیشدا، واتە هەتا خۆشمان حیزبێکی ساحێب دیسپلێن بوین تا ئیستاش مەرکەزییەت و مەرجەعییەتی ئێمە بەقوەتترە لە هەموو حیزبەکان جار بە جار لە ناو ئێمەش خەڵکێک هەیە (فەڵتێک) دەکات و بە قسەی (رەحمەتی مام جەلال) کۆمەڵگای کوردستان وای لێهاتووە، بە داخەوە و ئەمەش ئاماژەیەکی سلبیە بە دیدی من، خەڵکێک دەڵێت ئەمە پێشکەوتنی بیرکردنەوەیە، ئەمە پێشکەوتنی جڤاکییە ئەمە ئازادی رادەربڕینە، ئازادی رادەربرین لەناو خودی حیزبەکاندا دەبێت، بەڵام لەدەرەوەی حیزبەکان، مەسەلەیەکیش هەیە، دەڵێ ئەگەر تۆ بتەوێ گەورە بی خەڵکێک بە گچکە مەبینە. “
سەرکردایەتیی ئێستای یەکێتی جێگرەوەی کۆنگرەیان نییە
فازڵ میرانی: ئێمە دەستمان نەبووە لە ڕووداوەکانی 8ی تەموزدا، پێکهاتەی یەکێتی حیزبێکی فرە مینبەرە، واتە یەکێتی لە رووی پێکهاتەوە وەکو بەرەیەک پێکهاتووە، سەکۆی ئازادی ئەوان پێی دەڵێن، ئەو سەکۆی ئازادییە هەمیشە بیروڕای جیاوازی لێ پەیدا بووە، ڕەوتی لێ پەیدا بوو، گۆڕانی لێ پەیدا بوو، (بەرهەم ساڵح)ی لێ چووە دەرەوە، بەرهەم گەڕایەوە ناو یەکێتی، ئەمەی لە ناو یەکێتیدا هەیە لە ناو پارتیدا نییە، ئەمە یەک، دووەمیش، من دەڵێم بە فەرمی هێشتا کاک بافڵ سەرۆکی یەکێتی نیشتیمانی کوردستان نییە بە قەراری موعتەبەر، هاوسەرۆکە هێشتا، سەرکردایەتی یەکێتی ئێستا جێگرەوەی کۆنگرەیان نییە بەڵێ دەسەڵاتیان وەرگرتووە بەس ئەمە کێشەی یەکێتییە من حەز ناکەم بچمە ناوی “
پۆستی سەرکۆماری عێراق
فازڵ میرانی: هه‌تا ئێستا ئێمه پێداگرین لەسەر وەرگرتنی پۆستی سەرکۆمار، به‌ڵام هه‌موو شتێک قابیلی گۆڕانە، من ده‌ڵێم به‌رژه‌وه‌ندی کورد له‌سه‌روو هه‌موو به‌رژه‌وه‌ندیه‌کاندایه به‌ڕای من له‌سه‌روو سه‌رۆک کۆماریشه‌وه‌یه. “
دۆخی سلێمانی و داهاتی کوردستان
فازڵ میرانی: حکومه‌تێک هه‌یه له دنیادا حه‌ز بکات مووچه به‌هاوڵاتیان و کارمه‌ندانی خۆی نه‌دات؟ پێشتریش به کاک نیچیروانیش هه‌مان شتیان ده‌وت که حکومه‌ت پاره‌ی هه‌یه و نایدات به کارمه‌نده‌کانی خۆی، کاتی خۆیشی وتم مه‌عقوله نه‌وه‌ی مه‌لا مسته‌فا سه‌رۆکی حکومه‌تی هه‌رێمی کوردستان بێت له‌جیاتی مانگانه‌ی کارمه‌نده‌کانی خۆی خه‌رج بکات و بڵێن حکومه‌تێکی ڕێکوپێکه، خۆی بچێت پاره کۆبکاته‌وه له‌شوێنێک و نه‌یدات به کارمه‌نده‌کانی! سلێمانی له‌کوێیه ئایا له مه‌ریخه و میلله‌تێکی ئیسلام نین و کوردنین و کارمه‌ندی حکومه‌تی هه‌رێم نین؟! ئه‌وه ڕای خۆمه ئه‌گه‌ر داهاته‌کانی کوردستان به‌ڕێکوپێکی کۆبکرێنه‌وه ئێمه موحتاج- پێویستمان به پاره‌ی به‌غدادیش نابێت. “
ئەگەری کشانەوەی یەکێتی و گۆڕان لە حکوومەت وەک بانگەشەی هەڵبژاردن
فازڵ میرانی: ئه‌گه‌ر هه‌ڵبژاردنی هه‌رێمی کوردستان ببێت، به بڕوای من ئه‌زموونێکی تاڵتر به‌کاردێنن و براده‌رانی تر چه‌ندجار له حکومه‌ت کشانه‌وه، یه‌کگرتوو له حکومه‌ت کشانه‌وه بۆئه‌وه‌ی کورسی بهێنن، کۆمه‌ڵ له حکومه‌ت کشانه‌وه بۆئه‌وه‌ی کورسی بهێنن ئه‌گه‌ر له‌به‌ر هه‌ڵبژاردنه ده‌ڵێن، باخۆیان ماندوو نه‌که‌ن له‌حکومه‌ت کشانه‌وه ڕابردوو ناسڕێته‌وه، واته ئێستا ئه‌گه‌ر یه‌کێتی یان گۆڕان له حکومه‌ت بکشێنه‌وه ئه‌وه‌ی له‌ڕابردوو به‌رپرسبوون لێی، به‌رپرسیارێتیه‌که‌یان ناسڕێته‌وه و هه‌رده‌مێنێت که‌واته ئه‌م چه‌ند مانگه‌ی هه‌یه هه‌تا دوای هه‌ڵبژاردن به‌رپرسن نابن. “
هاوپەیمانی سێ قۆڵی و متمانەی نێوان لایەنەکانی
فازڵ میرانی: متمانه له‌نێوان ژن و مێردا هه‌یه، به‌ڕه‌حمه‌ت بێت کاک نه‌وشیروان وای ده‌وت“ ئه‌گه‌رنا له‌نێوان حزبه‌کاندا به‌رژه‌وه‌ندی هاوبه‌ش هه‌یه، ئه‌وانه‌ی ئێمه پێشتر له‌گه‌ڵی ڕێککه‌وتووین بۆ متمانه‌مان پێی هه‌بوو! سه‌ربازیان هێنا عه‌بادی ویستی بێته‌وه و هه‌موو سنوره‌کان بگرێته‌وه فیدڕاڵیه‌که نه‌هێڵێت. “
به‌رای تۆ عێراق له‌م چه‌قبه‌ستوییه ڕزگاری ده‌بێت؟
فازڵ میرانی: ئاسان نییه. “
ئەگەری دووبارە هەڵبژاردنەوەی پەرلەمانی عێراق
فازڵ میرانی: ئاسان نییه، که‌س ناوێرێت هه‌ڵبژاردن بکاته‌وه چونکه ئه‌مجاره خه‌ڵکه‌که ناچنه‌وه بۆ هه‌ڵبژاردن، خه‌ڵکی عێراق و خه‌ڵکی هه‌رێمی کوردستانیش بێزار بوون له هه‌ڵبژاردن، بۆ هه‌رێمی کوردستانیش ئه‌گه‌ر دۆخه‌که وه‌کو عێراق بێت، ئێستای ئه‌م عێراقه وه‌کو عێراقی پێش هه‌ڵبژاردن نییه، عێراق و هه‌رێمی کوردستان دوای ئه‌و هه‌ڵبژاردنه ئاماده نابێت بۆ هه‌ڵبژاردنێکی تر ئه‌مه واقیعێکه، مرۆڤ ده‌بێت به‌چاوی خه‌ڵک ته‌ماشای خۆی بکات، به‌چاوی خۆی ته‌ماشای خۆی نه‌کات. “