حەسەن حەمەد ئاندێکی
فیلمی لە جەرگەی مەترسیدا یاخود دڵی ئاژەڵ (Heart of the Beast) چیرۆکی (جەیمس بێلمۆنت)، ئەفسەری پێشووی هێزە تایبەتەکانی ئەمریکا و سەگە جەنگییەکەی واتە (ئۆدین) دەگێڕێتەوە. دوای کەوتنەخوارەوەی فڕۆکەکەیان لە ناوچە سەخت و دابڕاوەکانی ئەلاسکا، هەردووکیان بە تەنیا دەمێننەوە و دەبێت بۆ گەڕانەوە بۆ نێو شارستانییەت، شەڕ لەگەڵ کات و سروشتێکی دژواردا بکەن. سەرما، برین، ئاژەڵە کێوییەکان و مەترسییە نادیارەکان، هەر هەنگاوێکیان دەکەنە تاقیکردنەوەیەکی نوێ و سەخت. لە پاڵ ئەمەشدا، جەیمس ڕووبەڕووی یادەوەرییە تاڵەکانی ڕابردوو و برینە دەروونییەکانی جەنگ دەبێتەوە، بەڵام بوونی ئۆدین هێزی بەردەوامبوونی پێ دەبەخشێت. کڕۆکی فیلمەکە لەسەر پەیوەندیی قووڵی نێوان مرۆڤ و سەگەکەی، متمانە، قوربانیدان و خۆڕاگری بونیاد نراوە. گەشتەکەی جەیمس و ئۆدین هەوڵێکە بۆ مانەوە و، ڕووبەڕووبوونەوەی ترس و تارماییەکانی ڕابردووشە، کە لە کۆتاییدا وادەکات هەردووکیان بەهێزتر لە جاران دەربچن. لە کۆتایی ئەم گەشتەدا، هاوڕێیەتیی نێوان جەیمس و ئۆدین دەبێتە قەڵغانی بەرگرییان و هەریەکەیان بە جۆرێک دەبێتە ڕزگارکاری ئەوی دیکە. لە ڕێگەی ئەم پەیوەندییەوە، فیلمەکە وێنای ململانێی مرۆڤ لەگەڵ سروشت و ناخی خۆیدا دەکات، هاوکات مانای ڕاستەقینەی متمانە و خۆڕاگریمان نیشان دەدات لە ژینگەیەکی پڕ لە مەترسیدا.
سەرچاوە:
https://www.hoopladigital.com/comic/the-heart-of-the-beast-judith-dupre/13677498