بڕیار عەبدولڕەحمان
مامۆستای شێوەکار (پەیام ڕزگار) ساڵی ٢٠٠٤ لە ڕواندز لەدایک بووە، یەکەمی سەر پەیمانگەی هونەرە جوانەکانی ڕواندز بووە لە بەشی شێوەکاری لە ساڵی خوێندنی ٣٠٢٣-٢٠٢٤، خاوەن سەلیقەیەکی جوانە لە نیگارکێشان. لەم چاوپێکەوتنەدا باس لە ژیانی هونەری خۆی و گەیشتن بەم قۆناغە دەکات.
چی وای لێ کردی بەشی شێوەکاری هەڵبژێری، حەز و خولیای خۆت بوو، یان بە ڕێکەوت چوویتە ئەو بەشە؟
هونەر و وێنەکێشان بەشێک بووە لە حەز و خولیای منداڵیم، لەو کاتەوە هەستم ئەکرد، ئەو بەهرەیەم هەیە و حەزم کرد زیاتر پەرەی پێبدەم و بە ئەکادیمی بخوێنم.
تابلۆکانت گوزارشت لە چی دەکەن؟
تابلۆکانم زیاتر گوزارشت لە بابەتی فۆلکلۆری و نیشتمانپەروەری و ئەو بابەت و ڕووداوانەی ڕۆژانە دەیبینین و ڕوو دەدەن.
لە ڕێی هونەرەکەتەوە دەتەوێت چ پەیامێک بگەیەنی؟
دەمەوێ لە ڕێگەی هونەرەکەمەوە پەیامی ژیان و نیشتمانی و مرۆڤدۆستی بگەیەنم، پەیامی بوێری ئافرەت و خۆشەویستی و پیشاندانی دیوە جوانەکانی ژیان.
تا ئێستا چەند پێشانگەی تایبەتت کردۆتەوە و لە چەند پێشانگەی هاوبەش بەشداریت کردووە؟
تاوەکو ئێستا بەشداریم لە چەندین پێشانگەی هاوبەش کردووە و تەنها یەک پێشانگەی تایبەت بەخۆمم کردۆتەوە، هیوام وایە لە ئایندەدا بتوانم زیاتر خزمەت بکەم.
کێ هاندەر و پاڵپشتت بووە؟
لەم چەند ساڵەی ئەزموونی هونەریم دایک و باوکم، مامۆستایانم، هاوڕێیانم، هاندەری تەواوم بوونە و پاڵپشتیان کردووم. بە بوونی ئەوانەوە بەردەوامم.
ڕۆڵی پەیمانگە چۆن هەڵدەسەنگێنی لە گرنگیدان بە هونەری وێنەکشان، بە تایبەتیش ڕەگەزی مێ؟
بێگومان لە پەیمانگە بە شێوەیەکی ئەکادیمی زیاتر شارەزای بوارەکە دەبیت و ڕۆڵێکی گرینگی هەیە لە بەرەوپێشچوونی بەهرە و تواناکانمان.