عەبدولغەفار عەبدوڵڵا – هەولێر
مەریوان جەلال، هونەرمەندی شێوەکاری کورد، نوێترین پێشانگەی سیرامیکی خۆی لەژێر ناوی “سنوورە چنراوەکان، ژیانە هەڵوەشاوەکان”، هەفتەی ڕابردوو لە شاری لەندەنی پایتەختی بەریتانیا، لە گەلەری هاوس ئەفسانە کردەوە.
مەریوان جەلال، هونەرمەندی شێوەکاری کورد گوتی: لەم ئەزموونەم دا، بە کارامەیی و قووڵییەکی فرەرەهەندەوە کۆمەڵێک لە کارە نوێیەکانم لەگەڵ بەرهەمە کۆنەکانم دا ئاوێتە کردووە، بە جۆرێک ئەو وێنانەی لە کارە کۆنەکانم دا هەن، وەک یادەوەرییەکی بەردەوام و زیندوو سەر هەڵدەدەنەوە کە بە تێپەڕبوونی کاتیش کاڵبوونەوە و فەرامۆشبوون رەت دەکەنەوە و مێژووی رووداوەکان زیندوو رادەگرن.
مەریوان جەلال گوتیشی: من لەو پێشانگەیەدا دەستکردی مرۆڤ وەک خۆی و ئامرازێکی کۆنترۆڵکردن دەریان دەخەم، لە کاتێکدا جەخت لەسەر ئەو راستییە تاڵە دەکەمەوە کە مرۆڤەکان خۆیان قوربانیی یەکەمی ئەم دابەشکارییە دەستکردەن و باجی قورسی هەڵوەشاندنەوەی پەیوەندییە کۆمەڵایەتی و مرۆییەکانی ژیانیان دەدەن.
مەریوان جەلال باس لە گرنگی کردنەوەی ئەو پێشانگەیە دەکات و دەڵێت: گرنگی ئەم پێشانگەیە لە کەرەستە و تەکنیکەکانم دا رەنگدەداتەوە، کاتێک هونەری سۆزدارانەی سیرامیک لەگەڵ تەکنیکی هاوچەرخی “چاپ لەسەر قوڕ” ئاوێتە دەکرێت؛ لێرەدا شێوە و قەبارەی قوڕی سوورکراو تەنیا ماددەیەکی رەق نییە، بەڵکو گوزارشتێکی جەستەیی و رۆحییە لە قورسایی و بارگرانیی نیشتمان، کاتێک لە یەک کاتدا رەق و پتەوە، بەڵام لە ژێر کاریگەریی وێرانکاری و کۆچی زۆرەملێدا، ناسک و زەبربەبەرکەوتوو دەردەکەوێت و نیشانەکانی فشار و دەربەدەری بە قووڵی پێوە دەبینرێت.
ئەو شێوەکارە باس لە نەخشە جۆراوجۆرەکانی پێشانگەکە دەکات و دەڵێت: لە بەرامبەردا، رووبەرە چاپکراوەکانی سەر رووی قوڕەکە کە لە نەخشە جۆراوجۆرەکان، شوێنەواری تێکستیل و قوماشەکان، و نیشانە سڕاوەکان پێکهاتوون، رەنگدانەوەی تەواوی ئەو زەمینە ناجێگیر، لێڵ و لەرزۆکەن کە مرۆڤی کۆچبەر لە گەشتە نادیار و پڕ مەترسییەکانیدا هەنگاوی بەسەردا دەنێت.
مەریوان جەلال ئاماژەی بەوەش دا: لە رێگەی ئەم تێپەڕاندنە هونەرییەی ناتەواویی وێنەکان و ئاوێتەکردنیان لەگەڵ قوڕی سوورکراو، ئەم تەنە هاوچەشنە سیرامیکییانە دەبنە بەڵگەنامەیەکی زیندووی مێژوویی؛ ئەوان نەک تەنیا گێڕانەوەی رووداوە رەشەکانی سەپاندنی سنوورەکان و تێکدانی شیرازەی ژیانەکانن، بەڵکو دەبنە سیمبولی خۆڕاگرییەکی بێوچان، کە تێیدا مرۆڤی ئاوارە تەنانەت دوای ئەوەی هەموو شتە ئاشناکانی دەوروبەریشی لەبەریەک هەڵدەوەشێن و وێران دەبن، هێشتا کۆڵ نادات و بەردەوام دەبێت لە هەوڵدان بۆ دۆزینەوەی زەمینەیەکی جێگیر و ئارام بۆ سەرلەنوێ بونیادنانەوەی ژیانەکەی.”
مەریوان جەلال، هونەرمەندی شێوەکاری کورد، لەساڵی 1966 لە سلێمانی لەدایکبووە، ئێستا لە شاری لەندەن نیشتەجێیە. لەساڵی 2011 بەکالۆریۆسی لە سیرامیکی زانکۆی کەمبریل وێڵ بەدەستهێناوە، هەر لە هەمان زانکۆ لەساڵی 2014 ماستەری لە چاپەمەنی لە هونەری بینیندا بەدەستهێناوە.