جنوب اسماعیل
پشتی بورینا پتر ژ سەدەیەکێ ژ پەروەردەییا نەرێتی، کو ژ بکارئینانا کاغەز و پێنوسێ و تەختێ رەش دەستپێکری، ئەڤرۆ دیوارێن خواندنگەهان دهێنە هەژاندنا ژلایێ ژێریا دەستکرد ڤە، کو چەمکەکێ نوی بۆ فێربوونێ ئاراستەیی فێرگەهـ و فێرخوازان دکەت. دنوکە دا پرسیارا مە نە ئەوە کا ژێرییا دەستکرد دێ هێت دناڤ پولێ دا یان نە؟ بەلکو پرسیار ئەوە، دێ چاوا هێت؟ بەشەک ژ پەروەردەکاران وەک هەڤپەیمانەکێ دبینن، لێ بەشێ دی ب ترس و گوماناماوی سەحدکەنێ! ئەرێ ژێریا دەستکرد دێ دەستهەلاتێ ژ مامۆستایان وەرگریت؟ و دێ شیانێن هزرکرنا بنەرەتی ژ قوتابیان وەرگریت؟ وەزارەتا پەروەردێ چ پلان سەبارەت ژێرییا دەستکرد هەنە؟
سەگڤان ئیبراهیم، رێڤەبەرێ سەرپەرشتیکرنا پەروەردەیی، سەبارەت پلانا وەزارەتا پەروەردێ بۆ ژێرییا دەستکرد، بۆ هێلین میدیا دبێژێت: دنوکەدا وەزارەتا پەروەردێ کار سەرهندێ دکەت کو مفایێ ژ تەکنۆلۆژیا سەردەم و ژێریا دەستکرد وەرگریت، ژبەرکو د وێ باوەرێ داییە، سەرکەفتنا پروسەیا پەروەردەیی گرێداییە ب ژێرییا دەستکردڤە یا کو بالا جیهانێ بەرەف خوە راکێشایی، و مفایێ ژێ وەرگریت. و دماوەیێ بوری دا چەندین کونفرانس و ورکشوپ هاتینە ئەنجامدان بۆ هندێ مفا ژ ژێرییا دەستکرد بهێتە وەرگرتن، و دیسان ژێرییا دەستکرد ئێخستیە دناڤ پروسەیا پەروەردە وفێرکرنێ دا ب رێکا پلاتفورمێ ئی_پەروەردە و قوتابخانەکەم، کو ئێک ژ پێشکەفتیترین پلاتفورمانە سەر ئاستێ پەروەردێ، مامۆستا گەل قوتابی و سەمینانێن قوتابیان مفایەکێ باش ژێ دبینن.
زێدەتر دبێژێت: پێدڤیە سەر پەروەردەکارا گەلەک ب هوشیاری سەردەریێ دگەل ژێریا دەستکرد بکەن د پروسەییا پەروەردە و فێرکرنێ دا، ژبەرکو پروسەیا پەروەردەیی پێدڤیە یا بەرنامەکری و پلانکری بیت نەکو هەرمەکی و بەرەلا بیت داکو لایەنێ وێ یێ ئەرینی مفا ژێ بهێتە وەرگرتن کو گەلەک گرنگە بۆ پروسەیا فێرکرنێ.
و هەر دیسان دبێژیت: وەزارەتا پەروەردێ ژبلی کونفرانس و وورک شوپان، خولێن راهێنانێ پێشکێشی مامۆستایان دکەت و ژێرییا دەستکرد ئێک ژ تەوەرێن سەرەکی یێ ئەڤێ خولێ بوویە، کو مامۆستا تێدا فێری ئامرازێن ژێرییا دەستکرد بووینە بۆ برێڤەبەرنا پولێ ب شێوەکێ دیجیتال و سەردەمیانە.
سەبارەت پرسیارێن نەریتی(تەقلیدی) سەگڤان ئیبراهیم دبێژێت: نەوەیێن نوکە و داهاتی گەلەک جودانە دگەل نەوەیێن بەرەبابێن خوە، ژبەرهندێ پێدڤیە پرسیارێن نەریتی بهێنە گوهورین ب شێوەیەکێ دگەل قوتابیێن ئەڤی سەردەمی بگونجن، و بۆ هندێ وەزارەتا پەروەردێ کار دکەت بۆ پەیداکرنا گوهورینان دئەڤی بیاڤی دا و گەلەک گوهورینێن ئەرێنی دروستکرینە، و مفا ژ تەکنۆلۆژیا سەردەم وەرگرتیە و ئەم دبینن کو قوتابی دنوکەدا پشتی ئەزموونان ب روژەکێ ئەنجامێن خوە گەل بەرسڤا خوە و بەرسڤا نموونەیی ب شێوەیەکێ دیجیتال دکەڤیتە بەردەستێ وی.
زێدەتر گوت ژی: دنوکەدا وەزارەتا پەروەردێ د قوناغا بکارئینانا ژێرییا دەستکرد داییە بۆ پروسەیا فێربوونێ و فێرکرنێ و بەردەوام کار سەر هندێ دهێت کرن، کو ئەڤ پروسە زێدەتر بهێتە بەرفرەهکرن ومفا ژێ بهێتە وەرگرتن.
مامۆستا فتحی حسێن، سەبارەت رولێ مامۆستایی بەرامبەر ژێریا دەستکرد بۆ هێلین میدیا روون دکەت و دبێژیت: ژێرییا دەستکرد رولێ مامۆستایی د پولێ دا لاواز ناکەت، ب مەرجەکی کو پێدڤیە مامۆستا پشتبەستنا تەمام سەر نەکەت، و بکاربینت وەک ژێدەرەکێ یەدەک بۆ وەرگرتنا پێزانینان، ژبەرکو بوویە بەشەکێ سەرەکی بۆ پێشکەفتنێ د ژیوارێ نوکە دا. و پێدڤیە مامۆستا پەرتووکان بۆ خوە بکەتە ژێدەرێ پێشکەفتن و زانینێ نەک ژێرییا دەستکرد ب تنێ، و ژێرییا دەستکرد وەک ژێدەرکێ یەدەک بکاربینت بۆ وەرگرتنا پێزانینان و بەرفرەهکرنا هزرا خوە یا بابەتی.
زێدەتر دبێژێت: ژێرییا دەستکرد چەند پێشبکەڤیت نەشێت جهێ مامۆستایی د پولێ دا بگریت، ژبەرکو ئەرک و شیانێن مامۆستایی د پولێ دا نەک تنێ زانستە بەلکو پەروەردەیە و رەوشتە و پاشی زانستە، ژبەرهندێ مامۆستا نموونەیە د چاڤێ قوتابیان دا و قوتابی دبیتە چاڤلێکەرێ مامۆستایێ خوە و دیسان مامۆستاییە قوتابی فێردکەت و هانددەت بۆ حەزکرنا وەلاتێ خوە و رێزگرتن بەرامبەر کەسانێن دی و رەوشتێ بەرز.
زێدەتر گوت: پێدڤیە بەردەوام مامۆستا هاریکاربیت دگەل قوتابیان بۆ بەرسڤدانا پرسیارێن زحمەت، و پێکولان بکەت قوتابی د پولێ ڤە بەرسڤا پرسیارێن زەحمەت بدەت و دگەل قوتابی هزربکەت هەتا دگەهنە بەرسڤا درست باشترە کو قوتابی ئەرکەکێ زەحمەت ببیتە مال و پشتبەستنێ سەر ژێرییا دەستکرد بکەت بۆ بەرسڤدانێ.
و بۆ هندێ قوتابی پالبدەن بۆ هزرکرنەکا رەخنەگرانە و دویری ژێرییا دەستکرد بکەن د بەرسڤدانێ دا، ناڤهاتی دبێژێت: پێدڤیە کارگێریا قوتابخانێ و مامۆستا هندەک چالاکیان رێکبێخن بۆ قوتابیان، و قوتابی تەوەر و پشکدارێ سەرەکی یێ ئەڤان چالاکیان بیت، وەکی چالاکیێن وەرزەشی وهونەری و هاندان بۆ داهێنانێن نوی، ئەڤە وەدکەت کو قوتابی تێکەل بیت گەل کومەلگەهـ و جڤاکی وپشتبەستنێ سەر شیان و هزرێن خوە بکەت و بشێت ببیتە رەخنەگەرەکێ ئاڤاکەر نەک خودان عەقلەکێ چاڤلێکەر وپشتبەستنکەر.
قوتابی محمد عەلی بۆ هێلین میدیا دبێژێت: تەکنۆلۆژیایێ وەک ئامرازەک بکاردئینم و نە ب شێوەیەکێ بەردەوام، تنێ ل دەمێ نەزانینا من بۆ پرسیارەک بزەحمەت بکاردئینم یان ژی بۆ پتر روونکرن و تێگەهشتنا بابەتان.
سەبارەت پشتبەستنا قوتابی سەر ژێریا دەستکرد دبێژێت: ژێریا دەستکرد شیانێن هزری و لێگەریانێ و رەخنەگرتنێ کێم دکەت ل دەف قوتابیان، ژبەرکو تشتەک بەردەست و ئامادەییە و پێدڤی ب هزرکرنێ و عەقلی ناکەت. و بارا پتر بۆ ئەرکێ مال یێ بلەز بکاردئینم و بۆ روونکرنا بابەتێن نە گەلەک روون.
سەبارەت پەیوەندیا دگەل مامۆستایی دبێژێت: نابینم کو ژێریا دەستکرد دشێت جهێ مامۆستایی پر بکەت، ژبەرکو ئامرازەکێ بێ روحە و نەشێت وەک مامۆستایی ل قوتابیان بگەهیت و هەر تشتەکێ قوتابی بڤێت ب شێوەیەکێ پراکتیکی و بەرچاڤ روونبکەت، ژبەرکو پتریا جاران ژێریا دەستکرد ژ پرسێن من ناگەهیت و بەرسڤەکا دویر ژ پرسیارێ ددەت. و زێدەتر دبێژێت: ژێریا دەستکرد و هەمی ئامرازێن دی یێن تەکنۆلۆژییا پێشکەفتی، دشێن بۆ وەرگرتنا مفایی بکاربینن یان ژی بەروڤاژی دشێن ب رێکا ئەوان زیانێ بگەهینن کەسەکێ یان جهەکێ وهتد…ئەڤە گرێدایی رەوش و رەوشتێن تاکە کەسینە.